ທ່ານ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະເທດ ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ​ທ່ານ ເຈືອງ ຮ່​ວາ ບິ່ງ ຮອງ​ນາຍົກລັດຖະມົນຕີ ຜູ້​ປະຈຳການ​ລັດຖະບານ ແຫ່ງ ສສ ຫວຽດນາມ ພ້ອມ​ດ້ວຍ​ຄະນະ ໃນ​ວັນ​ທີ 11 ທັນວາ​ນີ້ ທີ່​ທຳ​ນຽບ​ປະທານ​ປະເທດ, ເນື່ອງ​ໃນ​ໂອກາດ​ທີ່​ຄະນະ​ຜູ້​ແທນ​ດັ່ງກ່າວ​ໄດ້​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ສປປ ລາວ ໃນ​ລະຫວ່າງ​ວັນ​ທີ 10-12 ທັນວາ 2019.

ໃນ​ໂອກາດ​ດັ່ງກ່າວ, ທ່ານ ປະທານ​ປະເທດ ໄດ້​ສະແດງ​ຄວາມຕ້ອນຮັບ ແລະ ຕີ​ລາຄາ​ສູງ​ຕໍ່​ ທ່ານ ເຈືອງ ຮ່​ວາ ບິ່ງ ທີ່​ໄດ້​ນຳພາ​ຄະນະ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ສປປ ລາວ ໃນ​ຄັ້ງ​ນີ້ ຊຶ່ງ​ເປັນ​ການ​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ເພີ່ມ​ທະວີ ແລະ ເສີມ​ຂະຫຍາຍ​ມູນເຊື້ອ​ອັນ​ດີງາມ​ແຫ່ງ​ສາຍ​ພົວພັນ​ມິດຕະພາບ ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບ ດ້ານ ລະຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ​-​ຫວຽດນາມ ອ້າຍ​ນ້ອງ ທີ່​ມີ​ມາ​ແຕ່​ດົນ​ນານ ໃຫ້​ນັບ​ມື້​ແໜ້ນ​ແຟ້ນ ຍິ່ງໆ​ຂຶ້ນ.

ໃນ​ໂອກາດ​ດຽວ​ກັນ, ທ່ານ ເຈືອງ ຮ່​ວາ ບິ່ງ ໄດ້​ຕາງໜ້າ​ຄະນະສະແດງ​ຄວາມ​ຂອບໃຈ​ຕໍ່ ທ່ານ ປະທານ​ປະເທດ ທີ່​ໄດ້​ໃຫ້ການ​ຕ້ອນຮັບ​ອັນ​ອົບ​ອຸ່ນ ໃນ​ຄັ້ງ​ນີ້, ພ້ອມ​ທັງ​ແຈ້ງ​ຈຸດປະສົງ​ໃຫ້​ທ່ານ ປະທານ​ປະເທດ​ຮັບ​ຊາບ​ໂດຍ​ສະເພາະ​ແມ່ນ​ການ​ພົບ​ປະ​ສອງ​ຝ່າຍ​ລະຫວ່າງ​ສອງ​ຮອງ​ນາຍົກລັດຖະມົນຕີ ຫວຽດນາມ​-​ລາວ​-​ຫວຽດນາມ​ທີ່​ໄດ້​ຮັບ​ຜົນສຳເລັດ​ຢ່າງ​ຈົບ​ງາມ.

ໃນ​ວັນ​ດຽວ​ກັນ​ທີ່​ສຳ ນັກງານ​ນາຍົກລັດຖະມົນ ຕີ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ກໍ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ຂອງ​ທ່ານ ເຈືອງ ຮ່​ວາ ບິ່ງ ຮອງ​ນາຍົກລັດຖະມົນຕີ ຜູ້​ປະຈຳການ​ລັດຖະບານ ແຫ່ງ ສສ ຫວຽດນາມ ພ້ອມ​ດ້ວຍ​ຄະນະ​ເຊັ່ນ​ດຽວ​ກັນ.

ໃນ​ໂອກາດ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ​ຢູ່ ສປປ ລາວ ​ເທື່ອ​ນີ້ ທ່ານ​ເຈືອງ ຮ່​ວາ ບິ່ງ ພ້ອມ​ຄະນະ​ໄດ້​ເຂົ້າ​ຢ້ຽມ​ຂໍ່າ​ນັບ ທ່ານ ນາງ​ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ທີ່​ຫ້ອງ​ຮັບແຂກ​ສະພາ​ແຫ່ງ​ຊາດ ໃນ​ວັນ​ທີ 10 ທັນວາ, ຈາກ​ນັ້ນ​ຄະນະ​ຜູ້​ແທນ​ ກໍໄດ້​ຢ້ຽມ​ຊົມ​ໂຄງການ​ປຸກ​ສ້າງ ຫໍ​ສະພາ​ແຫ່ງ​ຊາດ​ຫຼັງ​ໃໝ່ ທີ່ ສສ ຫວຽດນາມ​ໃຫ້ການ​ຊ່ວຍ​ເຫຼືອ.

Medialaos MMD