ລັດຖະມົນຕີ ກະຊວງພາຍໃນ ເນັ້ນສືບຕໍ່ຈັດຕັ້ງປະຕິບັດຄຳສັ່ງ ເລກທີ 03/ນຍ

0
1079

ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ເນັ້ນໃຫ້ຂະແໜງພາຍໃນສືບຕໍ່ຈັດຕັ້ງປະຕິບັດຄຳສັ່ງເລກທີ 03/ນຍ ວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງລັດ ລວມທັງການຜັນຂະຫຍາຍຄຳຂວັນທີ່ວ່າ: “ກົງຈັກກະທັດຮັດ, ໜັກແໜ້ນ, ເຂັ້ມແຂງ, ມີປະສິດທິຜົນ, ໂປ່ງໃສ ແລະ ຮັບໃຊ້ປະຊາຊົນຢ່າງແທ້ຈິງ”.

ກະຊວງພາຍໃນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ ປະຈຳປີ 2019 ແລະ ທິດທາງແຜນການປະ ຈຳປີ 2020 ຂຶ້ນ ໃນວັນທີ 23 ທັນວານີ້ ທີ່ຫ້ອງປະຊຸມຂອງກະຊວງດັ່ງກ່າວ ພາຍໃຕ້ການເປັນປະທານຂອງທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນຂຶ້ນຜ່ານບົດລາຍງານ ຊຶ່ງທ່ານ ໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້, ລວມທັງສາມາດຍາດໄດ້ຜົນ ສໍາເລັດຫຼາຍດ້ານ ໂດຍສະ ເພາະແມ່ນດ້ານການປັບປຸງວຽກງານການປົກຄອງ-ການບໍລິຫານລັດ, ການຕິດຕາມ ແລະ ຊຸກຍູ້ການປັບປຸງກົງຈັກການຈັດຕັ້ງຂອງລັດ ທັງສູນກາງ ແລະ ທ້ອງຖິ່ນ, ການປັບ ປຸງນິຕິກໍາ ແລະ ລະບຽບການ ເພື່ອຄຸ້ມຄອງບໍລິຫານລັດ, ການປັບປຸງລະບົບການປົກຄອງຢູ່ຂັ້ນທ້ອງຖິ່ນ ແລະ ສາຍພົວພັນ ລະຫວ່າງ ສູນກາງ ແລະ ທ້ອງ ຖິ່ນ, ການພັດທະນາວຽກງານຄຸ້ມຄອງພົນລະເມືອງ, ການຄຸ້ມຄອງວຽກງານຊົນເຜົ່າ ແລະ ສາສະໜາ, ການຄຸ້ມຄອງອົງ ການຈັດຕັ້ງທາງສັງຄົມ ພ້ອມທັງປັບປຸງລະບົບ ແລະ ກົນໄກການສະໜອງການບໍລິການຂອງລັດ ເພື່ອການປົກຄອງທີ່ດີ, ດ້ານການປັບປຸງວຽກງານລັດຖະກອນ ໂດຍສະເພາະ ແມ່ນການປັບປຸງລະບົບຄຸ້ມຄອງລັດຖະກອນ ໂດຍການຫັນລະບົບການຄຸ້ມຄອງແບບເກົ່າໄປສູ່ລະບົບທັນສະໄໝ, ການປະເມີນຜົນການປະຕິບັດວຽກງານຂອງລັດຖະກອນກໍຄືການຍົກລະດັບຂີດຄວາມສາມາດ ຂອງລັດຖະກອນ, ດ້ານການປັບປຸງເຕັກນິກການປົກຄອງ ເຊັ່ນ: ວຽກງານຄຸ້ມຄອງ ແລະ ສໍາເນົາເອກະສານ, ວຽກງານຂົງ ເຂດສຳຫຼວດ, ວັດແທກ ແລະ ແຜນທີ່, ວຽກງານແຂ່ງຂັນ ແລະ ຍ້ອງຍໍ, ດ້ານການພົວພັນຮ່ວມມືພາກພື້ນ ແລະ ສາກົນ.

ພ້ອມດຽວກັນນີ້, ຜູ້ເຂົ້າ ຮ່ວມກອງປະຊຸມຍັງໄດ້ປະກອບຄໍາເຫັນກ່ຽວກັບວຽກງານ ການປັບປຸງກົງຈັກລັດ ຕາມຄໍາ ສັ່ງຂອງທ່ານນາຍົກລັດຖະມົນ ຕີ ສະບັບ ເລກທີ 03/ນຍ ວ່າດ້ວຍການປັບປຸງຄຸນນະພາບການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດ ຖະກອນໃໝ່, ວຽກງານການຄຸ້ມຄອງລັດຖະກອນ ຕິດພັນກັບການແຈກຢາຍບັດພະນັກງານ-ລັດຖະກອນ, ວຽກງານປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ, ວຽກງານການແກ້ໄຂເຂດແດນເຊື່ອມຕໍ່ ແລະ ການປັບປຸງກົງຈັກຂັ້ນທ້ອງຖິ່ນຕິດພັນກັບວຽກງານ 3 ສ້າງ ແລະ ວຽກງານອື່ນໆ.

ທ່ານ ຄຳໝັ້ນ ສູນວິເລີດ ໄດ້ໂອ້ລົມ ຊຶ່ງໄດ້ທົບທວນຄືນເຖິງຄໍາຂວັນທີ່ທ່ານນາຍົກລັດ ຖະມົນຕີ ໄດ້ສະເໜີໃນກອງ ປະຊຸມປະຈໍາປີ 2018 ຂອງກະຊວງພາຍໃນ ວ່າ “ກົງຈັກກະ ທັດຮັດ, ໜັກແໜ້ນ, ເຂັ້ມແຂງ, ມີປະສິດທິຜົນ, ໂປ່ງໃສ ແລະ ຮັບໃຊ້ປະຊາຊົນຢ່າງແທ້ຈິງ” ຊຶ່ງຂະແໜງພາຍໃນໄດ້ພະຍາ ຍາມ ແລະ ເອົາໃຈໃສ່ໃນການຜັນຂະຫຍາຍຄໍາຂວັນດັ່ງກ່າວເຂົ້າໃນການປະຕິບັດວຽກງານຕົວຈິງ ໃນການຄົ້ນຄວ້າ ແລະ ປັບປຸງວຽກງານຕ່າງໆ ໂດຍສະເພາະແມ່ນເນື້ອໃນຈິດໃຈຂອງຄໍາສັ່ງ ເລກທີ 03/ນຍ ໃຫ້ປະກົດຜົນເປັນຈິງເທື່ອລະກ້າວ, ການຄົ້ນຄວ້າປັບປຸງກົງຈັກ ຕິດພັນກັບການກໍານົດຕໍາແໜ່ງງານຄືນໃໝ່ໃຫ້ສອດຄ່ອງກັບພາລະບົດບາດຂອງແຕ່ລະອົງ ການຈັດຕັ້ງ.

ສໍາລັບປີ 2020 ຊຶ່ງເປັນປີສຸດທ້າຍຂອງແຜນການ 5 ປີຄັ້ງທີ I ຂອງຂະແໜງການພາຍໃນ, ທ່ານ ຄຳໝັ້ນ ສູນວິເລີດ ໄດ້ເນັ້ນໃຫ້ແຕ່ລະພາກສ່ວນເອົາໃຈໃສ່ກວດກາຄືນບັນຫາທີ່ຍັງເປັນຈຸດຄົງຄ້າງຕ້ອງໄດ້ແກ້ໄຂ ແລະ ຈະຕ້ອງໄດ້ສືບຕໍ່ເອົາໃຈໃສ່ປະຕິບັດຄໍາຂວັນດັ່ງ ກ່າວໃຫ້ປະກົດຜົນເປັນຈິງ ແລະ ເຮັດໃຫ້ການປັບປຸງວຽກງານໄດ້ຮັບຜົນດີກວ່າເກົ່າ ເພື່ອປະ ຕິບັດພາລະບົດບາດເປັນເສ ນາທິການໃຫ້ແກ່ລັດຖະບານ ແລະ ອົງການປົກຄອງທ້ອງຖິ່ນ ຕາມຄວາມຮັບຜິດຊອບຂອງຂະແໜງການພາຍໃນ ໂດຍສະເພາະກ່ຽວກັບການຄົ້ນຄວ້າປັບປຸງກົງຈັັກການຈັດຕັ້ງຂອງອົງການບໍລິຫານລັດ ທັງໃນລະ ດັບສູນກາງ ແລະ ທ້ອງຖິ່ນ ແລະ ບັນຫາອື່ນໆທີ່ປິ່ນອ້ອມລວມ ທັງວຽກລັດຖະກອນ, ວຽກເຕັກ ນິກການປົກຄອງ ແລະ ການ ຮ່ວມມືສາກົນໃຫ້ມີຄວາມເຂັ້ມ ແຂງ ແລະ ໜັກແໜ້ນ.

Medialaos MMD