ທ່ານ ບົວຄົງ ນາມມະວົງ ໄດ້ໃຫ້ຮູ້ວ່າ: ໃນໄລຍະຜ່ານມາ ແຂວງບໍ່ແກ້ວ ໄດ້ສຸມໃສ່ການພັດທະນາພື້ນຖານໂຄງລ່າງ ໂດຍສະເພາະແມ່ນ ສ້າງທາງປູເບຕົງ 11 ເສັ້ນຢູ່ໃນຕົວເມືອງ, ກໍ່ສ້າງສະໜາມບິນ ປັດຈຸບັນສຳເລັດແລ້ວ 95% ຄາດວ່າຈະໃຫ້ສຳເລັດ ໃນປີ 2020 ນີ້, ສ້າງທາງດ່ວນແຕ່ຫ້ວຍຊາຍ-ບໍ່ເຕັນ. ພ້ອມກັນນີ້, ພວມເລັ່ງກໍ່ສ້າງທ່າເຮືອຢູ່ເມືອງຫ້ວຍຊາຍ, ກໍ່ສ້າງຕາຝັ່ງເຈື່ອນ ແລະ ພັດທະນາແຫລ່ງທ່ອງທ່ຽວຕ່າງໆ ເພື່ອເຮັດໃຫ້ການສັນຈອນໄປ-ມາ ແລະ ການຂົນສົ່ງສິນຄ້າ ລະ ຫວ່າງປະເທດ ແລະ ລະຫວ່າງແຂວງຕໍ່ແຂວງ ມີຄວາມສະດວກສະບາຍ, ວ່ອງໄວ.

ທ່ານ ກ່າວຕື່ມວ່າ: ສຳລັບການດຶງດູດການລົງທຶນຂອງບັນດານັກທຸລະກິດ ທັງພາຍໃນ ແລະ ຕ່າງປະເທດ ໂດຍທາງແຂວງບໍ່ແກ້ວ ໄດ້ເອື້ອອຳນວຍຄວາມສະດວກໃຫ້ບັນດານັກລົງທຶນດັ່ງກ່າວ ໄດ້ເຂົ້າມາສຳຫລວດ ແລະ ພັດທະນາ ເປັນຕົ້ນ ໂຄງການພັດທະນາແຫລ່ງທ່ອງທ່ຽວ, ເຂດສົ້ນຂົວມິດຕະພາບ, ສູນການຄ້າ-ການທ່ອງທ່ຽວ. ພ້ອມກັນນີ້, ຢູ່ເຂດເສດຖະກິດພິເສດ ກໍໄດ້ຊຸກຍູ້ສົ່ງເສີມໃຫ້ເຂົາເຈົ້າ ໄດ້ມີການພັດທະນາ ແລະ ໄດ້ຈັດກອງປະຊຸມຖອດຖອນບົດຮຽນ ແລກປ່ຽນລະຫວ່າງ ແຂວງພາກເໜືອຂອງລາວ ກັບແຂວງຢູນນານ ຂອງ ສປ ຈີນ, ໄດ້ສົ່ງເສີມໃຫ້ນັກທຸລະກິດໄດ້ຈັບຄູ່ເຊັນສັນຍາລະຫວ່າງການຄ້ານຳກັນ ແລະ ມີການເປີດຕະຫລາດນັດຮ່ວມວາງສະແດງ ແລະ ຈຳໜ່າຍສິນຄ້າ ໂດຍມີ ສປ ຈີນ, ໄທ ແລະ ຫວຽດນາມ.

ໃນປີ 2020 ແຂວງບໍ່ແກ້ວ ໄດ້ມີຫລາຍໂຄງການ ທີ່ຈະເຂົ້າມາລົງທຶນຢູ່ພາຍໃນແຂວງ ເປັນຕົ້ນ ໂຄງການກໍ່ສ້າງຕາຝັ່ງເຈື່ອນ, ໂຄງການກໍ່ສ້າງເສັ້ນທາງແຕ່ສົ້ນຂົວກ້ອນຕື້ນ-ເມືອງຫ້ວຍຊາຍ, ໂຄງການລ້ຽງງົວ ເພື່ອສົ່ງອອກຈີນ, ໂຄງການປູກຢາພື້ນເມືອງ, ໂຄງການສ້າງແຫ່ງທ່ອງທ່ຽວອ່າງນ້ຳຕິ່ງ, ໂຄງການກໍ່ສ້າງແຫລ່ງທ່ອງທ່ຽວບໍ່ນ້ຳຮ້ອນຕຸ້ມເລາະ ແລະ ໂຄງການຜະລິດພືດກະສິກຳປອດສານພິດ. ຖ້າຫາກບັນດາໂຄງການດັ່ງກ່າວສຳເລັດ ຕາມແຜນ ກໍຈະເຮັດໃຫ້ເສຖະກິດຂອງແຂວງບໍ່ແກ້ວ ດີຂຶ້ນກວ່າເກົ່າ.

Medialaos