ໃນວັນທີ 6 ທັນວາ 2019 ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ, ສະມາຄົມນັກປະພັນລາວ ຈັດພິທີຖະແຫລງຂ່າວ ຜົນການເຂົ້າຮ່ວມພິທີມອບ -ຮັບລາງວັນຊີໄຣ (SEA Write) ປີ 2016-2018 ແລະ ລາງວັນວັນນະກໍາແມ່ນໍ້າຂອງ (MERLA) ປະຈໍາປີ 2019, ໂດຍການເຂົ້າຮ່ວມຂອງ ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ມີສິລະປິນນັກຂຽນ, ນັກປະພັນ ແລະ ສື່ມວນຊົນທຸກຂະແໜງການ ເຂົ້າຮ່ວມ.

ທ່ານ ທອງໃບ ໂພທິສານ ກ່າວວ່າ: ຂໍຊົມເຊີຍນັກປະພັນລາວ ທີ່ໄດ້ລາງວັນມາຄອງ ທັງລາງວັນຊີໄຣ ແມ່ນເປັນລາງວັນ ວັນນະກໍາສ້າງສັນຍອດຢ້ຽມແຫ່ງອາຊຽນ ແລະ ລາງວັນວັນນະກໍາແມ່ນໍ້າຂອງ ແມ່ນລາງວັນສ້າງສາຍພົວພັນມິດຕະພາບ ໃນບັນດາປະເທດແມ່ນ້ຳຂອງ ປະກອບມີ 6 ປະເທດ (ສປປ ລາວ, ຫວຽດນາມ, ກໍາປູເຈຍ, ໄທ, ມຽນມາ ແລະ ສປ ຈີນ). ມາຮອດປັດຈຸບັນນັກປະພັນລາວ ແມ່ນໄດ້ຮັບລາງວັນລະດັບອາຊຽນ ເປັນຈໍານວນຫລາຍ ໂດຍໄດ້ສ້າງຊື່ສຽງ ແລະ ບົດ ບາດໃຫ້ແກ່ປະເທດຊາດ ດ້ານຂຸມຊັບທາງປັນຍາ, ທຸກເລື່ອງ ທຸກບົດ ທີ່ໄດ້ຮັບລາງວັນແມ່ນມີຄວາມໝາຍສໍາຄັນທີ່ສຸດ ແລະ ນັບມື້ເວທີນັກຂຽນຍິ່ງ ມີການແຂ່ງຂັນສູງ ທຸກຄົນກໍເຮັດໜ້າທີ່ອອກມາໄດ້ດີຈົນໄດ້ຮັບລາງວັນ.

ລາງວັນຊີໄຣ (SEA Write) ປີ 2016-2018 ແມ່ນໄດ້ຈັດຂຶ້ນໃນທ້າຍເດືອນພະຈິກ 2019 ທີ່ປະເທດໄທ ໂດຍເປັນການມອບລາງວັນ 3 ປີຊ້ອນ ຄື: ໃນປີ 2016 ແມ່ນ ທ່ານ ສຸບັນ ຫລວງລາດ ໄດ້ຮັບລາງວັນປະເພດບົດກະວີ ຊື່ “ມູນມັງຫລັງມ່ານໝອກ”, ປີ 2017 ແມ່ນ ທ່ານ ສົມໃຈ ຈັນທະວົງ ໄດ້ຮັບລາງວັນປະເພດເລື່ອງສັ້ນຊື່  “ແຫວນຄໍາ” ແລະ ປີ 2018 ແມ່ນ ທ່ານ ນາງ ຜິວລາວັນ ຫລວງວັນນາ ປະເພດເລື່ອງຍາວ ຊື່ “ແທນຄໍາສາລະພາບ”. ສໍາລັບລາງວັນ ວັນນະກໍາແມ່ນໍ້າຂອງ (MERLA) ປະຈໍາປີ 2019 ໄດ້ຈັດຂຶ້ນໃນເດືອນຕຸລາ 2019 ທີ່ປະເທດມຽນມາ ທ່ານ ແສງຈັນ ສຸຂະເສມ ໄດ້ຮັບລາງວັນປະເພດເລື່ອງຍາວຊື່ “ຈຸດຈົບຢູ່ຜາຖີ່” ແລະ ທ່ານ ແສງພູໄຊ ອິນທະວີຄໍາ ໄດ້ຮັບລາງວັນປະເພດບົດກະວີຊື່ “ນັກສູ້ແຫ່ງລຸ່ມແມ່ນໍ້າຂອງ”.

Medialaos MMD