ໃນ​ວັນ​ທີ 23 ທັນວາ 2019, ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ ໄດ້​ໃຫ້​ກຽດ​ຕ້ອນຮັບທ່ານ ພົນ​ເອກ ປຣະ​ວິດ ວົງ​ສຸວັນ ຮອງ​ນາຍົກລັດຖະມົນຕີ ແຫ່ງ​ ຣາ​ຊະ​ອານາຈັກ​ໄທ ພ້ອມ​ດ້ວຍ​ຄະນະ ໃນ​ໂອກາດ​ເດີນທາງ​ມາ​ເຂົ້າ​ຮ່ວມ​ກອງ​ປະຊຸມຄະນະ​ກຳມະການ ການ​ຮ່ວມ​ມື​ຮັກສາ​ຄວາມ​ສະຫງົບ​ຮຽບຮ້ອຍ​ຕາມ​ຊາຍ​ແດນ ລາວ​-​ໄທ, ໄທ​-​ລາວ ( GBC ) ຄັ້ງ​ທີ 26 ໃນ​ລະຫວ່າງ​ວັນ​ທີ 20-23 ທັນວາ 2019 ທີ່ ສປປ ລາວ ເປັນ​ເຈົ້າ​ພາບ.

ໃນ​ໂອກາດ​ດັ່ງກ່າວ, ທ່ານ ບຸນ​ຍັງ ວໍລະ​ຈິດ ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຕີລາ ຄາ​ສູງ​ຕໍ່ທ່ານ ພົນ​ເອກ ປຣະວິດ ວົງ​ສຸວັນ ທີ່ໄດ້ນຳພາ​ຄະນະ ເດີນທາງ​ມາ​ເຂົ້າ​ຮ່ວມ​ກອງ​ປະ ຊຸມ​ໃນ​ຄັ້ງ​ນີ້ ຊຶ່ງ​ເປັນ​ການ​ປະ ກອບສ່ວນ​ອັນ​ສຳຄັນເຂົ້າ​ໃນ​ການ​ຮັກສາ​ຄວາມ​ສະຫງົບ​ຮຽບຮ້ອຍ​ຕາມ​ຊາຍ​ແດນ​ຂອງ​ສອງ​ປະເທດ, ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມມື ລະຫວ່າງ ປະຊາຊົນ​ສອງ​ຊາດ​ ລາວ​-​ໄທ ໃຫ້​ໄດ້​ຮັບ​ການ​ພັດ ທະນາ ແລະ ສືບຕໍ່​ໃຫ້ການ​ສະ ໜັບສະໜູນ​ຊ່ວຍເຫຼືອ, ໄປ​-​ມາ​ຫາ​ສູ່​ຊຶ່ງ​ກັນ ແລະ ກັນ.

ໂອກາດ​ດຽວ​ກັນ​ນີ້, ທ່ານ ພົນ​ເອກ ປຣະ​ວິດ ວົງ​ສຸວັນ ກໍ​ໄດ້​ກ່າວ​ສະແດງ​ຄວາມ​ຂອບ ໃຈ ຕໍ່​ທ່ານ ບຸນ​ຍັງ ວໍລະ​ຈິດ ທີ່​ ໄດ້​ສະຫຼະ​ເວລາ​ອັນ​ມີຄ່າໃຫ້ ການ​ຕ້ອນຮັບ​ຢ່າງ​ອົບ​ອຸ່ນ​ໃນ​ຄັ້ງ​ນີ້, ພ້ອມ​ທັງ​ແຈ້ງ​ຈຸດປະສົງ​ຂອງ​ການ​ເດີນທາງ​ມາ​ຄັ້ງ​ນີ້ ໃຫ້ ທ່ານ​ປະທານ​ປະເທດ​ຮັບ​ຊາບ​ຕື່ມ​ອີກ.

ພ້ອມ​ນີ້, ທ່ານ ບຸນ​ຍັງ ວໍລະ​ຈິດ ຍັງ​ໄດ້​ອວຍພອນ​ໃຫ້ ທ່ານ​ຮອງ​ນາຍົກລັດຖະມົນຕີ ແຫ່ງ ຣາ​ຊະ​ອານາຈັກ​ໄທ ຈົ່ງ​ປະສົບ​ຜົນສຳເລັດ ໃນ​ການ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ, ພ້ອມ​ສະແດງ​ຄວາມ​ຫວັງ​ວ່າ ການ​ເດີນທາງ​ມາ​ເຂົ້າ​ຮ່ວມ​ກອງ​ປະຊຸມ​ໃນ​ຄັ້ງ​ນີ້, ຈະ​ເປັນ​ການ​ປະກອບສ່ວນ​ຮັດ​ແໜ້ນ ການ​ພົວພັນ​ຮ່ວມ​ມື​ໃນ​ວຽກ​ງານ​ຄວາມ​ໝັ້ນຄົງ ແລະ ທຸກ​ຂົງເຂດ​ວຽກ​ງານ ລະຫວ່າງ ສອງ​ປະເທດ​ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

Medialaos MMD