TTL ຍັງຕ້ອງການມັນຕົ້ນຈຳນວນຫລາຍ ເພື່ອປ້ອນໂຮງງາານ

0
163

ຕາມການລາຍງານຂອງທ່ານ ຕຸ້ຍ ອິນທະວົງ ຫົວໜ້າຜູ້ຈັດຫາວັດຖຸດິບເພື່ອປ້ອນໂຮງງານ TTL ໃນວັນທີ 12 ທັນວາ 2019 ຜ່ານມານີ້ວ່າ: ໂຮງງານຜະລິດແປ້ງມັນຕົ້ນ TTL ເມືອງບໍລິຄັນ ແຂວງບໍລິຄໍາໄຊ ສ້າງຕັ້ງຂຶ້ນຕັ້ງແຕ່ຕົ້ນປີ 2010 ປະຈຸບັນ ມີກໍາລັງແຮງການຜະລີດ 1200 ໂຕນ, ສາມາດຜະລິດແປ້ງມັນຕົ້ນໄດ້ 600 ໂຕນ/ມື້, ໃນໄລຍະຜ່ານມາ ທາງໂຮງງານແມ່ນໄດ້ລົງຊຸກຍູ້ພໍ່ແມ່ປະຊາຊົນ ເຊັ່ນ: ໂຄສະນາບຸກເບີກເນື້ອທີ່ທໍາການຜະລິດ ແລະ ສະໜອງແນວພັນໃຫ້ແກ່ພໍ່ແມ່ປະຊາຊົນ ເຫັນວ່າປະຊາຊົນບໍ່ສາມາດສົ່ງທຶນໃຫ້ແກ່ບໍລິສັດໄດ້, ສະນັ້ນ ທາງບໍລິສັດຈຶ່ງມີແນວທາງປ່ຽນແປງໃໝ່ ໂດຍຮັບຊື້ມັນຕົ້ນຈາກປະຊາຊົນໂດຍມີລາຄາຮັບປະກັນ 400ກີບ/ກິໂລ. ປະຈຸບັນ ແມ່ນຮັບຊື້ 500ກີບ/ກິໂລ ຕາມລາຄາສິນຄ້າທ້ອງຕະຫຼາດ ເລີ່ມຮັບຊື້ມັນຕົ້ນແຕ່ເດືອນ ຕຸລາ- ເດືອນ ເມສາ ທຸກໆປີ, ສໍາລັບປະຊາຊົນທີ່ນໍາເອົາມັນຕົ້ນມາຂາຍໃຫ້ມີ 5 ເມືອງ ຄື: ເມືອງບໍລິຄັນ, ປາກຊັນ, ປາກກະດິງ, ທ່າພະບາດ ແລະ ເມືອງທ່າໂທມ ມີມັນຕົ້ນສະໜອງໃຫ້ແກ່ໂຮງງານພຽງແຕ່ 300-400ໂຕນ/ມື້, ທາງໂຮງງານ ຍັງຕ້ອງການວັດຖຸດິບອີກ 200 – 300ໂຕນ/ມື້ ເພື່ອສະໜອງໃຫ້ແກ່ໂຮງງານຈຶ່ງຈະພຽງພໍຕາມຄວາມຕ້ອງການ.

ທ່ານ ຟານ ເທນີງ ຮອງຜູ້ອໍານວຍການບໍລິສັດແປ້ງມັນຕົ້ນ TTL ຍັງໃຫ້ຮູ້ຕື່ມອີກວ່າ: ຍ້ອນເຫັນແນວທາງການປ່ຽນແປງໃໝ່ຂອງພັກ – ລັດ ກໍ່ຄືປະຕິບັດຕາມມະຕິກອງປະຊຸມໃຫຍ່ຂອງອົງຄະນະພັກແຂວງ, ເມືອງ, ລົງສູ່ລວງເລິກຫັນເອົາວຽກງານກະສິກໍາ ລົງສູ່ຊົນນະບົດຮອບດ້ານ ແລະ ປະຕິບັດຕາມວຽກງານ 3 ສ້າງ ໃນການສ້າງບ້ານເປັນຫົວໜ່ວຍພັດທະນາໃຫ້ປະກົດຜົນເປັນຈິງເທື່ອລະກ້າວນັ້ນ ໃນຕໍ່ໜ້າທາງໂຮງງານຜະລິດແປ້ງມັນຕົ້ນ ຈະຂະຫຍາຍກໍາລັງແຮງການຜະລິດໃຫ້ຫຼາຍຂຶ້ນກ່ວາເກົ່າ ແລະ ລົງຊຸກຍູ້ສົ່ງເສີມໃຫ້ພໍ່ແມ່ນປະຊາຊົນຢູ່ເຂດຊົນນະບົດ ໃຫ້ຫັນມາເອົາການປູກມັນຕົ້ນໃຫ້ຫຼາຍຂຶ້ນ ຈະຊອກຫາຕະຫຼາດເປັນຕົວແທນໃຫ້ພໍ່ແມ່ປະຊາຊົນໃນການຈໍາໜ່າຍສິນຄ້າ ເຮັດໃຫ້ຄອບຄົວຂອງພໍ່ແມ່ປະຊາຊົນຫຼຸດພົ້ນອອກຈາກຄວາມທຸກຢາກເທື່ອລະກ້າວ.

Medialaos