ໂດຍ​ຕອບ​ສະໜອງ​ຕາມ​ຄໍາ​ເຊີນ ຂອງ ສະຫາຍ ລີ​ຈ້ານ​ຊູ ກຳມະການ​ຄະນະ​ປະ​ຈໍາ​ກົມ​ການເມືອງ ປະທານ​ສະພາ​ຜູ້​ແທນ​ປະຊາຊົນ​ທົ່ວ​ປະເທດ​ຈີນ, ສະຫາຍ​ນາງ ປານີ ຢາ​ທໍ່​ຕູ້ ກໍາ​ມະ​ການ​ກົມ​ການເມືອງ ປະທານ​ສະພາ​ແຫ່ງ​ຊາດ​ລາວ ພ້ອມ​ດ້ວຍ​ຄະນະ ໄດ້​ເຄື່ອນ​ໄຫວ​ຢ້ຽມຢາມ ແລະ ເຮັດ​ວຽກ ຢູ່ ສປ ຈີນ ຢ່າງ​ເປັນ​ທາງ​ການ​ໃນ​ລະຫວ່າງ​ວັນ​ທີ 16-20 ທັນວາ 2019. ເພື່ອ​ສືບຕໍ່​ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິ​ດຕະ​ພາບ ແລະ ການ​ຮ່ວມ​ມື​ຍຸດທະສາດ​ຮອບດ້ານ ໝັ້ນ​ຄົງ ຍາວ​ນານ ລະຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ​-​ຈີນ ຕາມ​ທິດ 4 ດີ ( ເພື່ອນ​ມິດ​ທີ່​ດີ, ບ້ານ​ໃກ້​ເຮືອນ​ຄຽງ​ທີ່​ດີ, ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ) ແລະ ຈັດ​ຕັ້ງ​ຜັນ​ຂະຫຍາຍ​ແຜນ​ແມ່​ບົດ ວ່າ​ດ້ວຍ​ການ​ສ້າງ​ຄູ່​ຮ່ວມ​ຊາ​ຕາ​ກໍາ​ລາວ​-​ຈີນ ລະ ຫວ່າງ ສະຫາຍ​ເລຂາທິການ​ໃຫຍ່​ພັກ ​ປະຊາຊົນ​ປະຕິວັດ​ລາວ ແລະ ສະ​ຫາຍ​ເລຂາທິ ການ​ໃຫຍ່​ພັກ​ກອມ​ມູ​ນິດ​ຈີນ ທີ່​ໄດ້​ລົງ​ນາມ​ຮ່ວມ​ກັນ​ໃນ​ວັນ​ທີ 30 ເມສາ 2019, ທັງ​ເປັນ​ການ​ປຶກສາ​ຫາລື, ແລກປ່ຽນ​ບົດຮຽນ, ປະສົບ​ການ ແລະ ຊຸກຍູ້​ການ​ຮ່ວມ​ມື ລະຫວ່າງ ສອງ​ອົງການ​ນິຕິບັນຍັດ​ຂອງ​ສອງ​ປະເທດ ໃຫ້​ເປັນ​ຮູບ​ປະ​ທໍາ​ຍິ່ງໆ​ຂຶ້ນ.

ໃນ​ຕອນ​ຄໍ່າ ຂອງ​ວັນ​ທີ 16 ທັນວາ 2019, ສະຫາຍ ນາງ ປານີ ຢາ​ທໍ່​ຕູ້ ແລະ ສະຫາຍ ປ້າຍ​ມ້າ​ສືຫຼິນ ຮອງ​ປະທານ​ສະພາ​ຜູ້​ແທນ​ປະຊາຊົນ​ທົ່ວ​ປະເທດ​ຈີນ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ ທັງ​ຝ່າຍ​ລາວ ແລະ ຝ່າຍ​ຈີນ ໄດ້​ເຂົ້າ​ຮ່ວມ​ພິທີ​ສະຫຼຸບ​ປີ​ທ່ອງ​ທ່ຽວ​ລາວ​-​ຈີນ 2019 ຢູ່​ທີ່​ຫໍ​ວັດ​ທະ​ນະ​ທໍາ​ແຫ່ງ​ຊາດ ແຫ່ງ​ສປ ຈີນ. ໃນ​ພິທີ​ດັ່ງກ່າວ, ສະຫາຍ ກິ​ແກ້ວ ໄຂ​ຄໍາ​ພິທູນ ຄະນະ​ເລຂາທິການ​ສູນ​ກາງ​ພັກ ລັດຖະມົນຕີ​ກະຊວງ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ ແຫ່ງ ສປປ ລາວ ແລະ ສະຫາຍ ຈາງ​ສູ ຮອງ​ລັດຖະມົນຕີ​ກະຊວງ​ຖະແຫຼງ​ຂ່າວ ແລະ ທ່ອງ​ທ່ຽວ ແຫ່ງ​ສປ ຈີນ ໄດ້​ຂຶ້ນ​ຜ່ານ​ບົດ​ສະຫຼຸບ​ລາຍ​ງານ​ບັນດາ​ກິດ​ຈະ​ກໍາ​ການເຄື່ອນໄຫວ​ຕ່າງໆ ທີ່​ຈັດ​ຂຶ້ນ​ ເພື່ອ​ສົ່ງເສີມ​ປີ​ທ່ອງ​​ທ່ຽວ​ລາວ​-​ຈີນ 2019.

ສະຫາຍ ກິ​ແກ້ວ ໄຂ​ຄໍາ ​ພິທູນ ໄດ້​ກ່າວ​ວ່າ: ຈາກ​ການ ຈັດຕັ້ງ​ປະຕິບັດ​ບັນດາ​ກິດ​ຈະ​ກໍາ​ຕ່າງໆ ໃນ​ປີ​ທ່ອງ​ທ່ຽວ​ລາວ​-​ຈີນ 2019 ປັດຈຸ​ບັນ​ເຫັນ​ວ່າ​ນັກ​ທ່ອງ​ທ່ຽວ​ມີ​ທ່າ​ຂະຫຍາຍຕົວ​ນັບ​ມື້​ນັບ​ເພີ່ມ​ຂຶ້ນ ສະເພາະ​ປີ 2019 ຕາມ​ສະຖິຕິ​ໃນ 9 ເດືອນ​ຜ່ານ​ມາ ໂຕ​ເລກ​ນັກ​ທ່ອງ​ທ່ຽວ​ຈີນ​ເຂົ້າ​ມາ​ທ່ອງ​ທ່ຽວ​ລາວ​ມີ​ເຖິງ 756.952 ເທື່ອ​ຄົນ ຄາດ​ວ່າ​ຖ້າ​ລວມ​ທັງ 3 ເດືອນ​ສຸດ​ທ້າຍ​ຂອງ​ໄຕ​ມາດ​ປີ​ນີ້ ຈະ​ບໍ່​ຫຼຸດ 1 ລ້ານ​ເທື່ອ​ຄົນ ຊຶ່ງ​ຈະ​ສາມາດ​ບັນລຸ​ຕາມ​ຄາດໝາຍ​ທີ່​ວາງ​ໄວ້.

ໃນ​ວັນ​ທີ 17 ທັນວາ 2019, ສະຫາຍ​ນາງ ປານີ ຢາ​ທໍ່​ຕູ້ ພ້ອມ​ຄະນະ ໄດ້​ພົບ​ປະ​ສອງ​ຝ່າຍ​ກັບ​ສະຫາຍ ລີ ຈ້ານ​ຊູ ພ້ອມ​ຄະນະ ໂດຍ​ສອງ​ຝ່າຍ ໄດ້​ຮ່ວມ​ກັນ​ຕີ​ລາຄາ​ຄືນ​ການ​ພົວພັນ​ຮ່ວມ​ມື ລະຫວ່າງ​ສອງ​ອົງການ​ນິຕິ​ບັນ​ຍັດ​ນໍາ​ກັນ ຊຶ່ງ​ເຫັນ​ວ່າ​ສອງ​ອົງການ​ນິຕິບັນຍັດ​ຂອງ​ສອງ​ປະເທດ ໄດ້​ພົວພັນ ແລະ ຮ່ວມ​ມື​ກັນ​ຢ່າງ​ເປັນ​ປົກກະຕິ ແລະ ຕໍ່​ເນື່ອງ. ພ້ອມ​ກັນ​ນັ້ນ, ກໍ​ໄດ້​ປຶກສາ​ຫາລື ທິດ​ທາງ​ການ​ພົວພັນ​ຮ່ວມ​ມື​ໃນ​ຕໍ່​ໜ້າ. ໃນ​ນັ້ນ, ສອງ​ຝ່າຍ ໄດ້​ເຫັນ​ດີ​ເປັນ​ເອກະ​ພາບ​ນໍາ​ກັນ​ໃນ​ການ​ສືບ​ຕໍ່​ການ​ແລກປ່ຽນ​ຄະນະ​ຜູ້​ແທນ ລະຫວ່າງ​ສອງ​ສະພາ ໃນ​ລະດັບ​ຕ່າງໆ​ລວມ​ທັງ​ສູນ​ກາງ ແລະ ທ້ອງຖິ່ນ​ຢ່າງ​ເປັນ​ປົກກະຕິ, ການ​ພັດທະນາ​ຊັບພະຍາກອນ​ມະນຸດ​ໃຫ້​ແກ່​ສະພາ​ແຫ່ງ​ຊາດ​ລາວ, ການ​ຍົກ​ລະດັບ​ຄວາມ​ຮູ້​ຄວາມ​ສາມາດ​ທາງ​ດ້ານ​ວິຊາ​ການ ໃຫ້​ແກ່​ສະມາຊິກ​ສະພາ​ແຫ່ງ​ຊາດ, ສະມາຊິກ​ສະພາ​ປະຊາຊົນ​ຂັ້ນ​ແຂວງ ແລະ ບັນດາ​ເສນາ​ທິ​ການ​ຂອງ​ສະພາ​ແຫ່ງ​ຊາດ ແລະ ສຶບ​ຕໍ່ໃຫ້​ການ​ຊ່ວຍເຫຼືອ​ເຊິ່ງ​ກັນ ແລະ ກັນ ໃນ​ເວທີ​ພາກ​ພື້ນ ແລະ ສາ​ກົນ.

ວັນ​ທີ 18 ທັນວາ 2019 ສະຫາຍ​ນາງ ປານີ ຢາ​ທໍ່​ຕູ້ ພ້ອມ​ຄະນະ ໄດ້​ພົບ​ປະ​ສອງ​ຝ່າຍ ກັບ​ສະຫາຍ ຫວາງ​ຢາງ ກໍາ​ມະ​ການ​ຄະນະ​ປະ​ຈໍາ​ກົມ​ການເມືອງ​ສູນ​ກາງ​ພັກ ປະທານ​ສະພາ​ທີ່​ປຶກສາ​ການເມືອງ​ທົ່ວ​ປະເທດ​ຈີນ ແລະ ຄະ​ນະ. ໃນ​ການ​ພົບ​ປະສອງ​ຝ່າຍ​ໄດ້​ຮ່ວມ​ກັນ​ປຶກສາ​ຫາລື​ກ່ຽວ​ກັບ​ການ​ພົວພັນ​ຮ່ວມ​ມື ລະຫວ່າງ​ສອງ​ປະເທດ ໃນ​ໄລຍະ​ຜ່ານ​ມາ, ລວມ​ໄປ​ເຖິງ​ການ​ຊຸກຍູ້​ການ​ຮ່ວມ​ມື ຂອງ​ສອງ​ລັດຖະບານ ໂດຍ​ສະເພາະ ແມ່ນ​ການຈັດຕັ້ງ​ປະຕິບັດ​ບັນດາ​ໂຄງການ​ລົງທຶນ ຂອງ​ວິ​ສາ​ຫະ​ກິດ​ຈີນ ທີ່​ເຂົ້າ​ມາ​ລົງ​ທຶນ​ຢູ່​ລາວ ຊຶ່ງ​ສະພາ​ແຫ່ງ​ຊາດ​ລາວ ໄດ້​ຮັບຮອງ​ເອົາ​ແລ້ວ ເຊັ່ນ: ໂຄງການ​ກໍ່ສ້າງ​ທາງ​ດ່ວນ​ລາວ​-​ຈີນ, ໂຄງການ​ລົດໄຟ​ລາວ​-​ຈີນ ແລະ ໂຄງການ​ພັດທະນາ​ພື້ນຖານ​ໂຄງ​ລ່າງ​ອື່ນໆ ໃຫ້​ໄດ້​ຮັບ​ຜົນ​ສໍາ​ເລັດ​ຕາມ​ແຜນທີ່​ວາງ​ໄວ້, ສະເໜີ​ໃຫ້​ຝ່າຍ​ຈີນ ພິຈາລະນາ​ເພີ່ມ​ໂກ​ຕ້າ ນໍາ​ເຂົ້າ​ສິນຄ້າ​ກະສິກຳ​ຂອງ​ລາວ ເປັນຕົ້ນ​ແມ່ນ ນໍ້າ​ຕານ, ໃບ​ຢາສູບ, ຢາງ​ພາ​ລາ ແລະ ສິນຄ້າ​ອື່ນໆ. ພ້ອມ​ດຽວ​ກັນ​ນີ້, ຝ່າຍ​ລາວ ຍັງ​ໄດ້​ສະແດງ​ຄວາມ​ຂອບໃຈ​ມາ​ຍັງ​ລັດຖະບານ​ຈີນ ທີ່​ໃຫ້ການ​ຊ່ວຍເຫຼືອ​ສ້າງຕັ້ງ​ສູນ​ວິໄຈ​ມາດຕະຖານ​ຢາງພາລາ​ລາວ ຢູ່​ນະຄອນຫຼວງ​ວຽງ​ຈັນ ຊຶ່ງ​ມີ​ປະ​ໂຫຍ​ດສໍາ​ຄັນ​ຫຼາຍ ຕໍ່​ການ​ສ້າງ​ຄວາມ​ເຂັ້ມແຂງ ໃຫ້​ແກ່​ເສດຖະກິດ​ລາວ, ການ​ລຶບລ້າງ​ຄວາມທຸກ​ຍາກ ກໍ​ຄື​ການ​ຢຸດຕິ​ການ​ປູກ​ຝິ່່ນ ແລະ ສະເໜີ​ໃຫ້​ຝ່າຍ​ຈີນ ເພີ່ມ​ໂກ​ຕ້າ​ນໍາ​ເຂົ້າ​ຢາງພາລາຈາກ​ລາວຫຼາຍ​ຂຶ້ນ​ກວ່າ​ເກົ່າ ຊຶ່ງ​ໃນ​ປີຜ່ານມາ, ຝ່າຍ​ຈີນ ໄດ້​ຊື້​ຢາງພາລາ ຈາກ​ລາວ​ໄປ​ແລ້ວ​ຈໍາ​ນວນ 60 ພັນ​ໂຕນ.

ໃນ​ການ​ຢ້ຽມຢາມ ແລະ ເຮັດ​ວຽກ​ຢູ່ ສປ ຈີນ ໃນ​ຄັ້ງ​ນີ້, ສະຫາຍ​ປະທານ​ສະພາ​ແຫ່ງ​ຊາດ​ລາວ ພ້ອມ​ຄະນະ ຍັງ​ໄດ້​ພົບ​ປະ ແລະ​ ແລກປ່ຽນ​ບົດຮຽນ ກັບ​ສະພາ​ປະຊາຊົນ​ແຂວງ​ອານ​ຮຸຍ ສປ ຈີນ ກ່ຽວ​ກັບ​ການຈັດຕັ້ງ​ປະຕິບັດ​ພາລະ​ບົດບາດ ຂອງ​ສະພາ​ປະຊາຊົນ​ຂັ້ນ​ແຂວງ (ສະພາ​ທ້ອງຖິ່ນ), ການ​ລຶບລ້າງ​ຄວາມທຸກ​ຍາກ​ຂອງ​ປະຊາຊົນ ແລະ ນະໂຍບາຍ​ອະ​ສັງ​ຫາ​ລິ​ມາ​ຊັບ ຢູ່​ແຂວງ​ອານ​ຮຸຍ ຊຶ່ງ​ມີ​ທ່າແຮງ​ທາງ​ດ້ານ​​ອຸດ​ສາຫະ​ກຳ, ພະລັງງານ, ບໍ່​ແຮ່ ແລະ ການທ່ອງທ່ຽວ ທີ່​ນຳ​ມາ​ພັດທະນາ​ແຂວງ ໃຫ້​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ.

Medialaos