ເພື່ອເປັນການອານຸລັກຮັກສາຮີດຄອງປະເພນີອັນດີງາມຂອງເຜົ່າ ແລະ ເພີ້ມທະວີຄວາມສາມັກຄີປອງດອງ ລະຫວ່າງ ປະຊາຊົນບັນດາເຜົ່າໃຫ້ແໜ້ນແຟ້ນຍິ່ງຂື້ນ ແລະ ເພື່ອເປັນການຊົມເຊີຍຜົນສຳເລັດໃນການເພີ້ມພູນຜະລິດຜົນຂອງປະຊາຊົນເຜົ່າໄປຣ່. ດັ່ງນັ້ນ, ໃນວັນທີ 19 ທັນວາ 2019 ນີ້ ຢູ່ທີ່ບ້ານພູແລ້ງກາງ ເມືອງຫົງສາ ແຂວງໄຊຍະບູລີ ໂດຍການເຂົ້າຮ່ວມ ຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ຮອງເຈົ້າເມືອງຫົງສາ ພ້ອມດ້ວຍການນຳຂອງເມືອງ ມີອໍານາດການປົກຄອງບ້ານ ພ້ອມດ້ວຍປະຊາຊົນເຂົ້າຮ່ວມ.

ທ່ານ ບຸນລັກ ໄຊຍະວົງ ນາຍບ້ານໆ ພູແລ້ງກາງ ກໍ່ໄດ້ຂຶ້ນຜ່ານປະຫວັດຄວາມເປັນມາບຸນປະເພນີປະຈຳປີຂອງເຜົ່າໄປຣ່ໂດຍຫຍໍ້. ເຊິ່ງທ່ານໄດ້ກ່າວໃຫ້ຮູ້ວ່າ: ບຸນປະເພນີປະຈຳປີຂອງເຜົ່າໄປຣ່ນີ້, ເອີ້ນກັນວ່າ: ກິນດອກດ້າຍ-ດອກແດງ ຫຼື ເວົ້າຕາມພາສາໄປຣ່ ມັກເວົ້າກັນວ່າ: ແອັງຄຼັອງ. ແມ່ນເປັນບຸນປະເພນີຕາມຮີດ 12 ຂອງລາວ ເຊິ່ງເລີ່ມແຕ່ເດືອນຈຽງ ຫາ ເດືອນຍີ່ ໂດຍຈະກຳນົດເອົາມື້ໃດມື້ໜຶ່ງຄື: ມື້ກົດ, ມື້ຮ່ວງ ແລະ ມື້ກາບ ເພື່ອເປັນການເຕົ້າໂຮມບັນດາຍາດຕິພີ່ນ້ອງທີ່ຢູ່ທາງໃກ້ ແລະ ໄກ ໃຫ້ມາຜູກແໜ້ນຄວາມສາມັກຄີ ພ້ອມທັງຊົມເຊີຍຕໍ່ຜົນງານການເກັບກູ້ພືດຜົນລະປູກປະຈຳປີຂອງປະຊາຊົນ ແລ້ວຈັດພິທີໄວ້ບັນພະບູລຸດທີ່ລ່ວງລັບໄປແລ້ວ ເພື່ອລະນຶກເຖິງຄຸນງາມຄວາມດີຂອງພໍ່ແມ່ປູ່ຍ່າຕາຍາຍ ຫຼື ເວົ້າອີກດ້ານໜຶ່ງ ເພື່ອເປັນການຮຽກເອີ້ນເອົາຂວັນຈາກໄຮ່, ນາ, ຮົ້ວ, ສວນກັບມາບ້ານນັ້ນເອງ.

ສໍາລັບການຫ້າງຫາກະກຽມໃນມື້ງານບຸນນັ້ນ, ກໍ່ໄດ້ນໍາເອົາຜົນລະປູກຈາກໄຮ່, ນາ, ຮົ້ວ, ສວນຂອງປະຊາຊົນມາໂຮມກັນເຊັ່ນ: ໝາກອຶ, ໝາກຝັກ, ໝາກເຜືອກ, ໝາກມັນ, ໝາກຖົ່ວ ແລະ ດອກໄມ້ສີແດງ ພ້ອມທັງເຫຼົ້າໄຫ, ຝ້າຍຂາວ, ໄກ່ຕົ້ມ. ແລ້ວຈັດພາບາສີສູ່ຂວັນຕາມປະເພນີ. ພາຍໃນງານບຸນດັ່ງກ່າວນີ້, ຜູ້ເຂົ້າຮ່ວມກໍ່ໄດ້ຮັບຊົມການສະແດງສິລະປະຂອງນ້ອງນ້ອຍນັກຮຽນທີ່ສະແດງເຖີງເອກະລັກ ຮິດຄອງປະເພນີອັນດີງາມ ຂອງຊາດ ຂອງເຜົ່າ.

Medialaos