ເພື່ອເປັນການປະກອບຂໍ້ມູນທີ່ເປັນພື້ນຖານ ໃຫ້ແກ່ການຄົ້ນຄວ້າ, ປັບປຸງ, ດັດແປງກົດລະບຽບພັກ ທີ່ຈະສະເໜີຜ່ານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໃຫ້ມີເນື້ອໃນຖືກຕ້ອງ, ຄົບຖ້ວນ, ຮັດກຸມ ທາງດ້ານການຈັດຕັ້ງ ແລະ ການເຄື່ອນໄຫວໃນເງື່ອນໄຂໃໝ່ຂອງພັກ. ສະນັ້ນ, ມາໃນຕອນເຊົ້າຂອງວັນທີ 20 ທັນວາ 2019 ທີ່ຜ່ານມາ, ໜ່ວຍພັກຮາກຖານສະຫະພັນກຳມະບານແຂວງສະຫວັນນະເຂດ ໄດ້ມີການຈັດກອງປະຊຸມ ສະຫຼຸບຕີລາຄາການຈັດຕັ້ງປະຕິບັດກົດລະບຽບພັກ ສະໄໝທີ X ຂຶ້ນຢ່າງເປັນທາງການທີ່ຫ້ອງປະຊຸມຂອງຕົນ, ໂດຍການເຂົ້າຮ່ວມເປັນປະທານ ຂອງສະຫາຍ ບຸນລ້ຽງ ຈັນວັນເພັງເລຂາໜ່ວຍພັກຮາກຖານສະຫະພັນກຳມະບານແຂວງສະຫວັນນະເຂດ, ມີສະຫາຍຄະນະພັກ ຕະຫຼອດຮອດສະຫາຍສະມາຊິກພັກສົມບູນ ແລະ ສຳຮອງເຂົ້າຮ່ວມ 12 ສະຫາຍ, ຍິງ 4 ສະຫາຍ.

ໃນກອງປະຊຸມໄດ້ມີການສະຫຼຸບຕີລາຄາຄືນການຈັດຕັ້ງປະຕິບັດວຽກງານພາຍໃນໜ່ວຍພັກຂອງສະຫະພັນກຳມະບານແຂວງ ຢ່າງກົງໄປກົງມາ ເພື່ອຍົກໃຫ້ເຫັນເຖິງດ້ານດີ, ດ້ານອ່ອນ ແລະ ຂໍ້ຄົງຄ້າງ ໃນການຊີ້ນຳໆພາການຈັດຕັ້ງປະຕິບັດວຽກງານພາຍໃນໜ່ວຍພັກຂອງຕົນຢ່າງຮອບດ້ານ ແລະ ມີຈຸດສຸມ. ພ້ອມນັ້ນບັນດາສະຫາຍທີ່ເຂົ້າຮ່ວມໃນກອງປະຊຸມກໍ່ຍັງໄດ້ມີການແລກປ່ຽນປະກອບຄຳຄິດ-ຄຳເຫັນ ຕໍ່ກົດລະບຽບພັກ ໃນບາງໝວດ ແລະ ບາງມາດຕາ ເພື່ອເປັນຂໍ້ມູນໃຫ້ແກ່ການນຳສະເໜີຕໍ່ຄະນະພັກຂັ້ນເທິງ ນຳໄປຄົ້ນຄວ້າພິຈາລະນາ, ປັບປຸງ ແລະ ແກ້ໄຂກົດລະບຽບພັກ ໃຫ້ໄດ້ຮັບຜົນດີ.

Medialaos