ກອງປະຊຸມສະຫລຸບຕີລາຄາ ວຽກງານຈັດຕັ້ງ, ກໍ່ສ້າງພັກ-ພະນັກງານ ທົ່ວປະເທດ ປະຈໍາປີ 2019

0
266

ກອງປະຊຸມສະຫລຸບຕີລາຄາ ວຽກງານຈັດຕັ້ງ, ກໍ່ສ້າງພັກ-ພະນັກງານ ທົ່ວປະເທດ ປະຈໍາປີ 2019 ໄດ້ໄຂຂຶ້ນ ໃນລະຫວ່າງວັນທີ 19-20 ທັນວາ 2019 ທີ່ແຂວງ ໄຊຍະບູລີ ໂດຍມີ ທ່ານ ຈັນສີ ໂພສີຄໍາ ຫົວໜ້າຄະນະຈັດຕັ້ງສູນກາງພັກ, ມີທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ມີຫົວໜ້າ, ຮອງຫົວໜ້າຄະນະຈັດຕັ້ງ ບັນດາແຂວງທົ່ວປະເທດ, ເຈົ້າເມືອງ ແລະ ຄະນະຈັດຕັ້ງບັນດາເມືອງ ທົ່ວແຂວງ ໄຊຍະບູລີເຂົ້າຮ່ວມ 200 ກວ່າຄົນ.

ທ່ານ ຈັນສີ ໂພສີຄໍາ ໄດ້ກ່າວໄຂກອງປະຊຸມໂດຍຊີ້ໃຫ້ເຫັນວ່າ: ກອງປະຊຸມຄັ້ງນີ້, ຈະໄດ້ພ້ອມກັນ ສັງເກດຕີລາຄາການຈັດຕັ້ງປະຕິບັດ ມະຕິກອງປະຊຸມວຽກງານຈັດຕັ້ງ ທົ່ວປະເທດ ຄັ້ງທີX ກໍຄື ມະຕິກອງປະຊຸມວຽກງານຈັດຕັ້ງ, ກໍ່ສ້າງພັກພະນັກງານ ທົ່ວປະເທດ ປະຈຳປີ2018ແລະ 2019,ພ້ອມທັງຄົ້ນຄວ້າ ກຳນົດທິດທາງວຽກງານຈຸດສຸມໃນປີ2020;ໃນນີ້ຈະໄດ້ລົງເລິກຕີລາຄາຜົນສຳເລັດໃນການກະກຽມ ແລະ ດຳເນີນກອງປະຊຸມໃຫຍ່ຂັ້ນຮາກຖານພັກ ແລະ ກອງປະຊຸມໃຫຍ່ ອົງຄະນະພັກເມືອງ ບ່ອນທີ່ໄດ້ເຮັດສຳເລັດຜ່ານມາ.ພ້ອມກັນນັ້ນ, ກໍຈະໄດ້ປຶກສາຫາລື ການສືບຕໍ່ກະກຽມ ແລະ ດຳເນີນກອງປະຊຸມໃຫຍ່ຂັ້ນເມືອງທຽບເທົ່າກອງປະຊຸມໃຫຍ່ຂັ້ນແຂວງ– ນະຄອນ ຫລວງ,ກະຊວງອົງການໃນປີ2020 ເພື່ອໃຫ້ຖືກຕ້ອງຕາມເນື້ອໃນຂອງຄຳສັ່ງ04/ຄລສພ ແລະ ບົດແນະນຳ ຂອງຂະແໜງການທີ່ກ່ຽວຂ້ອງຂັ້ນສູນກາງ.

ຈາກນັ້ນ ທ່ານ ວັນໄຊ ພອງສະຫວັນ ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານຮ່າງບົດສະຫລຸບຕີລາຄາ ສະພາບການຈັດຕັ້ງປະຕິບັດ ວຽກງານຈັດຕັ້ງ, ກໍ່ສ້າງພັກ-ພະນັກງານ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງຈາກການປະຕິບັດໜ້າທີ່ ວຽກງານຂອງຄະນະຈັດຕັ້ງທົ່ວປະເທດ ໃນໄລຍະ 1 ປີຜ່ານມາ, ຊຶ່ງໄດ້ຫັນເອົາພະນັກງານ ລົງຊ່ວຍບັນດາເມືອງທົ່ວປະເທດ ເພື່ອນໍາພາ-ຊີ້ນໍາ ກະກຽມກອງປະຊຸມໃຫຍ່ຂັ້ນບ້ານ ແລະ ກອງປະຊຸມອົງຄະນະພັກເມືອງ ທັງ 3 ດ້ານ: ດ້ານຂະບວນການ, ດ້ານເນື້ອໃນ ແລະ ດ້ານບຸກຄະລາກອນ.

ມາຮອດປັດຈຸບັນ ທົ່ວປະເທດໄດ້ສໍາເລັດ ການດໍາເນີນກອງປະຊຸມໃຫຍ່ ຮາກຖານບ້ານ ແລະ ຮາກຖານອ້ອມຂ້າງເມືອງ-ນະຄອນ 98%, ອົງຄະນະພັກເມືອງ-ນະຄອນ ສໍາເລັດ 42 ເມືອງ-ນະ ຄອນ ໃນຈໍານວນ 12 ແຂວງ. ທົ່ວປະເທດ ມີໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນທັງໝົດ 6.375 ໜ່ວຍ, ມີສະມາຊິກພັກທັງໝົດ 329.804 ສະຫາຍ, ຍິງ 82.177 ສະຫາຍ.

Medialaos