ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສາທາລະນະ​ລັດ ປະຊາທິປະ ໄຕ ປະຊາຊົນ​ລາວ ໄດ້ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບຂອງ ທ່ານ ຫ​ງວຽນ ຫງອກ ຖຽນ ລັດຖະ ມົນຕີກະຊວງ​ວັດທະນະທຳ, ກິລາ ແລະ ທ່ອງ​ທ່ຽວ (ວກທ) ສສ ຫວຽດນາມ ພ້ອມ​ດ້ວຍ​ຄະນະ​ໃນ​ວັນ​ທີ 6 ທັນວາ​ຜ່ານ​ມາ ທີ່​ສຳນັກງານ​ນາຍົກລັດຖະມົນຕີ ໃນ​ໂອກາດ​ທີ່​ເດີນທາງ​ມາ​ຢ້ຽມ ຢາມ ແລະ ເຮັດ​ວຽກຢູ່​ ສປປ ລາວ.

ໃນ​ໂອກາດ​ດັ່ງກ່າວ, ທ່ານ ທອງ​ລຸນ ສີ​ສຸ​ລິດ ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຕີ​ລາຄາ​ສູງ​ຕໍ່ ທ່ານ ຫງວຽນ ຫງອກ ຖຽນ ທີ່​ໄດ້​ນຳພາ​ຄະນະ​ເດີນທາງ​ມາ​ຢ້ຽມ ຢາມ ແລະ ເຮັດ​ວຽກ​ຢູ່ ສປປ ລາວ ໃນ​ຄັ້ງ​ນີ້ ຊຶ່ງ​ເປັນ​ການ​ປະກອບສ່ວນ​ອັນ​ສຳຄັນ ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດ ຕະພາບ ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ສປປ ລາວ ແລະ ສສ.ຫວຽດນາມ ໃຫ້​ນັບ​ມື້​ນັບ​ແຕກ​ດອກ​ອອກ​ຜົນ​ຍິ່ງໆ​ຂຶ້ນ ໂດຍ​ສະ​ເພາະແມ່ນການ​ພົວພັນ​ຮ່ວມ​ມື​ສອງ​ຝ່າຍ ລະຫວ່າງ​ກະຊວງ ຖວທ ລາວ ແລະ ກະຊວງ ວກທ ສສ ຫວຽດນາມ ຜ່ານ​ມາ​ໄດ້​ຮັບ​ການ​ເສີມ​ຂະຫຍາຍ ແລະ ປະກອບສ່ວນ​ເຂົ້າ​ໃນ​ການ​ເສີມ​ສ້າງ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ ຊຶ່ງ​ການ​ພົວພັນ​ຮ່ວມ​ມື​ທີ່​ມີ​ມູນເຊື້ອ ລະຫວ່າງ ສອງ​ກະຊວງ​ດັ່ງກ່າວ ໃຫ້​ນັບ​ມື້​ນັບ​ແໜ້ນ​ແຟ້ນ ທັງ​ມີ​ໝາກ​ມີ​ຜົນ​ຕົວ​ຈິງ, ປະກອບສ່ວນ​ເຂົ້າ​ໃນ​ການ​ປັບປຸງ​ຍົກ​ລະດັບ​ຄຸນ​ນະ​ພາບ ແລະ ປະສິດ​ທິ​ຜົນ​ຂອງ​ວຽກ​ງານ​ວັດທະນະທຳ ແລະ ທ່ອງ​ທ່ຽວ​ຂອງ​ສອງ​ປະເທດ​ພວກ​ເຮົາ​ໃຫ້​ນັບ​ມື້​ນັບ​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ.

ໃນ​ໂອກາດ​ດຽວ​ກັນ, ທ່ານ ຫ​ງວຽນ ຫງອກ ຖຽນ ກໍ​ໄດ້​ສະແດງ​ຄວາມ​ຂອບໃຈ ຢ່າງ​ຈິງ​ໃຈ​ມາ​ຍັງ ທ່ານ ທອງ​ລຸນ ສີ​ສຸ​ລິດ ທີ່​ໃຫ້​ກຽດ​ຕ້ອນຮັບ​ອັນ​ອົບ​ອຸ່ນ​ໃນ​ຄັ້ງ​ນີ້, ພ້ອມ​ທັງ​ໄດ້​ແຈ້ງ​ຈຸດປະສົງ​ຂອງ​ການ​ມາ​ຢ້ຽມຢາມ ສປປ ລາວ ໃຫ້​ທ່ານ​ນາຍົກລັດຖະມົນຕີ​ຊາບ​ຕື່ມ​ອີກ.

Medialaos MMD