ເມືອງທ່າໂທມ ປະກາດຮັບຮອງບ້ານແດນມີໄຊ ເປັນບ້ານວັດທະນະທຳ ແຫ່ງທີ 22

0
533

ພິທີປະກາດຮັບຮອງເອົາບ້ານແດນມີໄຊ ເມືອງທ່າໂທມ ແຂວງໄຊສົມບູນ ເປັນບ້ານວັດທະນະທຳ ແຫ່ງທີ 22 ຂອງເມືອງ ໄດ້ຈັດຂຶ້ນໃນວັນທີ 12 ທັນວາ ນີ້ ທີ່ເດີ່ນສະໂມສອນບ້ານແດນມີໄຊ ໂດຍການເຂົ້າຮ່ວມຂອງທ່ານ ພິມພາ ນິລາວົງ, ເຈົ້າເມືອງທ່າໂທມ, ມີທ່ານ ສຸກສະເຫລີມ ສົມມະນີ, ຮອງເຈົ້າເມືອງທ່າໂທມ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ສົມດາວີ ຄຳເມືອງຄູນ, ຮອງຫົວໜ້າພະແນກ ຖວທ ແຂວງໄຊສົມບູນ, ແລະ ທ່ານ ໄມມູນ ບຸນມີ ນາຍບ້ານໆແດນມີໄຊ, ມີແຂກຖືກເຊີນ, ອຳນາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນພາຍໃນບ້ານ ແລະ ພາກສ່ວນທີກ່ຽວຂ້ອງ ເຂົ້າຮ່ວມ.

ກ່ອນເຂົ້າພິທີ ໄດ້ຮັບຊົມການເດີນສວນສະໜາມກ້ອນກຳລັງຕ່າງໆ ຂອງບ້ານ ຈາກນັ້ນ ທ່ານ ໄມມູນ ບຸນມີ, ນາຍບ້ານແດນມີໄຊ ໄດ້ຂຶ້ນຜ່ານບົດສະຫລຸບການສ້າງບ້ານແດນມີໄຊ ເປັນບ້ານວັດທະນະທຳ ຊຶ່ງບ້ານແດນມີໄຊ ມີເນື້ອທີ່ທັງໝົດ 5.226,5 (ຫ້າພັນສອງຮ້ອຍກວ່າເຮັກຕ່າ), ປະກອບມີ 68 ຄອບຄົວ, ມີ 68 ຫລັງຄາເຮືອນ, ມີພົນລະເມືອງທັງໝົດ 416 ຄົນ, ຍິງ 184 ຄົນ, ມີສອງເຜົ່າອາໄສຢູ່ຮ່ວມກັນ ຄື: ເຜົ່າລາວ ແລະ ເຜົ່າມົ້ງ, ນັບຖືສາສະໜາພຸດ ແລະ ສາສະໜາຜີ, ປະຊາຊົນສ່ວນຫລາຍປະກອບອາຊີບປູກຝັງ-ລ້ຽງສັດ ເປັນອາຊີບຕົ້ນຕໍ ແລະ ຄ້າຂາຍເປັນອາຊີບສຳຮອງ. ຜ່ານການປະເມີນຜົນຂອງຄະນະຮັບຜິດຊອບການສ້າງຄົນ, ຄອບຄົວ ແລະ ບ້ານວັດທະນະທຳຂອງເມືອງ ໂດຍສົມທົບກັບອົງການປົກຄອງບ້ານ ແລະ ພໍ່ແມ່ປະຊາຊົນ ໂດຍອີງໃສ່ 5 ມາດຖານ ເງື່ອນໄຂ ເຫັນວ່າມີເງື່ອນໄຂຄົບຖ້ວນ ສະນັ້ນເມືອງທ່າໂທມ ຈຶ່ງໄດ້ປະກາດຮັບຮອງເອົາບ້ານແດນມີໄຊ ເປັນບ້ານວັດ ທະນະທຳແຫ່ງທີ 56 ຂອງແຂວງ ແລະ ເປັນແຫ່ງທີ 22 ຂອງເມືອງທ່າໂທມ ຢ່າງສົມກຽດ. ຈາກນັ້ນ ໄດ້ທ່ານ ສຸກສະເຫລີມ ສົມມະນີ ຮອງເຈົ້າທ່າໂທມ ໄດ້ມອບໃບຢັ້ງຢືນໃຫ້ນາຍບ້ານບ້ານແດນມີໄຊ ເປັນບ້ານວັດທະນະທໍາ ຢ່າງເປັນທາງການ.
ໂອກາດນີ້ ຍັງໄດ້ຮັບຟັງຄຳໂອ້ລົມຂອງທ່ານ ສຸກສະເຫລີມ ສົມມະນີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ ຂອງການສ້າງບ້ານວັດທະນະທຳ ມັນສະແດງໃຫ້ເຫັນເຖິງຜົນສຳເລັດ ຂອງການສ້າງບຸກຄົນ, ຄອບຄົວ ແລະ ບ້ານວັດທະນະທຳ ໄດ້ບັນລຸໄປຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພ້ອມນີ້ທ່ານໄດ້ຮຽກຮ້ອງໃຫ້ປະຊາຊົນເອົາໃຈໃສ່ ໃນການສ້າງເສດຖະກິດຄອບຄົວ ໂດຍສະເພາະ ແມ່ນການປູກຝັງ-ລ້ຽງສັດ ຜະລິດເປັນສິນຄ້າ ເພື່ອເປັນກຳລັງແຮງໃນການສ້າງບ້ານຂອງຕົນ ໃຫ້ກາຍເປັນບ້ານພັດທະນາໃນອະນາຄົດ ພ້ອມທັງປົກປັກຮັກສານາມມະຍົດບ້ານວັດທະນະທຳ ໃຫ້ຍືນຍົງຕະຫລອດໄປ. ຈາກນັ້ນນຄະນະປະ ທານໄດ້ພ້ອມກັນເຂົ້າຮ່ວມເປີດປ້ານ ແລະ ລັ່ນຄ້ອງ 9 ບາດ ເພື່ອເປັນການຮັບຮອງເອົາບ້ານແດນມີໄຊ ເປັນບ້ານວັດທະນະທຳ ຢ່າງເປັນທາງການ.

ພາບ-ຂ່າວ: ພຸດທະສອນ ເວດສະວົງ
MeediaLaos saysomboun