ລາວ-ຝຣັ່ງ ສືບຕໍ່ຮັດແໜ້ນສາຍພົວພັນ

0
406

ໃນວັນທີ 17 ທັນວາ 2019 ທີ່ ປາຣີ ປະເທດຝຣັ່ງ, ທ່ານ ຊັອງ-ອີວ ເລີດຣຽນ ລັດ ຖະມົນຕີ ກະຊວງເອີຣົບ ແລະ ການຕ່າງປະເທດ ແຫ່ງ ສາທາລະນະລັດຝຣັ່ງ ໄດ້ຕ້ອນຮັບ ແລະ ພົບປະກັບ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະ ນະລັດ ປະຊາທິປະໄຕ ປະຊາຊົນລາວ.

ທ່ານ ຊັອງ-ອີວ ເລີດຣຽນ ໄດ້ສະແດງຄວາມຕ້ອນຮັບອັນອົບອຸ່ນ ແລະ ສະແດງຄວາມຂອບໃຈ ຕໍ່ທ່ານລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ທີ່ສະໜັບສະໜູນການສະ ເໜີຂອງປະເທດຝຣັ່ງ ເຂົ້າເປັນຄູ່ຮ່ວມພັດທະນາຂອງອາຊຽນ ແລະ ຍັງໄດ້ກ່າວເຖິງການສະເຫລີມສະ ຫລອງອົງການຝຣັ່ງ ເພື່ອການພັດທະນາ ປະຈຳ ລາວ (AFD) ຄົບຮອບ 25 ປີ. ພ້ອມນີ້, ທ່ານຍັງໄດ້ເນັ້ນໜັກເຖິງການ ໃຫ້ຄວາມສຳຄັນຕໍ່ຄວາມເປັນສູນກາງ ຂອງສະມາຄົມປະຊາ ຊາດອາຊີຕາເວັນອອກສຽງໃຕ້ ຫລື ອາຊຽນ ທີ່ສະແດງອອກຜ່ານຍຸດທະສາດຝຣັ່ງ ກ່ຽວກັບອິນໂດປາຊີຟິກ, ເຊິ່ງເປັນຍຸດທະສາດທີ່ເປີດກວ້າງ ແບບທຸກຝ່າຍມີສ່ວນຮ່ວມ ໃນຍຸດທະສາດດັ່ງກ່າວ ກໍ່ລວມເຖິງ ສປປ ລາວ.

ໃນໂອກາດດັ່ງກ່າວ, ສອງຝ່າຍຍັງໄດ້ປຶກສາຫາລື ກ່ຽວກັບທິດທາງແຜນການຕໍ່ໜ້າໃນການພັດທະນາການຮ່ວມມືດ້ານເສດຖະກິດ ໃຫ້ກ້າວສູ່ລວງເລິກ. ໂດຍສະເພາະ ຂະແໜງການບິນ ແລະ ໄຟຟ້າພະລັງງານນໍ້າ, ຊຶ່ງເປັນຂະແໜງການທີ່ຝຣັ່ງ ໄດ້ປະກອບສ່ວນສ້າງຕົວແບບການພັດທະນາທີ່ແນ່ນອນ ແລະ ຍືນຍົງ ເຊັ່ນ: ເຂື່ອນໄຟຟ້ານໍ້າເທີນ 2 ທີ່ພວກເຮົາຕ້ອງການສືບຕໍ່ ເພີ່ມທະວີການຮ່ວມມື ແບບໃໝ່ທີ່ສ້າງສັນ ໃນຂະແໜງພະລັງງານທົດແທນ.

Medialaos