ວັນທີ 25 ທັນວາ 2019, ທີ່ຫ້ອງປະຊຸມ ສວນວັດທະນະທຳ ແຂວງຈໍາປາສັກ, ກົມສືມວນຊົນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວຮ່ວມກັບພະແນກ ຖວທ ແຂວງ ຈຳປາສັກໄດ້ຈັດກອງປະຊຸມ ເຜີຍແຜ່ ກົດໝາຍສື່ມວນຊົນສະບັບປັບປຸງ. ເປັນກຽດເຂົ້າຮ່ວມໃນກອງປະຊຸມ ມີ ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະທ່ອງທ່ຽວ, ທ່ານ ບົວລີນ ວົງພະຈັນ ຮອງເຈົ້າແຂວງ ຜູ້ຊີ້ນຳວຽກວັດທະນະທຳ-ສັງຄົມ ແຂວງຈຳປາສັກ, ນອກນັ້ນມີ ຫົວໜ້າກົມ ຮອງກົມທີ່ກ່ຽວຂ້ອງຂອງກະຊວງ ຖະແຫຼງຂ່າວ, ວັດທະນະທຳ ແລະທ່ອງທ່ຽວ, ຫົວໜ້າ ແລະ ຮອງຫົວໜ້າ ພະແນກ ຖທວ, ຜູ້ຕ່າງໜ້າພະແນກການອ້ອມຂ້າງ ແລະ ນັກວິຊາການ ຂອງແຂວງຈໍາປາສັກເຂົ້າຮ່ວມທັງໝົດ70ກວ່າທ່ານ.

ໃນພິທີເປີດກອງປະຊຸມຄັ້ງນີ້ ທ່ານ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ຮອງເຈົ້າແຂວງ ໄດ້ປະກອບຄຳເຫັນ ແລະ ໃຫ້ທິດຊີ້ນຳ ໂດຍ ທ່ານ ໄດ້ເນັ້ນໃຫ້ເຫັນຜົນໄດ້ຮັບດ້ານດີ ບັນຫາ ແລະ ສິ່ງທ້າທາຍ ໃນການຈັດຕັ້ງປະຕິບັດກົດໝາຍສະບັບກ່ອນ, ຄວາມຈຳເປັນພາວະວິໄສໃນການປັບປຸງກົດໝາຍ ແລະ ບາງບັນຫາຄວນເອົາໃຈໃສ່ໃນການເຊື່ອມຊຶມກົດໝາຍສະບັບປັບປຸງນີ້ແລະ ແນະນຳໃຫ້ຜູ້ເຂົ້າຮ່ວມປະຊຸມເຫັນໄດ້ຄວາມຈຳເປັນ ແລະ ຄວາມສຳຄັນຕໍ່ການໂຄສະນາເຜີຍແຜ່ຢ່າງກວ້າງຂວາງ; ຕີລາຄາການຈັດຕັ້ງປະຕິບັດກົດໝາຍ; ເອົາໃຈໃສ່ ແກ້ໄຂສິ່ງອຸດຕັນໃນການປະຕິບັດກົດໝາຍເປັນຕົ້ນຄວາມບໍ່ເຂົ້າໃຈຂອງຜູ້ເຮັດໜ້າທີ່ຄຸ້ມຄອງ, ຜູ້ປະກອບກິດຈະການ ແລະ ບັນຫາອື່ນໆ ໃນວຽກງານຖະແຫຼງຂ່າວສື່ມວນຊົນ.

ກົດໝາຍວ່າດ້ວຍສື່ມວນຊົນສະບັບປັບປຸງນີ້ ຊຶ່ງປະກອບມີທັງໝົດ 9 ພາກ, 9 ໝວດ, 85 ມາດຕາ ໃນນີ້ມີມາດຕາ ຮັກສາເດີມ 28 ມາດຕາ, ປັບປຸງ 39 ມາດຕາ ແລະ ສ້າງໃໝ່ 18 ມາດຕາ. ເນື້ອໃນພື້ນຖານໃນກົດໝາຍສະບັບປັບປຸງນີ້ ຍັງຮັກສາຫຼັກການພື້ນຖານກ່ຽວກັບສື່ມວນຊົນ, ສ່ວນການປັບປຸງ ແລະ ເພີ່ມບັນດາມາດຕາໃໝ່ນັ້ນແມ່ນເພື່ອໃຫ້ສອດຄ່ອງກັບ ມະຕິຂອງກອງປະຊຸມໃຫຍ່ຄັ້ງທີ IX ແລະ X ຂອງພັກ,  ມະຕິຂອງກົມການເມືອງວ່າດ້ວຍວຽກງານ 3 ສ້າງ ກໍຄື ລັດຖະທຳມະນູນ ສະບັບປັບປຸງໃໝ່, ແທດເໝາະແຜນພັດທະນາເສດຖະກິດ-ສັງຄົມຂອງລັດ ແລະ ການເຊື່ອມໂຍງສາກົນ ໂດຍສະເພາະແມ່ນແນໃສ່ສື່ແບບໃໝ່.

Medialaos MMD