ໃນວັນທີ 20 ທັນວາ 2019 ສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ) ຮ່ວມກັບ ອົງການກາແດງລາວ ໄດ້ສ້າງຂະບວນການບໍລິຈາກເລືອດ ເພື່ອສະເຫລີມສະຫລອງ ວັນ ຊາດທີ 2 ທັນວາ (2/12/1975-2/12/2019) ຄົບຮອບ 44 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານ (13/12/1920-13/12/2019) ຄົບຮອບ 99 ປີ ຂຶ້ນຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ, ໂດຍການເຂົ້າຮ່ວມຂອງ ທ່ານ ບີຢ່າ ຢ່າທໍ່ຕູ້ ຄະນະນໍາ ສຊປລ, ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ, ມີບັນດາພະນັກງານ, ນັກຮຽນ-ນັກສຶກສາ ແລະ ມວນຊົນເຂົ້າຮ່ວມຢ່າງຫລວງຫລາຍ.

ໃນໂອກາດດັ່ງກ່າວ, ທ່ານຮອງຫົວໜ້າກົມ ຂະບວນການຊາວໜຸ່ມ ສຊປລ ໄດ້ກ່າວວ່າ: ກິດຈະກໍາບໍລິຈາກເລືອດໃນຄັ້ງນີ້, ເປັນການສ້າງຂະບວນການກິດຈະກໍາ ເພື່ອຊົມເຊີຍສອງວັນສໍາຄັນດັ່ງກ່າວ, ທັງເປັນການຈັດຕັ້ງຜັນຂະຫຍາຍ ແຜນພັດທະນາ ເສດຖະກິດ-ສັງຄົມແຫ່ງຊາດ ທີ່ຕິດພັນກັບການຈັດຕັ້ງປະຕິບັດ 7 ແຜນງານ, 40 ໂຄງການ ທີ່ຮັບຮອງໃນກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VII (2016-2020), ໂດຍສະເພາະ ໂຄງການປູກຈິດສໍານຶກ ແລະ ໂຄງການໃຫ້ ຄໍາປຶກສາ ເພື່ອປົກປ້ອງສິດ ແລະ ຜົນປະໂຫຍດອັນຊອບທໍາ ຂອງຊາວໜຸ່ມ-ເຍົາວະຊົນ ແລະ ເປັນອີກກິດຈະກໍາໜຶ່ງ ຂອງບຸນມະໂຫລານຊາວໜຸ່ມ ທີ່ຈະຈັດຂຶ້ນໃນຕົ້ນປີ 2020.

ດັ່ງທີ່ຮູ້ນໍາກັນແລ້ວວ່າ ເລືອດມີຄວາມສໍາຄັນ ແລະ ຈໍາເປັນທີ່ສຸດຕໍ່ມະນຸດ, ຊຶ່ງໃນປັດຈຸບັນຍັງມີຫລາຍຊີວິດຢູ່ໃນໂລກ. ເວົ້າລວມ,  ເວົ້າສະເພາະ ກໍແມ່ນຢູ່ ປະເທດລາວເຮົາ ທີ່ຈໍາເປັນຕ້ອງອາໄສການໃສ່ເລືອດ ເພື່ອຄວາມຢູ່ຫລອດຂອງຊີວິດ, ເມື່ອເປັນເຊັ່ນນັ້ນ ການປຸກລະດົມການບໍລິຈາກເລືອດແບບສະໝັກໃຈ ໂດຍບໍ່ ຮຽກຮ້ອງຜົນຕອບແທນ ເປັນຂະບວນການບໍລິຈາກເລືອດ ທີ່ເຕັມໄປດ້ວຍຄວາມເອື້ອອາທອນ ແລະ ເປັນບຸນກຸສົນອັນຍິ່ງໃຫຍ່ ຂອງຊາວໜຸ່ມ ທີ່ມີບົດບາດ ແລະ ຄວາມສໍາຄັນຕໍ່ສັງຄົມ ເພື່ອຊ່ວຍເຫລືອເພື່ອນມະນຸດດ້ວຍກັນ. ຕາມສະຖິຕິການບໍລິຈາກເລືອດ ໃນໄລຍະຜ່ານມາ ເຫັນວ່າມີອາສາສະໝັກຊາວໜຸ່ມ ແມ່ນເປັນກໍາລັງແຮງ ໃນການບໍລິຈາກເລືອດ ທີ່ກວມເອົາຫລາຍກວ່າເຄິ່ງໜຶ່ງ ຂອງການບໍລິຈາກເລືອດແຫ່ງຊາດໃນແຕ່ລະປີ.

Medialaos MMD