ຫ້ອງວ່າການປະທານປະເທດ ໄດ້ຈັດພິທີ ປາຖະກະຖາ ວັນສໍາຄັນຂອງພັກ-ຂອງຊາດ ຄື: ວັນຊາດທີ 2 ທັນວາ ຄົບຮອບ 44 ປີ, ວັນເກີດຂອງ ປະທານໄກສອນ ພົມວິຫານ ຄົບຮອບ 99 ປີ, ໃນວັນທີ 16 ທັນວາ ນີ້ ທີ່ຫ້ອງປະຊຸມຂອງຫ້ອງວ່າ ການປະທານປະເທດ. ໃຫ້ກຽດປາຖະກະຖາ, ໂດຍ ທ່ານ ຄໍາເມິງ ພົງທະດີ ລັດຖະມົນຕີ, ຫົວໜ້າຫ້ອງວ່າການປະທານປະເທດ.

​ໃນໂອກາດດັ່ງກ່າວ, ທ່ານ ຄໍາເມິງ ພົງທະດີ ໄດ້ຫວນຄືນມູນເຊື້ອ ວັນຊາດ ທີ 2 ທັນວາ 1975 ແມ່ນວັນທີ່ມີຄວາມໝາຍຄວາມສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວ, ທັງແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ເປັນພັນໆປີ ຂອງຊາດລາວ, ແມ່ນວັນທີ່ປະຊາຊົນລາວ ບັນດາເຜົ່າໄດ້ມີ ອິດສະຫລະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ແມ່ນວັນທີ່ປະເທດລາວ ໄດ້ມີເອກະລາດຢ່າງສົມບູນ ແລະ ມີອະທິປະໄຕ ຢ່າງຄົບຖ້ວນ, ມີທີ່ຕັ້ງອັນ ສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, 2 ທັນວາ ແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໃໝ ໃນການສ້າງສາ ພັດ ທະນາສັນຕິພາບ, ເອກະລາດ,ປະ ຊາທິປະໄຕ, ເອກະພາບ ແລະ ວັດທະນາຖາວອນ.

​ໃນພິທີໄດ້ຮັບຟັງການ ບັນລະຍາຍເຖິງວັນເກີດ ປະທານໄກສອນ ພົມວິຫານ ຄົບຮອບ 99 ປີ, ໃຫ້ກຽດບັນລະຍາຍໂດຍ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ, ຮອງຫົວໜ້າຫ້ອງວ່າການປະທານປະເທດ, ໂດຍໄດ້ຍົກໃຫ້ເຫັນຊີວິດ ແລະ ການເຄື່ອນໄຫວປະຕິວັດຂອງປະທານໄກສອນ ພົມ ວິຫານ, ຜົນງານ ແລະ ຄຸນງາມຄວາມດີຂອງປະທານ ປະທານໄກສອນ ພົມວິຫານ, ແມ່ນລູກຮັກຫລານແພງ ຂອງປະຊາຊົນລາວບັນດາເຜົ່າ, ແມ່ນຜູ້ຮັກຊາດ, ນັກປະຕິວັດທີ່ຍິ່ງໃຫຍ່ຂອງຊາດ, ວິລະບູລຸດ, ຜູ້ນໍາຂອງພັກ-ລັດທີ່ປີຊາສາມາດ, ສະຫລາດສ່ອງໃສ ແລະ ສະດຸ້ງໄວ, ທັງເປັນນັກທິດສະດີ ແລະ ພຶດຕິກໍາ, ເປັນນັກປຸກລະດົມຂົນຂວາຍ ແລະ ເປັນນັກ ໂຄສະນາ ປາຖະກະຖາ ທີ່ດີເລີດ, ເປັນນັກຍຸດທະສາດ, ນັກອອກແບບຍຸດໂທບາຍ ແລະ ວິທີປະຕິວັດທີ່ສະຫລາດຄ່ອງແຄ້ວ, ທ່ານ ທັງເປັນສັນຍາລັກ ເປັນແກ່ນສານຂອງ ຄວາມສາມັກຄີພາຍໃນພັກ-ໃນຊາດ ຍາມໃດເພິ່ນກໍເອົາໃຈໃສ່ສ້າງ ແລະ ເພີ່ມທະວີຄວາມສາມັກຄີປອງດອງ ລະຫວ່າງເຜົ່າ ຄວາມເປັນປຶກແຜ່ນ ພາຍໃນຊາດ ແລະ ຄວາມເປັນເອ ກະພາບພາຍໃນພັກ, ເປັນຜູ້ນໍາທີ່ມີຄຸນສົມບັດ ສິນທໍາປະຕິວັດສູງສົ່ງ, ມີທັດສະນະມະ ຫາຊົນກວ້າງຂວາງ, ດຸໝັ່ນ, ດໍາລົງຊີວິດແບບລຽບງ່າຍ, ປະຢັດ ແລະ ບໍລິສຸດປອດໃສ.   

ນອກຈາກຮັບຟັງການ ບັນລະຍາຍເອກະສານ ວັນຊາດທີ 2 ທັນວາ ແລະ ວັນເກີດປະທານໄກສອນ ພົມວິຫານ ແລ້ວ ບັນດາຜູ້ເຂົ້າຮ່ວມຍັງໄດ້ຮັບຟັງ ການອ່ານດໍາລັດວ່າດ້ວຍ ການອະນຸມັດໃຫ້ພະນັກງານອອກ ພັກການຮັບອຸດໜູນບໍານານ, ດໍາລັດ ແລະ ຂໍ້ຕົກລົງວ່າດ້ວຍການແຕ່ງຕັ້ງພະນັກງານ ແລະ ຮັບຟັງການທາບ ທາມບຸກຄະລາກອນ ຄະນະກໍາມະບານ ຊຸດໃໝ່ (ຮອບທີ 1) ຕື່ມອີກ.

Medialaos MMD