ໃນຕອນເຊົ້າຂອງວັນທີ 9 ທັນວາ 2019 ນີ້ ຢູ່ທີ່ສະໂມສອນບ້ານປົວ ເມືອງພູກູດ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາບ້ານ ປົວ ເປັນຄອບຄົວ ແລະ ບ້ານສາມັກຄີປອງດອງຂື້ນຢ່າງເປັນທາງການ. ພາຍໃຕ້ການເປັນປະທານຂອງ ທ່ານ ນັນທີ ສົມພະນາ ຮອງເລຂາພັກບ້ານປົວ ປະທານແນວໂຮມບ້ານ ໂດຍເປັນກຽດເຂົ້າຮ່ວມຂອງທ່ານ ຄຳພອນ ອຸດົມສຸກ ກຳມະການພັກແຂວງ ເລຂາພັກເມືອງ ເຈົ້າເມືອງໆພູກູດ, ທ່ານ ດຳດີ ນັນທະວົງ ກຳມະການພັກແຂວງ ປະທານແນວລາວສ້າງຊາດແຂວງ, ທ່ານ ຄຳປ້ານ ແສນສູພັນ ຄະນະປະຈຳການພັກເມືອງ ປະທານແນວລາວສ້າງຊາດເມືອງ, ມີຫົວໜ້າ-ຮອງຫົວໜ້າຫ້ອງການອ້ອມຂ້າງຂອງເມືອງ, ແຂກຖືກເຊີນ, ຜູ້ຊົງຄຸນວຸດທິ, ເຈົ້າກົກ-ເຈົ້າເຫຼົ່າ, ເຖົ້າແກ່ແນວໂຮມຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ໃນພິທີທ່ານ ປະທານແນວໂຮມບ້ານ ຂື້ນກ່າວເປີດພີຢ່າງເປັນທາງການ. ຈາກນັ້ນ, ທ່ານທັງຕາງໜ້າໃຫ້ຄະນະຮັບຜິດຊອບຂະບວນການສ້າງຄອບຄົວ ແລະບ້ານສາມັກຄີປອງດອງ ຂຶ້ນຜ່ານບົດສະຫຼູບການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານ ແລະ ທິດທາງແຜນການໃນຕໍ່ໜ້າ. ທ່ານໄດ້ຍົກໃຫ້ເຫັນເຖີງ ພາຍຫຼັງທີ່ໄດ້ຮັບຄຳແນະຈາກສະບັບເລກທີ່033/ຄປຈ, ສນຊ ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງສູນກາງແນວລາວສ້າງຊາດວາງອອກ, ຄະນະພັກ-ອຳນາດການປົກຄອງບ້ານ, ໄດ້ນຳມາເຜີຍແຜ່ຈັດຕັ້ງປະຕິບັດ, ເຊື່ອມ, ໃຫ້ພໍ່ແມ່ປະຊາຊົນມີຄວາມຮັກແພງ, ຊ່ວຍເຫຼືອເຊີ່ງກັນ ແລະ ກັນ, ຮັກສາມູນເຊື້ອອັນດີງາມຂອງເຜົ່າ ພ້ອມກັນຈັດຕັ້ງປະຕິບັດໜ້າວຽກທີ່ຖືກມອບໝາຍ ໄດ້ຮັບຜົນສຳເລັດຜົນເວົ້າລວມເວົ້າສະເພາະແມ່ນປະຕິບັດຂໍ້ແຂ່ງຂັນການສ້າງຄອບຄົວ ແລະ ບ້ານສາມັກຄີປອງດອງ ຢ່າງເປັນຂະບວນການຝົດຝື້ນ. ບ້ານ ປົວ ລວມມີ 77 ຄອບຄົວ ຜ່ານການປະເມີນຕາມມາດຖານການສ້າງຄອບຄົວ ແລະບ້ານສາມັກຄີປອງດອງທີ່ສູນກາງແນວລາວສ້າງຊາດວາງອອກໄດ້76 ຄອບຄົວ ເທົ່າກັບ99%.

ຈາກນັ້ນ, ໄດ້ຜ່ານຂໍຕົກລົງຂອງທ່ານເຈົ້າເມືອງ ແລະ ເຈົ້າແຂວງ ວ່າດ້ວຍການຮັບຮອງເອົາຄອບຄົວສາມັກຄີປອງດອງ ແລະ ບ້ານສາມັກຄີປອງດອງ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ ແລະຄອບຄົວຜ່ານການຮັບຮອງ. ໂດຍການເປັນກຽດຂຶ້ນມອບໂດຍທ່ານ ທ່ານ ຄຳພອນ ອຸດົມ ແລະ ທ່ານ ດຳດີ ນັນທະວົງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງທ່ານ ປະທານແນວລາວສ້າງຊາດແຂວງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງເມືອງເວົ້້າເວົ້າສະເພາະກໍ່ແມ່ນຂອງບ້ານປົວ ທີ່ໄດ້ພ້ອມພຽງ ສາມັກຄີກັນຍາດມາໄດ້ ແລະປະກາດເປັນຄອບຄົວ ແລະ ບ້ານສາມັກຄີວຊາດຂອງແນວລາວໃນຄັ້ງນີ້.

ຈາກນັ້ນ, ທ່ານ ໄດ້ຍົກໃຫ້ເຫັນເຖິງປະຫວັດຄວາມສາມັກຄີໃນໄລຍະແຫ່ງການຕໍ່ສູ້ກູ້ຊາດ, ຕ້ານພວກລ່າເມືອງຂື້ນໃນເມື່ອກ່ອນຈົນເຖີງປັດຈຸບັນ, ຄຽງຄູ່ກັນນັ້ນທ່ານຍັງໄດ້ຮຽກຮ້ອງໃຫ້ ຄະນະພັກອຳນາດການປົກຄອງບ້ານ-ຊາວບ້ານ ຈົ່ງພ້ອມກັນຮັກສານາມະຍົດນີ້ໃຫ້ຢືນຍົງຕະຫຼອດໄປ, ສືບຕໍ່ເສີມສ້າງຄວາມສາມັກຄີບັນດາເຜົ່າໃນທົ່ວປວງຊົນກໍ່ຄືບ້ານອ້ອມຂ້າງ, ເຂົ້າຮ່ວມປະຕິບັດສອງໜ້າທີ່ຍຸດທະສາດ ຄືການປົກປັກຮັກສາ ແລະ ສ້າງສາພັດທະນາປະເທດຊາດ, ມີຄວາມເປັນເອກະພາບຂອງປະຊາຊົນລາວບັນດາເຜົ່າ, ຊັ້ນຄົນ, ສາສະໜາ,ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານ ເຊີ່ງມັນເປັນປັດໃຈໃນການເສີມສ້າງສະຖຽນລະພາບ ແລະ ແກ້ໄຂຄວາມທຸກຍາກ ເພື່ອຄວາມມັ່ງຄັ່ງເຂັ້ມແຂງຂອງຊາດລາວເຮົາໃຫ້ມີຄວາມຈະເລີນຮຸ່ງເຮືອງສີວິໄລ. ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອຜັນນຳໄປຜັນຂະຫຍາຍໃຫ້ກາຍເປັນເມືອງສາມັກຄີປອງດອງໃນຕໍ່ໜ້າ.

Medialaos