ກອງປະຊຸມປຶກສາຫາລືແກ້ໄຂເຂດແດນເຊື່ອມຕໍ່ໄດ້ຈັດຂຶ້ນໃນວັນທີ 10-11 ທັນວາ 2019 ຢູ່ທີ່ສະໂມສອນແຂວງສາລະວັນ, ໂດຍການເປັນປະທານຂອງ ທ່ານ ປອ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ, ທ່ານ ບົວທອງ ຄຸນຍອດປັນຍາ ຮອງເລຂາພັກແຂວງ ຮອງເຈົ້າແຂວງໆສາລະວັນ, ໃຫ້ກຽດເຂົ້າຮ່ວມມີທ່ານຫົວໜ້າກົມ, ຮອງກົມທີ່ດິນແຫ່ງຊາດ ກະຊວງພາຍ ແລະ ທ່ານຮອງເຈົ້າແຂວງ, ຫົວໜ້າພະແນກພາຍໃນແຂວງ, ເຈົ້າເມືອງ-ຮອງເຈົ້າເມືອງ ແລະ ກຳລັງປ້ອງກັນຊາດໃນ 5 ແຂວງຄື: ແຂວງສະຫວັນນາເຂດ, ສາລະວັນ, ຈຳປະສັກ, ເຊກອງ ແລະ ອັດຕະປື ເຂົ້າຮ່ວມ.

ທ່ານ ປອ ທອນຈັນ ມະນີໄຊ ຮອງລັດຖະມົນຕີກະຊວງພາຍໃນ ໄດ້ກ່າວຈຸດປະສົງກອງປະຊຸມຄັ້ງນີ້ ໃຫ້ຮູ້ວ່າ: ການປຶກສາຫາລືຄັ້ງນີ້ ແມ່ນສຸດທີ່ມີຄວາມໝາຍຄວາມສຳຄັນ ແລະ ເປັນຄວາມຮັບຜິດຊອບຮ່ວມກັນຂອງທຸກທ່ານທີ່ເຂົ້າຮ່ວມ, ທັງໄດ້ພ້ອມກັນຄົ້ນຄວ້າ, ປຶກສາຫາລືແກ້ໄຂບັນດາຈຸດເຂດສາຍແດນເຊື່ອມຕໍ່ທີ່ຍັງບໍ່ທັນເປັນເອກະພາບກັບຄູ່ແຂວງຮ່ວມກັນ ເຊິ່ງສາມາດແກ້ໄຂນຳກັນໂດຍພື້ນຖານຕາມຄາດໝາຍທີ່ວາງໄວ້, ພ້ອມນັ້ນກໍ່ເຮັດໃຫ້ຄູ່ແຂວງ, ຄູ່ເມືອງ ທີ່ມີເຂດເຊື່ອມຕໍ່ກັນຮູ້ໄດ້ສະພາບບັນຫາບັນດາຈຸດທີ່ຍັງບໍ່ທັນເປັນເອກະພາບກັນ ເພື່ອແລກປ່ຽນຄຳຄິດເຫັນແກ້ໄຂນຳກັນ. ກອງປະຊຸມຄັ້ງນີ້ໄດ້ຜົນສຳເລັດໃນການປຶກສາຫາລື, ແກ້ໄຂບັນຫາເຂດແດນເຊື່ອມຕໍ່ທີ່ຍັງບໍ່ທັນເປັນເອກະພາບກັນຂອງບັນດາຄູ່ແຂວງສຸດທີ່ມີຄວາມໝາຍຄວາມສຳຄັນເຮັດໃຫ້ເຂດແດນການປົກຄອງມີຄວາມຖືກຕ້ອງລະອຽດ, ຊັດເຈນເປັນພື້ນຖານບ່ອນອີງໃຫ້ແກ່ການປົກຄອງທ້ອງຖິ່ນ, ການຄຸ້ມຄອງພົນລະເມືອງ, ການພັດທະນາເສດຖະກິດ-ສັງຄົມ, ວຽກງານປ້ອງການຊາດ-ປ້ອງກັນຄວາມສະຫງົບ ສາມາດສະກັດກັ້ນໄດ້, ການເຄື່ອນໄຫວຂອງກຸ່ມຄົນບໍ່ດີໃນການແບ່ງແຍກຄວາມສາມັກຄີພາຍໃນ, ການຂຸດຄົ້ນຊັບພະຍາກອນທຳມະຊາດ ທີ່ບໍ່ສອດຄ່ອງກັບລະບຽບກົດໝາຍ ແລະປະກົດການຫຍໍ້ທໍ້ອື່ນໆ
ຈາກຜົນສຳເລັດເບື່ອງຕົ້ນໃນການປຶກສາຫາລື ແລະ ແກ້ໄຂເຂດແດນເຊື່ອມຕໍ່ ສິ່ງສຳຄັນອີກອັນໜຶ່ງຄະນະພັກ, ອຳນາດການປົກຄອງທຸກຂັ້ນ ຕ້ອງເພີ້ມທະວີການໂຄສະນາສຶກສາອົບຮົມໃຫ້ທຸກພາກສ່ວນອົງການຈັດຕັ້ງພັກ, ລັດ, ອົງການຈັດຕັ້ງມະຫາຊົນ, ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃຫ້ຮັບຮູ້ເຂົ້າໃຈຄວາມໝາຍຄວາມສຳຄັນຂອງເຂດແດນເຊື່ອມຕໍ່ໃຫ້ຖືກຕ້ອງ ເພື່ອຄຸ້ມຄອງປົກປັກຮັກສາ ແລະ ພັດທະນາເສດຖະກິດ-ສັງຄົມຂອງແຕ່ລະເຂດແຂວງ ໃຫ້ນັບມືມີການພັດທະນາ ແລະເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່ານັບມືນັບດີຂື້ນເລື້ອຍໆ ແລະມອບໃຫ້ພະນັກງານວິຊາການທີ່ກ່ຽວຂ້ອງ ປະສານສົມທົບກັນເພື່ອຮ່າງເປັນບົດບັນທຶກການແກ້ໄຂບັນຫາເຂດຊາຍແດນເຊື່ອມຕໍ່ແຕ່ລະຄູ່ແຂວງຮ່ວມກັນ ລວມທັງບົດພັນລະນາທິດເນັ່ງເສັ້ນເຂດແດນເຊື່ອມຕໍ່, ຍ້າຍເສັ້ນຂະໜານເຊື່ອມຕໍ່ຂື້ນໃສ່ແຜນທີ່ ເພື່ອເປັນເອກະສານເຊັນຮັບຮອງເອົາຢ່າງເປັນທາງການຈາກການນຳຂອງຄູ່ແຂວງ ເພື່ອລາຍງານລັດຖະບານ ແລະສະເໜີສະພາແຫ່ງຊາດຮັບຮອງເອົາໃນຂັ້ນຕອນຕໍ່ໄປ.

ພາບ-ຂ່າວ: ສິດຕາ ເພັດວົງສາ
medialaos salavan