ສຸມໃສ່ແກ້ໄຂຄວາມທຸກຍາກ ຢູ່ 10 ແຂວງ 43 ເມືອງ ໃນຂອບເຂດທົ່ວປະເທດ

0
498

ໃນ​ວັນ​ທີ 20 ທັນ​ວາ 2019 ທີ່​ໂຮງ​ແຮມ​ວຽງ​ຈັນ​ພ​ລາ​ຊາ ນະ​ຄອ​ນ​ຫລວງວຽງ​ຈັນ, ໄດ້​ມີ​ກອງ​ປະ​ຊຸມປຶກ​ສາ​ຫາ​ລື​ຮ່າງ​ບົດ​ຫລຸບ​ປະ​ຈຳ​ປີ ແລະ ຮ່າງ​ທິດ​ທາງ​ຕໍ່​ໜ້າ ເພື່ອ​ກະ​ກຽມ​ໃຫ້​ແກ້ກອງ​ປະ​ຊຸມ​ສະ​ພາ​ບໍ​ລິ​ຫານ​ກອງ​ທຶນ​ ຫລຸດ​ຜ່ອນ​ຄວາມ​ທຸກ​ຍາກ ຄັ້ງ​ທີ 25 ໂດຍ​ການ​ເປັນ​ປະ​ທານ​ຂອງ​ ທ່ານ ຈິດ​ ທະ​ວີ​ໃສ ຜູ້​ອຳ​ນວຍ​ການ​ບໍ​ລິ​ຫານກອງ​ທຶນ​ ຫລຸດ​ຜ່ອນ​ຄວາມ​ທຸກ​ຍາກ (ທ​ລຍ) ມີ​ບັນ​ດາ​ຂະ​ແໜງ​ການ ແລະ ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ໃນ​ໂອ​ກາດ​ດັ່ງ​ກ່າວ, ທ່ານ ຈິດ​ ທະ​ວີ​ໃສ ໄດ້​ກ່າວ​ວ່າ: ມາ​ຮອດ​ປັດ​ຈຸ​ບັນ ໂຄງ​ການກອງ​ທຶນ​ຫລຸດ​ຜ່ອນ​ຄວາມ​ທຸກ​ຍາກ ໄລ​ຍະ 3 ທີ່ປະ​ຕິ​ບັດ​ໃນ ​ປີ 2017 ແມ່ນ​ຈະ​ສິ້ນ​ສຸດ​ລົງ​ໃນ​ທ້າຍ​ປີ​ນີ້ ແຕ່​ລັດ​ຖະ​ບານ​ໄດ້​ສືບ​ຕໍ່​ ໃຫ້​ການ​ສະ​ໜັບ​ສະ​ໜູນ ຈາກ​ທະ​ນາ​ຄານ​ໂລກ ສົມ​ທົບ​ໃສ່​ກັບ​ການ​ສືບ​ຕໍ່​ ໃຫ້​ການ​ຊ່ວຍ​ເຫລືອ ແລະ ສົມ​ທົບ​ກັບ​ລັດ​ຖະ​ບານ ເຮັດ​ໃຫ້​ກອງ​ທຶນ​ຫລຸດ​ຜ່ອນ​ຄວາມ​ທຸກ​ຍາກ ໄດ້​ສືບ​ຕໍ່​ຈັດ​ຕັ້ງ​ປະ​ຕິ​ບັດ ຢູ່ 10 ແຂວງ 43 ເມືອງ ພາຍ​ໃຕ້​ການ​ປ່​ຽນ​ແປງ​ຫລາຍ​ດ້ານ ເປັນ​ຕົ້​ນ​ແມ່ນ​ ກິດ​ຈະ​ກຳ​ຕົ້ນ​ຕໍຈະ​ສຸມ​ໃສ່​ຄ້ຳ​ປະ​ກັນ​ສະ​ບຽງ​ອາ​ຫານ, ສົ່ງ​ເສີມ​ການ​ຜະ​ລິດ​ເປັນ​ສິນ​ຄ້າ, ສ້າງ​ລາຍ​ຮັບ​ໃຫ້​ຄອບ​ຄົວ, ແກ້​ໄຂ​ບັນ​ຫາ​ໂພ​ຊະ​ນາການ ແລະ ຄວາມ​ທຸກ​ຍາກ, ສົມ​ທົບ​ໃສ່​ການ​ສືບ​ຕໍ່​ກໍ່​ສ້າງ​ ໂຄງ​ລ່າງ​ຂະ​ໜາດ​ນ້ອຍ ແລະ ການ​ສ້າງ​ຄວາມ​ເຂັ້ມ​ແຂງ​ໃຫ້​ຊຸມ​ຊົນ ທາງ​ດ້ານ​ກົງ​ຈັກ, ໄດ້​ມີ​ການ​ປັບ​ປຸງ​ຕາມ​ທິດມອບ​ ໃຫ້​ຂະ​ແໜງ​ກະ​ສິ​ກຳ ແລະ ປ່າ​ໄມ້ ຢູ່​ແຂວງ ແລະ ເມືອງ​ຮັ​ບ​ຜິດ​ຊອບ, ຊີ້​ນຳ​ບັນ​ຊາ​ຄຸ້ມ​ຄອງກອງ​ທຶນ ​ຫລຸດ​ຜ່ອນ​ຄວາມ​ທຸກ​ຍາກ ຢູ່​ທ້ອງ​ຖິ່ນ, ຮັບ​ປະ​ກັນ​ການ​ຈັດ​ຕັ້ງ​ປະ​ຕິ​ບັດ ທີ່​ເປັນ​ເອ​ກະ​ພາບ​ລວງ​ດຽວກັນ, ພ້ອ​ມ​ທັງ​ເນັ້ນ​ໃສ່​ການ​ສ້າງ​ເມືອງ​ ເປັນ​ຫົວ​ໜ່ວຍ​ເຂັ້​ມ​ແຂງ​ຮອບ​ດ້ານ ຕາມ​ທິດ​ສາມ​ສ້າງ ແລະ ເນັ້ນ​ໃສ່​ສ້າງ​ໃຫ້​ຊາວ​ຊົນ​ນະ​ບົດ ເປັນ​ເຈົ້າ​ຊົນ​ນະ​ບົດ​ຢ່າງ​ແທ້​ຈິງ ຕາມ​ຫລັກ​ການ​ ຂອງ​ການ​ພັດ​ທະ​ນາໂດຍ​ຊຸມ​ຊົນ​ເປັນ​ເຈົ້າ.

​ພ້ອມ​ນີ້, ທ່ານ ຈິດ ທະ​ວີ​ໃສ ຍັງ​ໃຫ້​ຮູ້​ຕື່ມ​ວ່າ: ກອງ​ທຶນ​ຫລຸດ​ຜ່ອນ​ຄວາມ​ທຸກ​ຍາກ (ທ​ລຍ) ແມ່ນ​ເຄື່ອງ​ມື​ໜຶ່ງ ​ທີ່​ສຳ​ຄັນ​ຂອງ​ລັດ​ຖະ​ບານ​ເຮົາ ໃນ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ​ ພັດ​ທະ​ນາ​ຊົນ​ນະ​ບົດ  ລຶບ​ລ້າງ​ຄວາມ​ທຸກ​ຍາກ ໃນ​ຕະ​ຫລອດ​ໄລ​ຍະ 16 ປີ​ຜ່ານ​ມາ ແຕ່​ປີ 2003-2019 ໂດຍ​ໄດ້​ຮັບ​ການ​ສະ​ໜັບ​ສະ​ໜູນ​ຊ່ວຍ​ເຫລືອ ຈາກ​ສະ​ຖາ​ບັນ​ການ​ເງິນ​ສາ​ກົນ ແລະ ຜູ້​ໃຫ້​ທຶນ​ອື່ນໆ ສົມ​ທົບ​ໃສ່​ງົບ​ປະ​ມານ​ຂອງ​ລັດ ລົງ​ສ້າງ​ໂຄງ​ລ່າງ​ພື້ນ​ຖານ ​ສິ່ງ​ອຳ​ນວຍ​ຄວາມ​ສະ​ດວກ​ຂະ​ໜາດ​ນ້ອຍ ຢູ່​ເຂດ​ຊົນ​ນະ​ບົດ​ຫ່າງ​ໄກ​ສອກ​ຫລີກ ແລະ ສ້າງ​ຄວາມ​ເຂັ້ມ​ແຂງ ໃຫ້​ແກ່​ຮາກ​ຖານ​ຊຸມ​ຊົນ.

Medialaos MMD