ຫຼວງນໍ້າທາປຶກສາຫາລືການເຝົ້າລະວັງ ແລະ ໂຕ້ຕອບພະຍາດອະຫິວາໝູອາຟຣິກາ

0
170

ໃນວັນ 9 ທັນວາ 2019 ຢູ່ທີ່ຫ້ອງປະຊຸມທ້ອງວ່າການແຂວງຫຼວງນໍ້າທາທາງຄະນະສະເພາະກິດຂັ້ນແຂວງຫຼວງນໍ້າທາ, ໄດ້ປືກສາຫາລືກ່ຽວກັບການສະກັດກັ້ນຄວບຄຸມ ແລະ ໂຕ້ຕອບພະຍາດອະຫິວາໝູອາຟຣິກາ, ພາຍໃຕ້ການເປັນປະທານໂດຍ ທ່ານ ຄໍາໄຫຼ ສີປະເສີດ ກໍາມະການປະຈໍາພັກແຂວງ ຮອງເຈົ້າແຂວງໆ
ຫຼວງນໍ້າທາ ຜູ້ຊີ້ນໍາຂົງເຂດເສດຖະກິດ, ທ່ານ ພີມແກ້ວ ທໍາລະສິນ ຮັກສາການຫົວໜ້າພະແນກກະສິກໍາ – ປ່າໄມ້ແຂວງຫຼວງນໍ້າທາ, ມີຄະນະສະເພາະກິດຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພອນພະຈັນ ແກ້ວວິໄລ ຮອງຫົວໜ້າຂະແໜງລ້ຽງສັດ ແລະ ການປະມົງແຂວງຫຼວງນໍ້າທາ ໄດ້ລາຍງານຜົນການຈັດຕັ້ງປະຕິບັດວຽກງານການເຝົ້າລະວັງ ການສະກັດກັ້ນ, ຄວບຄຸມ ແລະ ໂຕ້ຕອບພະຍາດອະຫິວາໝູອາຟຣິກາຢູ່ແຂວງຫຼວງນໍ້າທາໃນໄລຍະ 4 ເດືອນຜ່ານມາ, ເຊີ່ງທ່ານໄດ້ຍົກໃຫ້ເຫັນສະພາບການລະບາດຂອງພະຍາດອະຫິວາໝູອາຟຣິກາແມ່ນພະຍາດທີ່ຕິດຕໍ່ຮ້າຍແຮງສໍາລັບ ໝູ ບ້ານ ແລະ ໝູປ່າ , ໄດ້ເກີດຈາກເຊື້ອໄວລັດທີ່ມີຄວາມທົນທານສູງຕໍ່ສະພາບແວດລ້ອມ, ມີຊີວິດໄດ້ຢູ່ໃນເງື່ອນໄຂທີ່ຄວາມເປັນກົດ
ເປັນດ່າງສູງ, ສາມາດມີຊີວິດຢູ່ໄດ້ໃນຊາກສັດ, ຜະລິດຕະພັນສັດແຊ່ແຂງໄດ້ດົນເຖີງ 15 ປີ ແລະ ສາມາດຖືເຊຶ້ອຢູ່ໃນໂຕມໝູໄດ້ເຖີງ 4 ປີ,ສ່ວນການຕິດຕໍ່ຂອງພະຍາດອະຫິວາໝູອາຟຣິກາສາມາດຕິດຕໍ່ໄດ້ທາງແບບສໍາພັດຈາກໝູທີ່ຕິດເຊື້ອໂດຍກົງ ຫຼື ໂດຍທາງອ້ອມ, ພະຍາດອະຫິວາໝູອາຟຣິການີ້ ບໍ່ສາມາດປີ່ນປົວໃຫ້ຫາຍດີໄດ້ ຍ້ອນຍັງບໍ່ທັນມີຢາປ້ອງກັນ ແລະ ຢາປິ່ນປົວ,ບໍ່ສາມາດຕິດຕໍ່ໃສ່ຄົນແຕ່ເປັນພະຍາດຕິດຕໍ່ຮ້າຍແຮງສໍາລັບໝູທຸກຊະນິດລວມທັງໝູປ່າກໍ່ເປັນພະຍາດນີ້ໄດ້.

ທ່ານ ຍັງກ່າວຕື່ມວ່າ: ຕໍ່ກັບບັນຫາດັ່ງກ່າວທາງຄະນະສະເພາະກິດຂັ້ນແຂວງຫຼວງນໍ້າທາກ່ຽວກັບການສະກັດກັ້ນ, ຄວບຄຸມ ແລະ ຕອບໂຕພະຍາດອະຫິວາໝູອາຟຣິກາກໍ່ໄດ້ເອົາໃຈໃສ່ສະກັດກັ້ນ, ຄວບຄຸມ ແລະ ຕອບໂຕຕໍ່ພະຍາດດັ່ງກ່າວແຕ່ເດືອນ ກໍລະກົດ ຫາ ເດືອນ ພະຈີກ ປີ 2019 ພາຍຫຼັງທີ່ໄດ້ກວດພົບພະຍາດອະຫິວາໝູອາຟຣິກາຄັ້ງທໍາອິດໃນວັນທີ 27 ກໍລະກົດ 2019 ຢູ່ບ້ານ ນາໃໝ່ ແລະ ບ້ານຈອມ ເມືອງສີງແຂວງຫຼວງນໍ້າທາ ຈາກນັ້ນໄດ້ລະບາດອອກສູ່ວົງກວ້າງລວມມີ 33 ບ້ານ, ມີຈໍານວນ 765 ຄອບຄົວລ້ຽງໝູ, ມີໝູລ້ຽງທັງໝົດ 5.692 ໂຕ, ຈໍານວນໝູຕາຍເອງ 5. 202 ໂຕ, ຂ້າທໍາລາຍຖີ້ມມີ 490 ໂຕ, ລວມຈໍານວນໝູຕາຍທັງໝົດ 5.692ໂຕ. ຈາກນັ້ນໄລຍະຕໍ່ມາກໍ່ໄດ້ກວດພົບເຊື້ອພະຍາດອະຫິວາໝູອາຟຣິກາ ໃນວັນທີ 11 ຕຸລາ 2019 ຢູ່ບ້ານວຽງທອງເມືອງຫຼວງນໍ້າທາ, ຈາກນັນເຊື້ອພະຍາດອະຫິວາໝູອາຟຣິກາໄດ້ລະບາດອອກສູ່ວົງກ້ວາງລວມມີ 11 ບ້ານ, ມີ 403 ຄອບຄົວທີ່ລ້ຽງໝູ, ມີໝູທັງໝົດ 1.643 ໂຕ, ໝູຕາຍເອງ 576 ໂຕ, ຂ້າທໍາລາຍຖີ້ມ 265 ໂຕ, ລວມໝູຕາຍທັງໝົດ 841 ໂຕ ແລະ ຍັງເຫຼືອໝູທີ່ມີຊີວິດຢູ່ 802 ໂຕ, ເຊີ່ງທົ່ວແຂວງຫຼວງນໍ້າທາມີໝູທັງໝົດ 138.928 ໂຕ, ຕາຍຍ້ອນພະຍາດອະຫິວາໝູອາຟຣິກາ 6.533 ໂຕ.
ຈາກນັ້ນຄະນະສະເພາະກິດຂັ້ນແຂວງ ແລະ ບັນດາທ່ານທີ່ເຂົ້າຮ່ວມກໍ່ໄດ້ມີຄໍາຄິດຄໍາເຫັນປືກສາຫາລືຮ່ວມກັນ ແລະ ວາງແຜນການຕໍ່ໜ້າໃນການສືບຕໍ່ເຝົ້າລະວັງ ແລະ ໂຕ້ຕອບພະຍາດອະຫິວາໝູອາຟຣິກາເປັນຕົ້ນແມ່ນ ສືບຕໍ່ລົງໂຕສະນາເຜີຍແຜ່ໃຫ້ຄວາມຮູ້ກ່ຽວກັບວິທີປ້ອງກັນ, ການຄວບຄຸມ ແລະ ການໂຕ້
ຕອບພະຍາດອະຫິວາໝູອາຟຣິກາໃຫ້ແກ່ປະຊາຊົນຢູ່ຕາມບ້ານທີ່ມີຄວາມສ່ຽງ,ໃຫ້ເຈົ້າຂອງສັດເຝົ້າລະວັງຢ່າງໃກ້ສິດຫາກພົບເຫັນໝູເຫງົາ ຫຼື ຕາຍໃຫ້ຮີບລາຍງານຫ້ອງການກະສິກໍາ ແລະ ປ່າໄມ້ເມືອງ ຫຼື ສະຖານີບໍລິການເຕັກນິກກະສິກໍາ-ປ່າໄມ້, ສືບຕໍ່ເກັບຕົວຢ່າງເລືອດໝູທີ່ເຈັບປ່ວຍ ຫຼື ສົງໄສຕິດເຊື້ອພະຍາດອະຫິວາໝູອາຟຣິກາເພື່ອສົ່ງເຂົ້າຫ້ອງວິໄຈພະຍາດສັດແຫ່ງຊາດ,ຖ້າກໍລະນີມີການລະບາດນໍາໃຊ້ມາດຕະການດ້ານວິຊາການໃນການຕອບໂຕ້ການລະບາດພະຍາດສັດເຊັ່ນ: ມາດຕະການຂ້າທໍາລາຍໝູ, ອານາໄມຂ້າເຊື້ອ, ການຕັ້ງຈຸດດ່ານກວດກາສັດຕະວະແພດຊົ່ວຄາວ ແລະ ອື່ນໆ.

medialaos:ຂ່າວ: ສົມພອນ ຂຸນດາວົງ