ໃນວັນທີ 26 ທັນວາ 2019, ຫ້ອງວ່າການປະທານປະເທດ ໄດ້ຈັດຕັ້ງເຜີຍແຜ່ວັນຕ້ານການສໍ້ລາດບັງຫລວງສາກົນ ຄົບຮອບ 16 ປີ ແລະ ເຜີຍແຜ່ນິຕິກຳຂອງພັກຈຳນວນໜຶ່ງ ໃຫ້ກຽດເຜີຍແຜ່ໂດຍ, ທ່ານ ເພັດສະໝອນ ພັນທະວົງ ຮອງລັດຖະມົນຕີ, ຮອງຫົວໜ້າຫ້ອງວ່າການປະ ທານປະເທດ, ມີບັນດາສະມາຊິກພັກ, ພະນັກງານ-ລັດຖະກອນ ພາຍໃນຫ້ອງວ່າການປະທານປະເທດ ເຂົ້າຮ່ວມ.

ທ່ານ ໄດ້ຍົກໃຫ້ເຫັນເຖິງການສໍ້ລາດບັງຫລວງ ເຊິ່ງແມ່ນສະພາບຫຍໍ້ທໍ້ໜຶ່ງທີ່ເກີດຂຶ້ນ ໃນກົງຈັກການຈັດຕັ້ງ, ເປັນໄພອັນຕະລາຍ ທີ່ສົ່ງຜົນກະທົບ ແລະ ກົດໜ່ວງທ່ວງດຶງການພັດທະນາເສດຖະກິດ-ສັງຄົມ ຂອງແຕ່ລະປະເທດໃນໂລກ ບໍ່ວ່າຈະເປັນປະເທດນ້ອຍ, ໃຫຍ່, ຮັ່ງມີ ຫລື ທຸກຈົນ ກໍລ້ວນແຕ່ມີຜົນກະທົບເຊັ່ນດຽວກັນ, ການສໍ້ລາດບັງຫລວງເປັນໄພຂົ່ມຄູ່ ເຖິງຄວາມມີສະຖຽນລະພາບ ຂອງການຈັດຕັ້ງທັງພາກລັດ ແລະ ເອກະຊົນ, ເປັນການຕັດຮອນເອົາລາຍໄດ້ຂອງຊາດ, ເອົາງົບປະມານໃນໂຄງການຕ່າງໆຂອງລັດ ໃນນັ້ນເປັນການສະແດງອອກ ຢ່າງເປີດແປນຂອງ ການຂາດຄຸນນະທຳ, ຂາດຈັນຍາບັນຂອງ ພະນັກງານ-ລັດຖະກອນ, ທະຫານ, ຕ່ຳຫລວດ ໃນອົງການຈັດຕັ້ງລັດ-ເອກະຊົນ ໂດຍເຫັນໄດ້ຜົນສະທ້ອນ ອັນໃຫຍ່ຫລວງ ແລະ ໄພອັນຕະລາຍທີ່ຮ້າຍແຮງດັ່ງກ່າວ, ພັກ-ລັດຖະບານ ແຫ່ງ ສປປ ລາວ ຈຶ່ງຖືສຳຄັນ ແລະ ເອົາໃຈໃສ່ຕໍ່ກັບການສະກັດກັ້ນ ແລະ ຕ້ານການສໍ້ລາດບັງຫລວງ, ຖືວຽກງານນີ້ເປັນໜ້າທີ່ ແລະ ຄວາມຮັບຜິດຊອບຂອງພັກ-ລັດ ແລະ ອົງການຈັດຕັ້ງທຸກຂັ້ນ.

ນອກນັ້ນ, ພັກ-ລັດ ຍັງໄດ້ເອົາໃຈໃສ່ວາງນະໂຍບາຍ, ອອກມະຕິ, ຄຳສັ່ງ ວ່າດ້ວຍວຽກງານກວດກາສະກັດກັ້ນ ແລະ ຕ້ານການສໍ້ລາດບັງຫລວງ ແລະ ນິຕິກຳອື່ນໆ ເພື່ອເປັນບ່ອນອີງ ໃນການສຶກສາອົບຮົມ ພະນັກງານ-ລັດຖະກອນ, ທະຫານ, ຕ່ຳຫລວດ ແລະ ປະຊາຊົນ ຊັ້ນຄົນຕ່າງໆ ໃຫ້ຮັບຮູ້, ເຂົ້າໃຈ, ເຫັນໄດ້ຜົນຮ້າຍ ແລະ ໄພອັນຕະລາຍ ຂອງການສໍ້ລາດບັງຫລວງ. ພ້ອມດຽວກັນ, ທ່ານ ເພັດສະໝອນ ພັນທະວົງ ຍັງໄດ້ເຜີຍແຜ່ມະຕິຂອງກົມການເມືອງສູນກາງພັກ ວ່າດ້ວຍລະບອບການຮ່ຳຮຽນ ທິດສະດີການເມືອງ ຕື່ມອີກ

ໂອກາດດຽວກັນ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ, ຮອງຫົວໜ້າຫ້ອງວ່າ ການປະທານປະເທດ ກໍໄດ້ເຜີຍແຜ່ມະຕິວ່າດ້ວຍ ການສ້າງແຜນ ກໍ່ສ້າງ-ບຳລຸງ ພະນັກງານນຳພາ-ຄຸ້ມຄອງ, ຂໍ້ກຳນົດ ຂອງຄະນະເລຂາທິການສູນກາງພັກ ວ່າດ້ວຍການຢັ້ງຢືນລະດັບທິດສະດີ ການເມືອງ ແລະ ຄຳແນະນຳຂອງ ຄະນະ ຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດມະຕິ ຂອງກົມການເມືອງສູນກາງພັກ ວ່າດ້ວຍລະບອບຮ່ຳຮຽນທິດສະດີການເມືອງ, ການສ້າງແຜນ ກໍ່ສ້າງ-ບຳລຸງພະນັກງານນຳພາ-ຄຸ້ມຄອງ ແລະ ຂໍ້ກຳນົດຂອງຄະນະເລຂາທິການສູນກາງພັກ ການຢັ້ງຢືນລະດັບທິດສະດີການເມືອງ ຕື່ມອີກ

Medialaos