ອີງຕາມສັນຍາເງິນຊ່ວຍເຫລືອລ້າ ລະຫວ່າງລັດຖະບານ ສປປ ລາວ ແລະ ລັດຖະບານ ສ.ເກົາຫລີ ໂດຍຜ່ານອົງການ Koica ໃນການຊ່ວຍເຫລືອ ແລະ ຟື້ນຟູ ຜູ້ປະສົບໄພຈາກເຫດຄູກັນນໍ້າ ເຂື່ອນເຊປຽນ – ເຊນໍ້ານ້ອຍ ແຕກໃນວັນທີ 23 ກໍລະກົດ 2018, ພະແນກກະສິກຳ ແລະ ປ່າໄມ້ ແຂວງອັດຕະປື ຍິນດີມອບໂຄງການສະໜອງແນວພັນໄກ່, ອຸປະກອນການສ້າງຄອກໄກ່, ອາຫານໄກ່, ແນວພັນປາ, ອ່າງລ້ຽງປາ ແລະ ອາຫານປາ ເຈົ້າຂອງໂຄງການ ໃຫ້ບໍລິສັດເອັສເອັມພີເທຣດດິ້ງ ຈຳກັດຜູ້ດຽວ ເປັນຜູ້ສະໜອງອຸປະກອນ.

ໃນວັນທີ 18 ທັນວາ 2019 ຢູ່ທີ່ສູນພັກຊົ່ວຄາວດົງບາກ ເມືອງສະໜາມໄຊ ແຂວງອັດຕະປື ພະແນກກະສິກຳ ແລະ ປ່າໄມ້ ໄດ້ຈັດພິທີມອບ – ຮັບເຄື່ອງຊ່ວຍເຫລືອລ້າ ຈາກລັດຖະບານ ສ.ເກົາຫລີ ໂດຍຜ່ານອົງການ ກອຍກາ Koica, ກ່າວມອບໂດຍ ທ່ານ ໄຊຍະວົງ ເຮືອງຈະເລີນ ຕາງໜ້າບໍລິສັດ SMP ເທຣດດິ້ງຈຳກັດ, ໃຫ້ກຽດກ່າວຮັບ ໂດຍ ທ່ານ ບູນສຽງ ເທພະກອນ ຫົວໜ້າຫ້ອງ ການກະສິກຳປ່າໄມ້ເມືອງ ໂດຍຊ້ອງໜ້າ ທ່ານ ບຸນເສີດ ເສດທິລາດ ກຳມະການພັກແຂວງ ຫົວໜ້າພະແນກກະສິກຳ-ປ່າໄມ້ແຂວງ, ພ້ອມດ້ວຍ ພາກສ່ວນທີ່ກ້ຽວຂ້ອງ ເຂົ້າຮ່ວມ. ການຊ່ວຍເຫລືອໃນຄັ້ງນີ້, ມີແນວພັນໄກ່, ແນວພັນປາ, ຫົວອາຫານ ແລະ, ອຸປະກອນການສ້າງຄອກໄກ່ ລວມມູນຄ່າປະມານ 1,7 ຕື້ກວ່າກີບ.

ທ່ານ ບຸນເສີດ ເສດທິລາດ ກ່າວວ່າ:  ແຂວງ ອັດຕະປື ຫລາຍບ້ານໄດ້ຖືກຜົນກະທົບ ຈາກເຫດຄູກັນນ້ຳເຊປຽນ – ເຊນ້ໍານ້ອຍແຕກ, ເຊິ່ງໄດ້ສົ່ງຜົນກະທົບເສຍຫາຍຕໍ່ຊີວິດ, ຊັບສິນ, ເນື້ອທີ່ ແລະ ຜົນຜະລິດຂອງປະຊາຊົນ ຢ່າງຫລວງຫລາຍ. ຕໍ່ກັບເຫດການດັ່ງກ່າວ, ເພື່ອເປັນການຟື້ນຟູຊີ ວິດການເປັນຢູ່ຂອງປະຊາຊົນ ເມືອງສະໜາມໄຊ ດ້ວຍການເຮັດການຜະລິດກະສິກຳ ເປັນຕົ້ນ ແມ່ນ ການຟື້ນຟູຊີວິດການເປັນຢູ່ ຂອງປະຊາຊົນດ້ວຍຫລາຍຮູບແບບ ແລະ ການສະໜອງອຸປະກອນອຸປະກອນການສ້າງຄອກໄກ່, ສະໜອງແນວພັນໄກ່, ອາຫານໄກ່, ແນວພັນປາ, ອ່າງລ້ຽງປາ ແລະ ອາຫານປາ ໃຫ້ປະຊາຊົນ. ໃຫ້ປະຊາຊົນຮັກສາຕົ້ນທຶນຂອງການລ້ຽງ ແລະ ຂະຫຍາຍຜົນຜະລິດໃຫ້ເພີ່ມຂຶ້ນ ເພື່ອເຮັດໃຫ້ຊີວິດການເປັນຢູ່ ມີຄວາມຮັບປະກັນໃນດ້ານໂພຊະນາການ ແລະ ສາມາດຂະຫຍາຍເປັນລາຍຮັບເຂົ້າຄອບຄົວ.

Medialaos MMD