ໃນວັນທີ 10 ທັນວາ 2019 ທີ່ຜ່ານມາ, ເຈົ້າໜ້າທີ່ຕຳຫຼວດ ກອງບັນຊາການ ປກສ ເມືອງອຸທຸມພອນ ແຂວງສະຫວັນນະເຂດ ໄດ້ເຊີນອຳນາດການປົກຄອງບ້ານ 2 ບ້ານຄື: ບ້ານອຸດົມມີໄຊ ແລະ ບ້ານໄຊອຸດົມ ທີ່ຂຶ້ນກັບ ເມືອງອຸທຸມພອນ ພ້ອມດ້ວຍພໍ່-ແມ່ຜູ້ປົກຄອງ ເຂົ້າຮ່ວມສຶກສາອົບຮົມ ກຸ່ມມົ້ວສຸມຫຼິ້ນການພະນັນທີ່ຕ້ອງຫ້າມ (ເກມພະນັນອອນລາຍ) ຈຳນວນ 12 ຄົນ ທີ່ຖືກເຈົ້າໜ້າທີ່ ປກສ ເມືອງ ກັກຕົວໄດ້ ໃນຄັ້ງວັນທີ 29 ພະຈິກ 2019 ທີ່ຜ່ານມາ.

ທ່ານ ວທ ແກ້ວຕາ ໄຊຍະວົງສອນ ເຈົ້າໜ້າທີ່ໜ່ວຍງານຄຸມຂັງຊົ່ວຄາວ ກອງບັນຊາການ ປກສ ເມືອງອຸທຸມພອນ ໄດ້ລາຍງານໃຫ້ຮູ້ວ່າ: ເພື່ອປະຕິບັດຕາມກົດໝາຍ, ແຈ້ງການ ກໍ່ຄືທິດຊີ້ນຳຂອງຂັ້ນເທິງ ເພື່ອແນໃສ່ເຮັດ ໃຫ້ການພະນັນທຸກປະເພດພາຍໃນເມືອງອຸທຸມພອນ ໃຫ້ຫຼຸດໜ້ອຍຖອຍລົງ ດັ່ງນັ້ນໃນວັນທີ 29 ພະຈິກ 2019 ທາງຄະນະຮັບຜິດຊອບເລີກຮື້ການຫຼິ້ນການພະນັນທີ່ຕ້ອງຫ້າມ ຈຶ່ງໄດ້ສົມທົບກັບເຈົ້າໜ້າທີ່ ປກສ ກຸ່ມບ້ານ, ອໍາ ນາດການປົກຄອງບ້ານລົງກວດກາເລີກຮື້ການຫຼິ້ນການພະນັນທີ່ຕ້ອງຫ້າມ (ເກມພະນັນອອນລາຍ) ພານໃນເມືອງ ອຸທຸມພອນ ເຊິ່ງມີ 3 ຈຸດຄື: ຢູ່ບ້ານອຸດົມມີໄຊ ມີ 2 ຈຸດ ແລະ ຢູ່ບ້ານໄຊອຸດົມ ມີ 1 ຈຸດ.

ສາມາດກັກຕົວຜູ້ທີ່ເປີດ ໃຫ້ມີການຫຼິ້ນການພະນັນ, ຜູ້ທີ່ຫຼິ້ນການພະນັນ ແລະ ຢຶດເອົາອຸປະກອນທີ່ເປັນເຄື່ອງຂອງກາງໄດ້ຫຼາຍລາຍການ. ແລະ ເພື່ອເຮັດໃຫ້ຜູ້ຖືກຫາ ໄດ້ຮັບຮູ້ ແລະ ເຊື່ອມຊຶມຕໍ່ແນວທາງນະໂຍບາຍອັນຖືກຕ້ອງຂອງພັກ ແລະ ລະບຽບ ກົດໝາຍຂອງລັດ, ເຂົ້າໃຈເລິກເຊິ່ງຕໍ່ກັບໂທດທີ່ຕົ້ນໄດ້ສ້າງຂຶ້ນ, ເຮັດໃຫ້ພວກເຂົາມີຄວາມຕື່ນຕົວໃນການຝຶກຝົນຫຼໍ່ ຫຼອມ, ດັດສ້າງຕົນເອງດ້ວຍການອອກແຮງງານທຳການຜະລິດ, ຮ່ຳຮຽນ, ຝຶກວິຊາຊີບ, ປ່ຽນແປງແນວຄິດ ແລະ ການກະທຳໃຫ້ກາຍເປັນພົນລະເມືອງດີຂອງສັງຄົມ ທ່ານ ພັຕ ສຸລິເວດ ສີຫາລາດ ຮອງຫົວໜ້າພະແນກຕໍາ ຫຼວດ ກອງບັນຊາການ ປກສ ເມືອງອຸທຸມພອນ ກໍ່ໄດ້ໃຫ້ກຽດນຳພາເຊື່ອມຊື່ມບັນດາເອກະສານທີ່ສຳຄັນເປັນຕົ້ນ: ກົດໝາຍອາຍາ ສະບັບປັບປຸງປີ 2017 ແຫ່ງ ສປປ ລາວ, ແຈ້ງການຂອງທ່ານເຈົ້າແຂວງສະຫວັນນະເຂດ ສະບັບ ເລກທີ 1128/ຈຂ.ສຂ ລົງວັນທີ 12 ມີຖຸນາ 2018 ເລື່ອງ ໃຫ້ແຕ່ງຕັ້ງຄະນະກຳມະການຄຸ້ມຄອງຫວຍພັດທະນາ ຂັ້ນເມືອງ ເພື່ອສະກັດກັ້ນການພະນັນ ແລະ ເລກເຖື່ອນທີ່ຜິດກົດໝາຍ, ແຈ້ງການຂອງກອງບັນຊາການ ປກສ ແຂວງສະຫວັນນະເຂດ ສະບັບເລກທີ 243/ປກສ.ສຂ ລົງວັນທີ 10 ກໍລະກົດ 2018 ເລື່ອງ ໃຫ້ແຕ່ງຕັ້ງຄະນະ ກຳມະການ ເພື່ອສະກັດກັ້ນກ່ຽວກັບຮ້ານເກມອອນລາຍ ແລະ ການທວຍຜົນເຕະບານຕິດພັນກັບການພະນັນທີ່ ບໍ່ໄດ້ຮັບອະນຸຍາດ.

ໃນຕອນທ້າຍ, ທ່ານ ພັທ ສວນ ໄຊຍະລິນ ຮອງຫົວໜ້າກອງບັນຊາການ ປກສ ເມືອງ ກໍຍັງໄດ້ໂອ້ລົມຕໍ່ ພວກມົ້ວສຸມຫຼິ້ນການພະນັນທີ່ຕ້ອງຫ້າມ ຕື່ມອີກ ເຊິ່ງທ່ານກໍໄດ້ເນັ້ນຄືນເຖິງໂທດໄພຂອງມົ້ວສຸມຫຼິ້ນການພະນັນ ເພື່ອເຮັດໃຫ້ພວກກ່ຽວມີຄວາມກິນແໜງແຄງໃຈ, ເບື່ອໜ່າຍຕໍ່ພຶດຕິກຳທີ່ຜ່ານມາຂອງຕົນ, ມີຄວາມຄິດຢາກປ່ຽນ ແປງພຶດຕິກຳດັ່ງກ່າວ ແລ້ວກັບມາເປັນລູກທີ່ດີຂອງພໍ່-ແມ່ ແລະ ເປັນຄົນດີຂອງສັງຄົມໃນຕໍ່ໜ້າ. ນອກຈາກນັ້ນ, ທ່ານຍັງໄດ້ຮຽກຮ້ອງໃຫ້ ອຳນາດການປົກຄອງບ້ານ ຕະຫຼອດຮອດພໍ່-ແມ່ຜູ້ປົກຄອງ ເອົາໃຈໃສ່ຕິດຕາມລູກຫຼານ ຂອງຕົນ ເພື່ອບໍ່ໃຫ້ເຂົາເຈົ້າກັບມາຫຍຸ້ງກ່ຽວກັບການພະນັນ ຄືນອີກ. ຈາກນັ້ນ, ເຈົ້າໜ້າທີ່ ປກສ ເມືອງ ກໍໄດ້ສ້າງບົດບັນທຶກ ເພື່ອເປັນການຜູກມັດໃຫ້ພວກກ່ຽວ ປ່ຽນແປງພຶດຕິກຳທີ່ບໍ່ດີຂອງຕົນ ແລ້ວມອບຄືນໃຫ້ຜູ້ປົກຄອງ ແລະ ອຳນາດການປົກຄອງບ້ານ ນຳໄປສຶກສາອົບຮົບຮົມຕື່ມອີກ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ
savannakhet medialaos