ທູດ​ລາວ ຍື່ນ​ສານ​ຕາ​ຕັ້ງ​ຕໍ່​ປະ­ທານ​ປະ­ເທດ ສປ ຈີນ

0
516

ສະຫາຍ ນາງ ຄໍາ​ເພົາ ເອີນ​ທະ​ວັນ ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສປປ ລາວ ປະ​ຈໍາ ສປ ຈີນ ຄົນ​ໃໝ່ ໄດ້​ເຂົ້າ​ຍື່ນ​ສານ​ຕາ​ຕັ້ງຕໍ່ ສະຫາຍ ສີ ຈິ້ນ​ຜິງ ປະທານ​ປະເທດ ສປ ຈີນ ເມື່ອ​ບໍ່​ດົນ​ມາ​ນີ້ ທີ່​ຫໍ​ສະພາ​ປະຊາຊົນ​ແຫ່ງ​ຊາດ​ຈີນ.

ໃນ​ໂອກາດ​ດັ່ງກ່າວ, ສະຫາຍ ສີ ຈິ້ນ​ຜິງ ໄດ້​ສະແດງ​ຄວາມ​ຍິນດີ ແລະ ຊົມເຊີຍ​ການ​ມາ​ດໍາ​ລົງ​ຕໍາ​ແໜ່​ງ​ຂອງ ສະ ຫາຍ ນາງ ຄໍາ​ເພົາ ເອີນ​ທະ​ວັນ ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອໍາ​ນາດ​ເຕັມ ແຫ່ງ ສປປ ລາວ ປະ​ຈໍາ ສປ ຈີນ ຄົນ​ໃໝ່, ຕີ​ລາຄາ​ສູງ​ຕໍ່​ສາຍ​ພົວພັນ​ຄູ່​ຮ່ວມ​ຍຸດທະສາດ​ຮອບດ້ານ ໝັ້ນຄົງ ຍາວ​ນານ ຕາມ​ທິດ 4 ດີ ແລະ ການ​ເປັນ​ຄູ່​ຮ່ວມ​ຊາ​ຕາ​ກໍາ​ລາວ​-​ຈີນ ທີ່​ໄດ້​ຮັບ​ການ​ພັດທະນາ​ຢ່າງຮອບດ້ານ ແລະ ພວມ​ກ້າວ​ສູ່​ລວງ​ເລິກ​ຢ່າງ​ບໍ່​ຢຸດ​ຢັ້ງ, ພ້ອມ​ທັງ ເຊື່ອ​ວ່າ ການ​ມາ​ຮັບ​ໜ້າທີ່​ໃໝ່ຂອງ ສະຫາຍ ນາງ ຄໍາ​ເພົາ ເອີນ​ທະ​ວັນ ຈະ​ເປັນ​ການ​ສືບ​ສານ​ມູນເຊື້ອ ແລະ ປະກອບສ່ວນ​ອັນ​ສໍາ​ຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ລາວ​-​ຈີນ ທີ່​ດີງາມ​ຢູ່​ແລ້ວ ໃຫ້​ສືບຕໍ່​ຂະຫຍາຍຕົວ ແລະ ງອກ​ງາມ​ຍິ່ງ​ຂຶ້ນ. ໃນ​ໂອກາດ​ດັ່ງກ່າວ, ສະຫາຍ ສີ ຈິ້ນ​ຜິງ ໄດ້​ຝາກ​ຄວາມ​ຢ້ຽມຢາມ​ຖາມ​ຂ່າວ​ອັນ​ອົບ​ອຸ່ນ​ຖານ​ສະຫາຍ​ອ້າຍ​ນ້ອງ​ເຖິງ ສະຫາຍ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ.

ສະຫາຍ ນາງ ຄໍາ​ເພົາ ເອີນ​ທະ​ວັນ ໄດ້​ສະແດງ​ຄວາມ​ຂອບໃຈ ແລະ ຈະ​ນໍາ​ເອົາ ຄວາມ​ຢ້ຽມຢາມ​ດັ່ງກ່າວ ໄປ​ຍັງ ສະຫາຍ ບຸນ​ຍັງ ວໍລະ​ຈິດ, ປະທານ​ປະເທດ ແຫ່ງ ສປປ ລາວ ແລະ ເຊື່ອ​ໝັ້ນ​ວ່າ ສາຍ​ພົວພັນ​ຄູ່​ຮ່ວມ​ຍຸດທະສາດ​ຮອບ ດ້ານ ຕາມ​ທິດ 4 ດີ ແລະ ການ​ເປັນ​ຄູ່​ຮ່ວມ​ຊາ​ຕາ​ກໍາ​ລາວ​-​ຈີນ ຈະ​ສືບຕໍ່​ໄດ້​ຮັບ​ການ​ເສີມຂະ ຫຍາຍ ແລະ ກ້າວ​ສູ່​ລວງ​ເລິກ ໃນ​ທຸກ​ຂົງເຂດ​ຢ່າງ​ບໍ່​ຢຸດ​ຢັ້ງ.

ສປປ ລາວ ແລະ ສປ ຈີນ ໄດ້​ສ້າງຕັ້ງ​ສາຍ​ພົວພັນ​ການ​ທູດ​ນໍາ​ກັນ​ໃນ​ວັນ​ທີ 25 ເມສາ 1961, ສອງ​ປະເທດ​ໄດ້​ຍົກ​ລະດັບ​ການ​ພົວພັນ​ມາ​ເປັນ​ຄູ່​ຮ່ວມ​ຍຸດທະສາດ​ຮອບດ້ານ ໃນ​ປີ 2009 ແລະ ສ້າງ​ເປັນ​ຄູ່​ຮ່ວມ​ຊາ​ຕາ​ກໍາ​ລາວ​-​ຈີນ ໃນ​ປີ 2019, ຊຶ່ງ​ໃນ​ຊຸມ​ປີຜ່ານມາ ສອງ​ຝ່າຍ ໄດ້​ສືບຕໍ່​ແລກປ່ຽນ​ການ​ຢ້ຽມຢາມ ຂອງ ຄະນະ​ຜູ້​ແທນ​ຂັ້ນ​ສູງ ແລະ ຂັ້ນ​ຕ່າງໆ ທັງ​ສາຍ​ພັກ, ສາຍ​ລັດ, ອົງການ​ຈັດ​ຕັ້ງ​ມະຫາຊົນ ແລະ ຂະແໜງການ​ທີ່​ກ່ຽວຂ້ອງ​ຕ່າງໆ ນັບ​ແຕ່​ສູນ​ກາງ​ຈົນ​ຮອດ​ທ້ອງຖິ່ນ, ເຮັດ​ໃຫ້​ສອງ​ຝ່າຍ​ມີ​ການ​ໄປມາຫາສູ່​ກັນ​ຢ່າງ​ຕໍ່​ເນື່ອງ, ອັນ​ໄດ້​ເຮັດ​ໃຫ້ການ​ພົວພັນ​ມິດຕະພາບ ອັນ​ເປັນ​ມູນເຊື້ອ​ແບບ​ຄູ່​ຮ່ວມ ​ຍຸດທະສາດ​ຮອບດ້ານໝັ້ນ ຄົງ​ຍາວ​ນານ ຕາມ​ທິດ 4 ດີ ແລະ ການ​ເປັນ​ຄູ່​ຮ່ວມ​ຊາ​ຕາ​ກໍາ ລະຫວ່າງ ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ​ລາວ​-​ຈີນ ສືບຕໍ່​ໄດ້​ຮັບ​ການ​ເສີມ​ຂະຫຍາຍ, ກ້າວ​ສູ່​ລະດັບ​ສູງ​ໃໝ່ ແລະ ເຂົ້າ​ສູ່​ລວງ​ເລິກ​ໃນ​ທຸກ​ຂົງເຂດ​ຢ່າງຮອບດ້ານ ແລະ ມີ​ຊີວິດ​ຊີວາ​ໃນ​ປັດ​ຈຸ​ບັນ.

MMD