ສະຫະພັນນັກຮົບເກົ່າ ມີພາລະບົດບາດເປັນເສນາທິການໃຫ້ແກ່ອົງຄະນະພັກ, ອຳນາດການປົກຄອງໃນແຕ່ລະຂັ້ນ ໃນການຂົນຂວາຍ, ເຕົ້າໂຮມຄວາມສາມັກຄີ, ຈັດຕັ້ງ ແລະ ສຶກສາອົບຮົມຖັນແຖວນັກຮົບເກົ່າ ແລະ ປະຊາຊົນບັນດາເຜົ່າ, ຊັ້ນຄົນຕ່າງໆ ໃຫ້ຮັກສາທາດແທ້ມູນເຊື້ອປະຕິວັດອັນດີງາມ, ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກຕົນ, ປະກອບສ່ວນເຂົ້າໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ແລະ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.

ທ່ານ ພັທ ເລກາ ກັນຍາ ປະທານສະຫະພັນນັກຮົບເກົ່າແຂວງຄຳມ່ວນ ໃຫ້ສຳພາດຕໍ່ສື່ມວນຊົນ ໃນການເຄື່ອນໄຫວຈັດຕັ້ງປະຕິບັດຜົນງານ 1 ປີຜ່ານມາວ່າ: ສະຫະພັນນັກຮົບເກົ່າແຂວງຄຳມ່ວນ ມີລະບົບອົງການຈັດຕັ້ງ 3 ຂັ້ນຄື: ມີ 1 ສະຫະພັນຂັ້ນແຂວງ, ມີ 10 ສະຫະພັນຂັ້ນເມືອງ ແລະ ມີ 143 ໜ່ວຍສະຫະພັນຂັ້ນບ້ານ, ມີສະມາຊິກນັກຮົບເກົ່າທັງໝົດ 5.475 ສະຫາຍ, ວຽກງານດ້ານການເມືອງ-ນຳພາແນວຄິດ ໄດ້ນຳເອົາມະຕິ, ຄຳສັ່ງ, ຂໍ້ກຳນົດກົດລະບຽບ, ກົດໝາຍ ແລະ ມູນເຊື້ອວັນສຳຄັນຕ່າງໆ ລົງໄປຈັດຕັ້ງເຜີຍແຜ່ໃນທົ່ວແຂວງໄດ້ 25 ຄັ້ງ, ມີຜູ້ເຂົ້າຮ່ວມທັງໝົດ 3.680 ເທື່ອຄົນ, ໄດ້ລົງເຄື່ອນໄຫວຕິດຕາມ, ກວດກາສະພາບດ້ານແນວຄິດ, ຄວາມຈົງຮັກພັກດີຕໍ່ປະເທດຊາດຂອງຖັນແຖວສະມາຊິກນັກຮົບເກົ່າ, ກວດກາການຈັດຕັ້ງປະຕິບັດບັນດານິຕິກຳຕ່າງໆຂອງສະຫະພັນນັກຮົບເກົ່າແຕ່ລະຂັ້ນ, ປະຕິບັດລະບອບນະໂຍບາຍເລື່ອນຊັ້ນໃຫ້ນາຍ ແລະ ພົນທະຫານ ແລະ ການຍ້ອງຍໍສັນລະເສີນກົມກອງ ແລະ ບຸກຄົນຕ່າງໆ, ການຈັດຕັ້ງປະຕິບັດຂໍ້ແຂ່ງຂັນ 3 ດີ 6 ຮັກສາ ໂດຍສະເພາະຂະບວນການປູກຝັງ-ລ້ຽງສັດ ແນໃສ່ເຮັດໃຫ້ຄອບຄົວສະມາຊິກ ພົ້ນອອກຈາກຄວາມທຸກຍາກ ເຊິ່ງປະຈຸບັນມີຄອບຄົວສະມາຊິກນັກຮົບເກົ່າທີ່ຫຼຸດພົ້ນອອກຈາກຄວາມທຸກຍາກແລ້ວ 5.162 ຄອບຄົວ, ມີຄອບຄົວ 3 ດີ 6 ຮັກສາຈຳນວນ 1.982 ຄອບຄົວ, ຄອບຄົວພັດທະນາ 3.870 ຄອບຄົວ, ຄອບຄົວຕົວແບບ 20 ຄອບຄົວ, ຄອບຄົວວັດທນະທຳ 2.711 ຄອບຄົວ, ຄອບຄົວສາທາລະນະສຸກ 3.014 ຄອບຄົວ ແລະ ຄອບຄົວປອດຄະດີ 3.160 ຄອບຄົວ, ໄດ້ສ້າງຕັ້ງກອງທຶນອານຸສົງເຄາະຊ່ວຍເຫຼືອເຊິ່ງກັນ ແລະ ກັນໃນຂັ້ນແຂວງໄດ້ 1 ກອງທຶນ, ມີສະມາຊິກກອງທຶນທັງໝົດ 217 ສະຫາຍ, ມີທຶນໝູນວຽນຈຳນວນ 759 ລ້ານກວ່າກີບ ໃນນັ້ນປະຕິບັດນະໂຍບາຍໄດ້ 513 ລ້ານກີບ. ປະຈຸບັນຍັງມີທຶນໝູນວຽນຈໍານວນ 224 ລ້ານກີບ, ຢູ່ຂັ້ນໜ່ວຍມີກອງທຶນຊ່ວຍເຫຼືອເຊິ່ງກັນ ແລະ ກັນ ມີທຶນທັງໝົດ 334 ລ້ານກວ່າກີບ ພ້ອມນັ້ນກໍ່ໄດ້ປະຕິບັດນະໂຍບາຍຕໍ່ສະມາຊິກຜູ້ທີ່ເສຍຊີວິດລວມເປັນເງິນ 3 ຕື້ກວ່າກີບ.

ສຳລັບການຫ້າງຫາກະກຽມໃຫ້ແກ່ກອງປະຊຸມໃຫຍ່ຄັ້ງທີ IV ຂອງສະຫະພັນນັກຮົບເກົ່າແຂວງຄຳມ່ວນ ແມ່ນໄດ້ສຳເລັດໃນການຮ່າງດ້ານເນື້ອໃນ ພ້ອມທັງໄດ້ສະເໜີລາຍງານຕໍ່ຂັ້ນເທິງ, ດ້ານການທາບທາມບຸກຄະລາກອນເຂົ້າໃນໂຄງປະກອບແມ່ນໄດ້ປະຕິບັດສຳເລັດແລ້ວ ທາງດ້ານຂະບວນການຕ່າງໆກໍ່ໄດ້ຈັດຕັ້ງປະຕິບັດຢ່າງຕໍ່ເນື່ອງ ແລະ ຄາດວ່າ ກອງປະຊຸມໃຫຍ່ຄັ້ງທີ IV ຂອງສະຫະພັນນັກຮົບເກົ່າແຂວງ ຈະໄດ້ດໍາເນີນຂຶ້ນໃນເດືອນມັງກອນ 2020 ທີ່ຈະມາເຖິງນີ້.