ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ (ອພສ) ໄດ້ຈັດກອງປະ ຊຸມຄົບຄະນະ ກຳມະການຂອງຕົນຂຶ້ນ ໃນລະຫວ່າງ ວັນທີ 19-20 ທັນວາ 2019 ເພື່ອສະຫລຸບຜົນ ງານ ການເຄື່ອນໄຫວວຽກງານໃນໄລຍະ 1 ປີ ຜ່ານມາ ແລະ ວາງທິດທາງແຜນການເຄື່ອນໄຫວໃນຕໍ່ໜ້າ, ໂດຍມີ ພະຍອດແກ້ວ ມະຫາສັງຄະສຸທັມມາທິບໍດີ (ມະຫາງ່ອນ ດຳລົງບຸນ) ຣັດຕະນະມະຫາສັງຄະປາໂມກ ປະທານສູນກາງອົງການ ພຸດທະສາສະໜາສຳພັນ ແຫ່ງ ສປປ ລາວ, ມີບັນດາຄະນະກຳມະການສູນກາງ ອພສ ຈາກແຂວງຕ່າງໆ ໃນຂອບເຂດທົ່ວປະເທດ ແລະ ທ່ານ ໄຊສົມພອນ ພົມ ວິຫານ ປະທານສູນກາງແນວລາວສ້າງຊາດ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ຮັບຟັງການລາຍງານຜົນສໍາເລັດ ການຈັດຕັ້ງປະຕິບັດມະຕິກອງປະ ຊຸມໃຫຍ່ ສະໄໝທີ VII ຂອງອົງການພຸດທະສາສະໜາສຳພັນ ແຫ່ງ ສປປ ລາວ ໃນໄລຍະ 1 ປີ ຜ່ານມາ, ພ້ອມທັງສັງເກດຕີລາຄາຄືນ ດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໃນໄລຍະຜ່ານມາ ແລະ ຜ່ານທິດທາງແຜນການເຄື່ອນໄຫວວຽກງານ ຂອງແຕ່ລະກຳມາທິການໃນຕໍ່ໜ້າ ຂອງອົງການພຸດທະສາສະໜາສຳພັນ ແຫ່ງ ສປປ ລາວ ໃນຂອບເຂດທົ່ວປະເທດ.

ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ສະແດງຄວາມຊົມເຊີຍຕໍ່ຜົນງານ ທີ່ ອົງ ການພຸດທະສາສະໜາສຳພັນ ແຫ່ງ ສປປ ລາວ ຍາດມາໄດ້ໃນໄລຍະໜຶ່ງປີຜ່ານມາ ເຊິ່ງເຫັນໄດ້ຜົນງານອັນພົ້ນເດັ່ນຫລາຍດ້ານ ເປັນຕົ້ນ ອພສ ຂັ້ນຕ່າງໆໄດ້ເຄື່ອນໄຫວຕົວຈິງມາແລ້ວນັ້ນມີຜົນງານຢ່າງຫລວງຫລາຍ ໂດຍສະເພາະ ການເຄື່ອນໄຫວຊ່ວຍເຫລືອ ເຄື່ອອຸປະໂພກ-ບໍລິໂພກ ໃຫ້ແກ່ປະ ຊາຊົນບັນດາເຜົ່າ ທີ່ໄດ້ຮັບຜົນກະທົບຈາກໄພທຳມະຊາດ ໃນຂອບເຂດທົ່ວປະເທດ, ຊ່ວຍຜູ້ປະສົບໄພໜາວ, ລົງເຄື່ອນໄຫວຊຸກຍູ້-ປັບປຸງ ກົງຈັກບໍລິຫານງານ ອພສ ຢູ່ບັນດາແຂວງ, ໄດ້ສຳເລັດປັບປຸງທຳມະນູນປົກຄອງສົງ, ສ້າງຕັ້ງກຳມາທິການຕ່າງປະເທດ, ປັບປຸງນິຕິກຳການຄຸ້ມຄອງພາຍໃນ ແລະ ປັບ ປຸງຊັບຊ້ອນໜ້າທີ່ ຂອງບຸກຄະລາກອນສົງຢູ່ຂັ້ນຕ່າງໆ ໃຫ້ມີຄວາມສອດຄ່ອງກັບ ຄວາມຮູ້ຄວາມສາມາດຕົວຈິງ ແລະ ອື່ນໆ.

Medialaos MMD