ງານບຸນນະມັດສະການພຣະທາດອີງຮັງ ປະຈຳປີ 2019 ໄດ້ເປີດການຄົບງັນຢ່າງຄຶກຄື້ນມ່ວນຊື່ນໃນວັນທີ 9 – 11 ທັນວາ 2019 ນີ້ ຢູ່ທີ່ບ້ານທາດອີງຮັງ ນະຄອນໄກສອນ ພົມວິຫານ ແຂວງສະຫວັນນະເຂດ ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ພ້ອມດ້ວຍມວນຊົນ ແລະ ນັກທ່ອງທ່ຽວຈາກພາຍໃນ ແລະ ຕ່າງປະທດເຂົ້າມາທ່ອງທ່ຽວຢ່າງຄັບຄາໜາແໜ້ນ.

ທ່ານ ປອ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ ໄດ້ກ່າວເປີດງານບຸນນະມັດສະການພຣະທາດອີງຮັງ ປະຈຳປີ 2019 ຢ່າງເປັນທາງການວ່າ: ການຈັດງານບຸນນະມັດສະການພະທາດອີງຮັງ ໃນປີນີ້ກໍ່ເພື່ອແນໃສ່ສະເຫຼີມສະຫຼອງ ແລະ ອະນຸລັກຮັກສາອົງພຣະທາດອີງຮັງ ມໍລະດົກແຫ່ງຊາດ ເປັນປູຊະນິຍະສະຖານ ທີ່ເກົ່າແກ່ຍາວນານທາງປະຫວັດສາດ ອົງສັກສິດ ໃຫ້ເປັນທີ່ສັກກະລະບູຊາຂອງຊາວລາວຕະຫຼອດໄປ, ທັງເປັນການເຕົ້າໂຮມຄວາມສາມັກຄີຂອງປວງຊົນບັນດາເຜົ່າ ເປັນການປຸກລະດົມສົ່ງເສີມສິລະປະວັນນະຄະດີ ທີ່ເປັນເອກະລັກຂອງທ້ອງຖິ່ນແຂວງສະຫວັນນະເຂດ ໃຫ້ມີບັນຍາກາດຟົດຟື້ນມ່ວນຊື່ນ ພ້ອມນັ້ນ ກໍ່ຍັງເປັນການສົ່ງເສີມແຫຼ່ງທ່ອງທ່ຽວທາງດ້ານວັດທະນະທໍາຂອງຊາວແຂວງສະຫວັນນະເຂດ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ນັບມື້ນັບເພີ່ມຂຶ້ນຢ່າງບໍ່ຢຸດຢັ້ງ.

ພາຍໃນງານຍັງມີຮ້ານວາງສະແດງສິນຄ້າໂອດັອບ ຈາກພາຍໃນແຂວງ, ຕ່າງແຂວງ ແລະ ຕ່າງປະເທດ ລວມມີ 46 ຮ້ານ, ຮ້ານວາງສະແດງຈໍາໜ່າຍສິນຄ້າ ຈາກບໍລິສັດຫ້າງຮ້ານທັງພາຍໃນ ແລະ ຕ່າງປະເທດ 300 ກວ່າຮ້ານ, ຈັດໃຫ້ມີຂະບວນຟ້ອນປະເພນີຂອງແຂວງສະຫວັນນະເຂດ ເຊິິ່ງປະກອບມີ: ຂະບວນຟ້ອນຈາກໂຮງຮຽນມັດທະຍົມຕົ້ນທາດອີງຮັງ, ໂຮງຮຽນມັດທະຍົມສົມບູນອຸດົມວິໄລ, ໂຮງຮຽນມັດທະຍົມສົມບູນໂພນສິມ, ໂຮງຮຽນວິທະຍາໄລຄູສະຫວັນນະເຂດ ແລະ ຂະບວນຟ້ອນປະເພນີຈາກກຸ່ມບ້ານທີ 1 ຫາກຸ່ມບ້ານທີ 6 ໃນມື້ເປີດງານ ແລະ ໃນຕອນກາງຄືນຂອງວັນທີ 9 – 11 ແມ່ນມີການສະແດງສິລະປະພາຍໃນແຂວງ ແລະ ສິລະປະສຽງແຄນລາວທີ່ມາຈາກນະຄອນຫຼວງວຽງຈັນ, ນອກນັ້ນແລ້ວທາງດ້ານປະເພນີກໍ່ຈະຈັດໃຫ້ມີການແຫ່ປະສາດເຜີ້ງ ໃນຕອນບ່ອຍຂອງວັນທີ 10 ທັນວາ 2019 ນີ້ ແລະ ຕອນເຊົ້າຂອງວັນທີ 11 ທັນວາ 2019 ກໍ່ຈັດໃຫ້ມີພິທີຕັກບາດຖວາຍສັງຄະທານ ຕອນກາງຄືນມີການວຽນທຽນ ຕາມຮີດຄອງປະເພນີທີ່ເຄີຍປະຕິບັດກັນມາໃນທຸກໆປີ.

ພາບ – ຂ່າວ: ອັກສອນສິນ ພົມມະຈັນ
savannakhet Medialaos