ກອງປະຊຸມໃຫຍ່ຄັ້ງທີ່ 11 ຂອງອົງຄະນະພັກ ເມືອງວຽງໄຊ ແຂວງຫົວພັນໄດ້ໄຂຂື້ນຢ່າງເປັນທາງການ ໃນຕອນເຊົ້າ ວັນທີ່ 23 ທັນວາ 2019 ນີ້ ຢູ່ທີ່ຫໍວັດທະນະທຳຂອງເມືອງ ໂດຍການເປັນປະທານຂອງ ສະຫາຍ ພອນສຸກ ອິນທະວົງ ເລຂາຄະນະບໍລິຫານງານພັກເມືອງ, ເປັນກຽດເຂົ້າຮ່ວມຂອງສະຫາຍ ວັນໄຊ ແພງຊຸມມາ ກຳມະການສູນກາງພັກ ເລຂາພັກແຂວງ, ມີບັນດາສະຫາຍ ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ແຂກຖືກເຊີນຈາກພະແນກການຂັ້ນແຂວງ ແລະ ການນໍາເມືອງອ້ອມຂ້າງໃນທົ່ວແຂວງ ພ້ອມດ້ວຍຜູ້ແທນກອງປະຊຸມເຂົ້າຮ່ວມທັງໝົດ 231 ສະຫາຍ, ໃນນີ້ຜູ້ແທນສົມບູນ 181 ສ/ຫ ຍິງ 12 ສ/ຫ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງ 1980 ສະຫາຍ.

ໃນໄລຍະ 5 ປີທີ່ຜ່ານມາ ອົງຄະນະພັກເມືອງວຽງໄຊ ຄັ້ງທີ່ 10 ໄດ້ເອົາໃຈໃສ່ຊີ້ນໍາ – ນໍາພາໃນການພັດທະນາເສດຖະກິດ ແລະ ແກ້ໄຂຄວາມທຸກຍາກ ໂດຍຍຶດຖືເອົາການພັດທະເສດຖະກິດເປັນໃຈກາງ ເພື່ອແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າຢູ່ພາຍໃນເມືອງໃຫ້ນັບມື້ດີຂື້ນ, ໄດ້ສຸມໃສ່ຊີ້ນໍາ-ນຳພາການຈັດຕັ້ງປະຕິບັດຕາມທິດທາງ ແລະ ຄາດໝາຍທີ່ມະຕິກອງປະຊຸມຄັ້ງທີ່ 10 ໄດ້ຮັບຮອງ ໂດຍໄດ້ສຸມໃສ່ ການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ, ກໍ່ສ້າງ ພື້ນຖານໂຄງລ່າງ ໂດຍສະເພາະເສດຖະກິດຂອງເມືອງ ມີການຂະຫຍາຍຕົວຕໍ່ເນື່ອງ ລວມຍອດຜະລິດຕະພັນພາຍໃນເມືອງ ໃນ 5 ປີ ບັນລຸ 690.20 ຕື້ກີບ ລາຍໄດ້ສະເລ່ຍຕໍ່ຄົນບັນລຸ 5 ລ້ານ 175 ພັນກວ່າກີບ/ຄົນ/ປີ, ໃນນີ້ລວມຍອດຜະລິດຕະພັນກະສິກຳກວມເອົາ 68,15%, ອຸດສາຫະກຳກວມເອົາ 17, 19% ການບໍລິການກວມເອົາ 14,66 % ຂອງ GDP; ສົ່ງອອກສິນຄ້າບັນລຸ 6.156 ຕື້ກີບ; ນໍາເຂົ້າ 8.569 ຕື້ກີບ; ຄວາມທຸກຍາກຂອງປະຊາຊົນ ໃນທົ່ວເມືອງ 19,11% ໃນປີ 2014; ຍັງເຫຼືອພຽງ 7,8% ໃນປີ 2019 ໄລ່ຕາມລໍາດັບ 309/ລບ; ສໍາຫຼວດຄັ້ງລ່າສຸດ ປີ 2019 ນີ້ຄອບຄົວທຸກຍາກຍັງ 3.065 ຄອບຄົວ ກວມເອົາ 50,47%; ຄອບຄົວພົ້ນທຸກ 3.008 ຄອບຄົວ ກວມເອົາ 49,53%; ໃນ 5 ປີຜ່ານມາ ເມືອງວຽງໄຊໄດ້ຈັດຕັ້ງປະຕິບັດ 9 ແຜນງານ; 192 ໂຄງການ ທີ່ມະຕິ x ອົງຄະນະພັກເມືອງພວກເຮົາໄດ້ຮັບຮອງເອົາ ໃນນີ້ປະຕິບັດໄດ້ 97 ໂຄງການເທົ່າ 38,86% ຂອງແຜນການ ອັນສໍາຄັນໄດ້ຍາດແຍ່ງໄດ້ 9 ໂຄງການຈາກລັດຖະບານ ມາພັດທະນາຕົວເມືອງກ່ອນງານສະເຫຼີມສະຫຼອງວຽງໄຊ 50 ປີ ມູນຄ່າ 24 ຕື້ກ່ວາກີບ; ທຸກບ້ານມີ ທາງເຂົ້າເຖິງທຽວໄດ້ 2 ລະດູ 64 ບ້ານ ທຽວໄດ້ລະດູດຽວ 40 ບ້ານ; ປະຊາຊົນໃຊ້ຕາຂ່າຍໄຟຟ້າ 96 ບ້ານກວມ 92%; ໄປສະນີຂະຫຍາຍຕົວກວມ 90% ຂອງທົ່ວເມືອງ ການສື່ສານສະດວກກ່ວາເກົ່າ; ວຽກງານການຄ້າ; ບໍ່ແຮ່, ຊັບພະຍາກອນທໍາມະຊາດ ແລະ ສິ່ງແວດລ້ອມ ມີການພັດທະນາຕໍ່ເນື່ອງ ປົກປັກຮັກສາເມືອງມໍລະດົກທາງດ້ານ ປະຫວັດສາດ-ທໍາມະຊາດ-ວັດທະນະທໍາ ໄວ້ໄດ້ຢ່າງຫມັ້ນຄົງ.

ກອງປະຊຸມຍັງໄດ້ວາງຄາດໝາຍສູ້ຊົນ 2019-2024 ໂດຍຈະເອົາໃຈໃສ່ສ້າງເງື່ອນໄຂ ແລະ ເພີ່ມທະວີການຂຸດຄົ້ນທຸກທ່າແຮງບົ່ມຊ້ອນເຂົ້າໃສ່ການພັດທະນາເສດຖະກິດໃຫ້ມີການຂະຫຍາຍຕົວຕໍ່ເນື່ອງ ຍາດແຍ່ງການຊ່ວຍເຫຼືອຈາກພາຍໃນ ແລະ ຕ່າງປະເທດ ປັບປຸງຂັ້ນຂອດການບໍລິການຜ່ານປະຕູດຽວ ໃຫ້ມີການຫັນປ່ຽນດີຂຶ້ນ, ສົ່ງເສີມ ພາກສ່ວນເສດຖະກິດຮ່ວມມືຂອງປະຊາຊົນໃຫ້ເປັນຮູບປະທໍາ, ສ້າງໃຫ້ເກີດມີບັນດາຫົວຫນ່ວຍ ການຜະລິດ, ການບໍລິການ, ກຸ່ມຜະລິດທຸລະກິດຕ່າງໆ, ສ້າງເງື່ອນໄຂອໍານວຍຄວາມສະດວກໃຫ້ ເຂົ້າເຈົ້າເຂົ້າເຖິງແຫຼ່ງທຶນ, ຕະຫຼາດ ແລະ ຄວາມກ້າວຫນ້າດ້ານເຕັກໂນໂລຊີ ເພື່ອນໍາໃຊ້ເຂົ້າໃນການ ຜະລິດທຸລະກິດ, ສ້າງຫນໍ່ແຫນງຕົວແບບດ້ານຕ່າງໆ ຕິດພັນກັບການພັດທະນາຊົນນະບົດຮອບດ້ານ, ຮັບປະກັນໃຫ້ແກ່ການແກ້ໄຂຄວາມທຸກຍາກຂອງປະຊາຊົນຕາມ 4 ເນື້ອໃນ 4 ຄາດຫມາຍ ຮອດປີ 2024 ຄວາມທຸກຍາກໃຫ້ຍັງເຫຼືອ 1.530 ຄົວເຮືອນ ຫຼື 50% ຂອງຄວາມທຸກຍາກທີ່ຍັງມີ 3.008 ຄົວເຮືອນໃນປີ 2019.

ພ້ອມນີ້ບັນດາຜູ້ແທນທີ່ເຂົ້າຮ່ວມກອງປະຊຸມ ຍັງຈະໄດ້ເປັນເອກະສັນກັນຮັບຮອງເອົາ ບົດສຳຫຼວດການຊີ້ນຳ-ນຳພາຂອງອົງຄະນະພັກ, ບົດລາຍງານການເມືອງ ແລະ ແຜນພັດທະນາເສດຖະກິດ – ສັງຄົມ 5 ປີໃນຕໍ່ໜ້າ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງອົງຄະນະພັກເມືອງຄັ້ງທີ່ 12 ໄດ້ຮັບການຈັດຕັ້ງປະຕິບັດໃຫ້ປະກົດຜົນເປັນຈິງ ແລະ ໄດ້ຕາມແຜນທີ່ວາງໄວ້.

Medialaos