4 ບ້ານຂອງເມືອງຄໍາ ແຂວງຊຽງຂວາງ ໄດ້ຖືກຮັບຮອງປະກາດເປັນບ້ານສາມັກຄີປອງດອງຂອງແນວລາວສ້າງຊາດ

0
127

ໃນຕອນເຊົ້າຂອງວັນທີ12 ທັນວາ 2019 ນີ້ ຢູ່ທີ່ສະໂມສອນບ້ານດອກຄໍາ ເມືອງຄໍາ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາ 4 ບ້ານ ເມືອງຄຳຄື: ບ້ານດອກຄຳ, ບ້ານ ຍຸ້ມຈອງ, ບ້ານ ລາດນົນ ແລະ ບ້ານບານ ເປັນບ້ານສາມັກຄີປອງດອງຂື້ນຢ່າງເປັນທາງການ. ພາຍໃຕ້ການເປັນປະທານຂອງທ່ານ ຄຳຈັນ ວັນນະແສງ ເລຂາພັກບ້ານດອກຄໍາ ໂດຍເປັນກຽດເຂົ້າຮ່ວມພິທີຂອງທ່ານ ດວງໄຊ ທໍ່ຢ່າບຼົ່ງ ຮອງປະທານແນວລາວສ້າງຊາດແຂວງ, ທ່ານ ພົມມາ ເທບທິລາດ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ທ່ານ ສົມຈິດ ສີດາລາ ຫົວໜ້າຫ້ອງວ່າການເມືອງ, ມີບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງຂອງເມືອງ, ກຳມະການແນວເມືອງ, ຄະນະກຸ່ມ, ເລຂາພັກບ້ານ 4 ບ້ານ, ຜູ້ຊົງຄຸນວຸດທິ, ເຈົ້າກົກ-ເຈົ້າເຫຼົ່າ, ເຖົ້າແກ່ແນວໂຮມຕະຫຼອດຮອດພໍ່ແມ່ປະຊາຊົນ 4 ບ້ານຂ້າງເຂົ້າຮ່ວມ.

ໃນພິທີທ່ານ ຄໍາຈັນ ເລຂາພັກບ້ານດອກຄໍາທັງ4 ບ້ານຂື້ນກ່າວເປີດພິທີຢ່າງເປັນທາງການ. ຈາກນັ້ນ, ທ່ານ ທອງຄຳ ສົມພັນສຸກ.ປະທານແນວໂຮມບ້ານ ທັງຕາງໜ້າໃຫ້ຄະນະຮັບຜິດຊອບຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງ 4 ບ້ານຂຶ້ນຜ່ານບົດສະຫຼູບການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ໃນນີ້ໄລຍະຜ່ານມາພາຍຫຼັງທີ່ໄດ້ຮັບຄຳແນະຈາກສະບັບເລກທີ່033/ຄປຈ, ສນຊ ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງສູນກາງແນວລາວສ້າງຊາດ, ຄະນະພັກ-ອຳນາດການປົກຄອງບ້ານທັງ4ບ້ານ ໄດ້ປະສານສົມທົບກັບແນລາວສ້າງຊາດແຂວງ-ເມືອງ, ເອົາໃຈເຊື່ອມຊືມ, ບັນດາແນວທາງນະໂຍບາຍຂອງພັກ-ລັດ, ເຜີຍແຜ່ນິຕິກຳທີ່ກ່ຽວຂ້ອງ ໃຫ້ປະຊາຊົນບັນດາ ເຜົ່າໄດ້ຮັບຮູ້ ແລະ ເຂົ້າໃຈຕໍ່ແນວທາງການປ່ຽນແປງໃໝ່ເປັນຕົ້ນແມ່ນ ຂະບວນການຮັກຊາດ ແລະ ພັດທະນາ, ປຸກລະດົມປະຊາຊົນບັນດາເຜົ່າ, ສຶກສາອົບຮົມການເມືອງແນວຄິດ ໃຫ້ພໍ່ແມ່ປະຊາຊົນມີຄວາມສາມັກຄີຮັກແພງ, ຊ່ວຍເຫຼືອເຊີ່ງກັນ ແລະ ກັນ, ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ ເຮັດໃຫ້ບັນດາໜ້າວຽກທີ່ພັກລັດມອບໝາຍສຳເລັດຜົນ ໂດຍສະເພາະແມ່ນການຈັດຕັ້ງປະຕິບັດຂໍ້ແຂ່ງຂັນຂະບວນການສ້າງຄອບຄົວ ແລະ ບ້ານສາມັກຄີປອງດອງຢ່າງເປັນຂະບວນການ. 4 ບ້ານລວມມີ 469 ຜ່ານຕາມມາດຕະຖານທີ່ສູນກາງແນລາວສ້າງຊາວາງອອກໄດ້460 ເທົ່າກັບ 98%. ຈາກນັ້ນ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ 4 ບ້ານ ແລະຄອບຄົວຜ່ານການຮັບຮອງ. ໂດຍການເປັນກຽດຂຶ້ນມອບໂດຍທ່ານ ທ່ານ ພົມມາ ເທບທິລາດ ແລະ ທ່ານ ດວງໄຊ ທໍ່ຢ່າບຼົ່ງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຈາກທ່ານ ດວງໄຊ ທໍ່ຢ່າບຼົ່ງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງ4ບ້ານທີ່ຍາດມາໄດ້ ແລະ ໄດ້ປະກາດເປັນບ້ານສາມັກຄີໃນຄັ້ງນີ້ ເຊີ່ງທ່ານໄດ້ກ່າວວ່າ: ພິທີມອບ-ຮັບໃບຢັ້ງຢືນຄັ້ງນີ້ເປັນໃບໜ້າທີ່ສຳຄັນຂອງແຂວງຂອງເມືອງເວົ້າລວມ, ເວົ້າສະເພາະກໍ່ແມ່ນຂອງ 4 ບ້ານດັ່ງກ່າວ, ເປັນການປຸກລະ ດົມກຳລັງແຮງທົ່ວປວງຊົນ ເຂົ້າຮ່ວມປະຕິບັດສອງໜ້າທີ່ຍຸດທະສາດ ຄືການປົກປັກຮັກສາ ແລະ ສ້າງສາພັດທະນາປະເທດຊາດ, ເປັນການຫັດແໜ້ນຄວາມສາມັກຄີ, ຄວາມເປັນເອກະພາບຂອງປະຊາຊຊົນລາວບັນດາເຜົ່າ, ຊັ້ນຄົນ, ສາສະໜາ,ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານ ເຊີ່ງມັນເປັນປັດໃຈໃນການເສີມສ້າງສະຖຽນລະພາບ ແລະ ແກ້ໄຂຄວາມທຸກຍາກ ເພື່ອຄວາມມັ່ງຄັ່ງເຂັ້ມແຂງຂອງຊາດລາວເຮົາ ຄຽງຄູ່ກັນນັ້ນທ່ານຍັງໄດ້ຮຽກຮ້ອງໃຫ້ ອຳນາດການປົກຄອງບ້ານ4ບ້ານຕະຫຼອດຮອດພໍ່ແມ່ປະຊາຊົນ, ຈົ່ງພ້ອມກັນຮັກສານາມມະຍົດນີ້ໃຫ້ຍືນຍົງຕະຫຼອດໄປ, ເພີ່ມທະວີຄວາມສາມັກຄີ ຮັກແພງຊ່ວຍເຫຼືອເຊີ່ງກັນແລະກັນກັບບ້ານອ້ອມຂ້າງ, ພ້ອມກັນສ້າງສາເສດຖະກິດຄອບຄົວໃຫ້ມີຄວາມມັ່ງຄັ່ງ, ຫຼຸດພົ້ນອອກຈາກຄວາມທຸກຍາກ, ສືບຕໍ່ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອໃຫ້ບັນລຸຕາມເປົ້າໝາຍທີ່ວາງໄວ້ກໍ່ກ່າວເປັນເມືອງສາມັກຄີໃນຕໍ່ໜ້າ.

ພາບ-ຂ່າວ: ທ ເບ່ຕ່າ ໄຊປັນຍາ( ແນວລາວສ້າງຊາດແຂວງຊຽງຂວາງ).
ລົງຂ່າວ:ສົມພອນ ເທບທິລາດ
medialaos xiengkhouang