ວັນ​ທີ 16 ທັນວານີ້, ກອງ​ປະຊຸມວຽກ​ງານ​ແຜນການ ແລະ ການ​ລົງທຶນ (ຜທ) ປະຈຳ​ປີ 2019 ໄດ້​ເປີດ​ຂຶ້ນທີ່ຫໍ​ປະ ຊຸມ​ແຫ່ງ​ຊາດ ໂດຍ​ການ​ໃຫ້ ກຽດ ​ເປັນ​ປະທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ ຍົກລັດຖະມົນຕີ ລັດຖະມົນຕີ​ກະຊວງ​ແຜນການ ແລະ​ການ​ລົງທຶນ, ມີ​ບັນດາ​ທ່ານ​ຮອງ​ລັດຖະມົນຕີ, ຮອງ​ປະທານ​ອົງການ​ທຽບ​ເທົ່າ​ຂັ້ນ​ສູນ​ກາງ, ຮອງ​ເຈົ້າ​ຄອງ​ນະຄອນຫຼວງ, ຮອງ​ເຈົ້າແຂວງ, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ໂອກາດ​ກ່າວ​ເປີດ​ກອງປະ ຊຸມ​ຄັ້ງ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ຊີ້​ໃຫ້​ເຫັນ​ດ້ານ​ຕັ້ງໜ້າ ແລະ ຜົນສຳເລັດ​ທີ່​ສຳຄັນ​ຫຼາຍ​ດ້ານ​ໃນ​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ ໃນ​ປີ 2019. ແຕ່​ຄຽງ​ຄູ່​ກັບ​ດ້ານ​ດີ ແລະ ດ້ານ​ຕັ້ງໜ້າດັ່ງກ່າວ ທ່ານຮອງ ​ນາຍົກລັດຖະມົນຕີ ລັດຖະ ມົນຕີກະຊວງແຜນການ ແລະ ການ​ລົງທຶນ ໄດ້​ເນັ້ນ​ເຖິງ​ບັນດາ​ຈຸດ​ອ່ອນ​ຂໍ້ຄົງຄ້າງ​ຫຼາຍ​ດ້ານ (ການ​ຈັດ​ສັນໂຄງການການ​ແກ້​ໄຂ​ໜີ້​ສິນ, ການ​ແກ້​ໄຂ​ຜົນ​ການ​ກວດ​ສອບ, ການ​ອຳນວຍ​ຄວາມ​ສະດວກ​ໃນ​ການ​ດຶງ​ດູດ​ການ​ລົງທຶນ ການຈັດຕັ້ງ​ປະຕິບັດ​ການ​ບໍລິການ​ລົງທຶນ​ຜ່ານ​ປະຕູ​ດຽວ ແລະ ບັນຫາ​ອື່ນໆທີ່​ປິ່ນ​ອ້ອມ) ຕາມ​ພາລະ​ບົດບາດ​ຂອງ​ຂະແໜງການ​ຕົນ ຊຶ່ງ​ພວກ​ເຮົາ​ຈະ​ຕ້ອງ​ໄດ້​ພ້ອມ​ກັນ ຕັດສິນ​ໃຈ​ແກ້​ໄຂ ເພື່ອ​ກ້າວ​ໄປ​ສູ່​ການ​ຫັນປ່ຽນ​ໃໝ່ ແລະ ຄຸນ​ນະ​ພາບ​ໃໝ່.

ທ່ານ​ປະທານ​ກອງປະ ຊຸມ​ຍັງ​ໄດ້​ຮຽກຮ້ອງ​ມາ​ຍັງຜູ້​ ແທນ​ກອງ​ປະຊຸມ ຈົ່ງ​ໄດ້​ເອົາ ໃຈໃສ່ສຸມ​ໃສ່​ປຶກສາ​ຫາລື​ປະ ກອບ​ຄຳ​ເຫັນ ຕໍ່​ຮ່າງ​ດຳລັດ ວ່າດ້ວຍ​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ​ປີ 2020 ຂອງ​ທ່ານ ນາຍົກລັດຖະມົນຕີ ແລະ ຮ່າງ ​ບົດ​ແນະ​ນໍາ​ຂອງ​ກະຊວງແຜນ ການ ແລະ ການ​ລົງທຶນ ວ່າ​ດ້ວຍ​ການຈັດຕັ້ງ​ປະຕິບັດ​ດຳ ລັດ​ສະບັບ​ດັ່ງກ່າວ ພ້ອມ​ດ້ວຍ​ບັນດາ​ນິຕິ​ກຳ​ລຸ່ມ​ກົດໝາຍ​ຈຳ ນວນ​ໜຶ່ງ ເພື່ອ​ຄວາມ​ເປັນ​ເອກະ​ພາບ​ນຳ​ກັນ​ກ່ອນ​ຈະ​ລາຍ​ງານ​ຕໍ່​ກອງ​ປະຊຸມ​ລັດຖະບານ​ເປີດ​ກ້​ວາງ​ໃນ​ວັນ​ທີ 18-20 ທັນວາ ທີ່​ຈະ​ມາ​ເຖິງ​ນີ້.

ຈຸດປະສົງ​ຂອງ​ກອງ​ປະ ຊຸມ ແມ່ນ​ເພື່ອ​ສະຫຼຸບ​ຕີ​ລາຄາ​ການຈັດຕັ້ງ​ປະຕິບັດ​ແຜນ​ພັດ ທະນາ​ເສດ​ຖະ​ກິດ​ -​ ສັງຄົມ ປີ 2019 ແລະ ປຶກສາ​ຫາລື​ການຈັດຕັ້ງ​ປະຕິບັດ​ທິດ​ທາງ​ແຜນການ​ໃນ​ປີ 2020 ຂອງ​ຂະແໜງ​ແຜນ​ການ​-​ການ​ລົງ ທຶນ ຊຶ່ງ​ກອງ​ປະຊຸມ​ຄັ້ງ​ນີ້​ແມ່ນ​ສ່ວນ​ໜຶ່ງ​ຂອງ​ກອງ​ປະຊຸມ​ວຽກ​ງານ​ແຜນ​ການ​-​ການ​ເງິນ​ປະຈຳ​ປີ 2019 ທີ່​ຈະ​ເປີດ​ຂຶ້ນ​ຮ່ວມ​ກັນ​ລະຫວ່າງ ກະຊວງ​ແຜນການ ແລະ​ການ​ລົງທຶນ ກັບ ກະຊວງ​ການ​ເງິນ ໃນ​ວັນ​ທີ 17 ທັນວາ 2019 ນີ້.

Medialaos MMD