ງານເທດສະການອາຫານລາວ ປະຈຳ ປີ 2020 ຈະຈັດຂຶ້ນໃນລະຫວ່າງ ວັນທີ 28-31 ມັງກອນ ທີ່ຈະມາເຖິງນີ້ ຢູ່ເດີນສວນເຈົ້າອານຸວົງ (ແຄມຂອງ) ເມືອງຈັນທະບູລີ ນະຄອນຫລວງວຽງຈັນ, ເຊິ່ງບັນດາທ່ານ ທີ່ເຂົ້າມາທ່ຽວງານ ຈະໄດ້ມີໂອກາດຊີມລົດຊາດອາຫານ ທີ່ເປັນເອກະລັກພື້ນເມືອງລາວ ຈາກ 17 ແຂວງ ແລະ ນະຄອນຫລວງ, ພ້ອມທັງຈະໄດ້ທ່ຽວຊົມ ແລະ ຊື້ສິນຄ້າ ນາໆຊະນິດ ຈາກພາຍໃນ ແລະ ຕ່າງປະເທດ ຢ່າງຫລາກຫລາຍ.


ທ່ານ ນາງ ຈັນທະຈອນ ວົງໄຊ ປະທານສະມາຄົມ ນັກທຸລະກິດແມ່ຍິງລາວ ກ່າວໃນງານຖະແຫລງຂ່າວ ກ່ຽວກັບການຈັດງານ ດັ່ງກ່າວ, ໃນວັນທີ 24 ທັນວາ 2019 ນີ້ວ່າ: ການຈັດງານຄັ້ງນີ້, ເພື່ອສືບຕໍ່ຊຸກຍູ້ ແລະ ສົ່ງເສີມ ຫົວໜ່ວຍທຸລະກິດຂອງແມ່ຍິງ, ຜູ້ປະກອບການແມ່ຍິງກ່ຽວກັບ ການຜະລິດ, ການປູກຝັງ, ລ້ຽງສັດ, ປຸງແຕ່ງ, ທຸລະກິດຮ້ານອາຫານ, ການໂຮງແຮມ, ຜູ້ເຮັດການຜະລິດ ຫັດຖະກຳຝ້າຍໄໝ, ຈັກສານ ແລະ ອື່ນໆ ຈາກທ້ອງຖິ່ນ ນັບທັງນະຄອນຫລວງວຽງຈັນ ໃຫ້ໄດ້ມີໂອກາດ ມາວາງສະແດງ ແລະ ຂາຍຜະລິດຕະພັນຂອງຕົນ, ເພື່ອສ້າງໂອກາດ ໃຫ້ຜູ້ປະກອບການແມ່ຍິງ ທັງຫລາຍມີໂອກາດ ໄດ້ແລກປ່ຽນບົດຮຽນ, ປະສົບການໃນການພັດທະນາ ຜະລິດຕະພັນຂອງຕົນ ໃຫ້ສາມາດຕອບສະໜອງ ໄດ້ຕາມຄວາມຕ້ອງ ການຂອງຕະຫລາດ ໃນຍຸກປັດຈຸບັນ, ເພື່ອປຸກລະ ດົມຄວາມຄິດແບບໃໝ່ ໃນການຜະລິດເປັນສິນຄ້າ ຂອງຜູ້ປະກອບການ ແມ່ຍິງໃຫ້ສ້າງເຄືອຂ່າຍ ການຄ້າຢ່າງກວ້າງຂວາງ ໃນຂອບເຂດທົ່ວປະເທດ ທັງສາມາດສົ່ງຂາຍອອກສູ່ ຕະຫລາດສາກົນໄດ້, ທັງເປັນການໂຄສະນາເຜີຍແຜ່ ອາຫານພື້ນເມືອງແບບລາວໆ ຈາກຜະລິດຕະພັນປອດສານພິດ ທີ່ດີຕໍ່ສຸຂະ ພາບ. ງານໃນຄັ້ງນີ້, ມີຮ້ານວາງສະແດງທັງໝົດ 190 ຮ້ານ ໃນນັ້ນປະກອບມີວາງສະແດງ ແລະ ຂາຍສິນຄ້າປະເພດຕ່າງໆ ເຊັ່ນ: ຮ້ານອາຫານ, ເຄື່ອງຫັດຖະກຳ, ກະສິກຳ ຈາກພາຍໃນ ແລະ ປະເທດໃກ້ຄຽງ ນອກຈາກນັ້ນຍັງມີ ສິນຄ້າຈາກປະເທດອາຊຽນ-ສະຖານທູດຕ່າງໆ ຈາກ 6 ປະເທດ ປະຈຳ ສປປ ລາວ ເຂົ້າຮ່ວມ ເຊັ່ນ: ສະຖານທູດກຳປູເຈຍ, ສະຖານທູດສິງກະໂປ, ສະຖານທູດໄທ, ສະຖານທູດຟິລິບປິນ, ສະຖານທູດມຽນມາ ແລະ ສະຖານທູດ ມາເລເຊຍ. 

      ນອກຈາກນີ້, ພາຍໃນງານຍັງຈະມີກິດຈະກຳ ແຂ່ງຂັນປຸງແຕ່ງອາຫານທີ່ເປັນເອກະລັກ ຈາກ 17 ແຂວງ ແລະ ນະຄອນຫລວງ ເປັນຕົ້ນ ຈັດການແຂ່ງຂັນປຸງແຕ່ງອາຫານຈາກ 6 ແຂວງພາກ   ເໜືອ, 6 ແຂວງພາກກາງ ແລະ 6 ແຂວງພາກໃຕ້. ພ້ອມນັ້ນ, ຍັງຈະມີການຈົກສະຫລາກ ຜົນລາງວັນບັດສ່ຽງໂຊກຈາກໂຄງການ ອິນເຕີພລາ (Inter plast) ເພື່ອຊ່ວຍເຫລືອ ຄົນເຈັບຈາກໄຟໄໝ້, ນໍ້າຮ້ອນລວກ ແລະ ຄົນເຈັບອານາຖາ ເຊິ່ງຈະຈັດຂຶ້ນໃນວັນສຸດທ້າຍ, ພ້ອມທັງກວດສຸຂະພາບຟຣີ 35 ລາຍງານ ດ້ວຍເຄື່ອງມືທີ່ທັນສະໄໝ, ວ່ອງໄວ, ທັນໃຈ ແລະ ຮູ້ຜົນກວດທັນທີ.

Medialaos MMD