ພິທີລົງນາມ ແລກປ່ຽນໂຄງການຊ່ວຍເຫຼືອ ກຽມພ້ອມ, ໂຕ້ຕອບ ແລະ ຟື້ນຟູຫຼັງໄພພິບັດ ຢູ່ ສປປ ລາວ

0
213

ພິທີລົງນາມເອກະສານ ແລກປ່ຽນໂຄງການຊ່ວຍເຫຼືອ ດ້ານອຸປະກອນ ເພື່ອປະກອບ ເຂົ້າໃນວຽກງານກຽມພ້ອມ, ໂຕ້ຕອບ ແລະ ຟື້ນຟູຫຼັງໄພພິ ບັດ ຢູ່ ສປປ ລາວ ຈາກລັດຖະ ບານຍີ່ປຸ່ນ ໄດ້ຈັດຂຶ້ນໃນວັນທີ 23 ທັນວານີ້ ທີ່ກະຊວງການ ຕ່າງປະເທດ ຊຶ່ງຕາງໜ້າຝ່າຍ ລາວຮ່ວມລົງນາມໃນເອກະ ສານ ແລະ ກ່າວຮັບໂຄງການ ໂດຍທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງການຕ່າງປະເທດ ແລະ ຕາງໜ້າຝ່າຍຍີ່ປຸ່ນຮ່ວມ ລົງນາມ ໃນເອກະສານ ແລະ ກ່າວມອບໂດຍທ່ານ ເຄໂຊ ທາເກວາກະ ເອກ​ອັກຄະ​ຣາຊະ ທູດ ຍີ່ປຸ່ນ ປະຈໍາ ສປປ ລາວ ພ້ອມດ້ວຍພາກສ່ວນທີ່ກ່ຽວ ຂ້ອງຂອງສອງຝ່າຍເຂົ້າຮ່ວມ ເປັນສັກຂີພິຍານ.

ການອະນຸມັດໂຄງການ ຊ່ວຍເຫຼືອດັ່ງກ່າວເປັນໂຄງ ການໜຶ່ງທີ່ສໍາຄັນ ເພື່ອຕອບສະ ໜອງຄວາມຮຽກຮ້ອງຕ້ອງການໃຫ້ແກ່ວຽກງານກຽມພ້ອມ, ໂຕ້ຕອບ ແລະ ຟື້ນຟູຂົງເຂດ ທີ່ເກີດໄພພິບັດໃນ ສປປ ລາວ ໃຫ້ທັນການ. ໂຄງການ ຊ່ວຍເຫຼືອດັ່ງກ່າວລວມມີ ມູນຄ່າ 1 ຕື້ເຢນ ຫຼື ປະມານ 9,1 ລ້ານໂດລາສະຫະລັດ, ຊຶ່ງເປັນການປະກອບສ່ວນອັນສໍາຄັນເຂົ້າໃນການຈັດຕັ້ງປະຕິບັດແຜນ​​ພັດທະນາ​ເສດຖະກິດ-​ສັງຄົມຂອງ ສປປ ລາວ ໃນແຕ່ລະໄລຍະ.

ໃນພິທີດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈ ຢ່າງຈິງໃຈ ແລະ ຕີລາຄາສູງ ຕໍ່ລັດຖະບານ ແລະ ປະຊາ ຊົນຍີ່ປຸ່ນ ທີ່ຍາມ ໃດກໍໃຫ້ການ ສະໜັບສະໜູນ ແລະ ຊ່ວຍເຫຼືອ ສປປ ລາວ ມາໂດຍຕະຫຼອດ, ເວລາປະສົບໄພພິບັດທໍາ ມະຊາດ ສອງປະເທດລາວ ແລະ ຍີ່ປຸ່ນ ກໍໄດ້ໃຫ້ການ ຮ່ວມມືຊ່ວຍເຫຼືອຊຶ່ງກັນ ແລະ ກັນ ຢ່າງຕັ້ງໜ້າ, ໂດຍ ສະເພາະໃນປີນີ້ ເຖິງແມ່ນວ່າ ຍີ່ປຸ່ນຈະປະສົບກັບໄພພິບັດຫຼາຍຄັ້ງຢ່າງໜັກໜ່ວງກໍຕາມ ແຕ່ກໍໄດ້ສືບຕໍ່ຮ່ວມມືຊ່ວຍເຫຼືອ ສປປ ລາວ. ພ້ອມນີ້ ທ່ານຮອງ ລັດຖະມົນຕີ ກໍໄດ້ຕາງ​ໜ້າ​ລັດ​ຖະ​ບານ ແລະ ປະ​ຊາ​ຊົນ​ລາວ ໄດ້ໃຫ້​ຄຳ​ໝັ້ນ​ສັນ​ຍາວ່າ ຈະ​ນຳໃຊ້​ໂຄງ​ການ​ຊ່ວຍ​ເຫຼືອຄັ້ງ​ນີ້ ໃຫ້ເກີດ​ປະ​ໂຫຍດ​ສູງ​ສຸດ ໃນການພັດ​ທະ​ນາ ສ​ປປ ລາວ.

ທ່ານ ຮອງລັດຖະມົນ ຕີກະຊວງການຕ່າງປະເທດ ຍັງອວຍພອນໃຫ້ສາຍພົວພັນການເປັນຄູ່ຮ່ວມຍຸດທະສາດ ລະຫວ່າງ ສ​ປ​ປ ລາວ ແລະ ຍີ່ປຸ່ນ ໄດ້ຮັບການພັດ ທະນາຢ່າງບໍ່ຢຸດຢັ້ງ.

Medialaos MMD