ໃນ​ວັນທີ 25 ທັນວາ 2019  ສະຫາຍ ບຸນ​ທອງ ຈິດ​ມະນີ​ ກໍາມະການ​ກົມ​ການ​ເມືອງ​ສູ​ນກາງ​ພັກ, ຄະນະເລຂາທິການສູນກາງພັກ, ຮອງ​ນາຍົກ​ລັດຖະມົນຕີ, ປະທານ​ຄະນະ​ກວດກາ​ສູນ​ກາງ​ພັກ, ປະທານ​ອົງການ​ກວດກາລັດຖະບານ ແລະ ຫົວໜ້າອົງການຕ້ານການ ສໍ້ລາດບັງຫລວງຂັ້ນສູນກາງ, ຫົວໜ້າຄະນະຊີ້ນໍາໂຄງການ ກໍ່ສ້າງທາງລົດໄຟລາວ-ຈີນ ພ້ອມຄະນະ ໄດ້ໄປຢ້ຽມຢາມ ແລະ ຊຸກຍູ້ວຽກງານ ການກະກຽມກອງປະຊຸມໃຫຍ່ 3 ຂັ້ນຂອງພັກ ແລະ ຊຸກຍູ້ການກໍ່ສ້າງທາງລົດໄຟ ໂຄງການກໍ່ສ້າງທາງ ລົດໄຟ ລາວ-ຈີນ ຢູ່ ແຂວງ ຫລວງນໍ້າທາ, ໂດຍມີ ສະຫາຍ  ບຸນຍີ່ ແກ້ວຄູນເມືອງ ຮອງເລຂາພັກແຂວງ, ຮອງເຈົ້າແຂວງຫລວງນໍ້ທາ, ຄະນະປະຈໍາ, ຄະນະພັກ, ພະນັກງານ ຫລັກແຫລ່ງ, ພະນັກງານທີ່ກ່ຽວຂ້ອງ ຕ້ອນຮັບ ແລະ ຮ່ວມເຮັດວຽກ.

ໄດ້ຮັບຟັງການລາຍງານ ສະພາບການພັດທະນາ ເສດຖະກິດ-ສັງ ຄົມຂອງແຂວງ ແລະ ສະພາບການກະກຽມ ດໍາເນີນກອງປະຊຸມໃຫຍ່ 3 ຂັ້ນ ຈາກສະຫາຍ ບຸນຍີ່  ແກ້ວຄູນເມືອງ ຮອງເລຂາພັກແຂວງ, ຮອງເຈົ້າແຂວງຫລວງນໍ້າທາ. ການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກເມືອງ ແລະ 02 ກອງບັນຊາການ ທາງດ້ານຂະບວນການ ຄະນະປະຈຳພັກແຂວງ ໄດ້ຊີ້ນຳຊຸກຍູ້ຂະບວນການ ຮອບດ້ານໃນທົ່ວອົງຄະນະພັກເມືອງ ໂດຍເອົາການສູ້ຊົນປະຕິບັດບັນດາ ຄາດໝາຍທີ່ກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ ຂອງອົງຄະນະພັກແຂວງ ຄັ້ງທີ VII ຢ່າງເປັນຂະບວນຟົດຟື້ນ.

ສ່ວນໂຄງການກໍ່ສ້າງທາງລົດໄຟ ລາວ-ຈີນ ທ່ານ ທອງແດງ ສິດທິສົນ ຫົວໜ້າຄະນະກໍາມະການໄກ່ເກຍ, ເບີກຈ່າຍຄ່າຊົດເຊີຍຜົນກະທົບ ຈາກໂຄງການກໍ່ສ້າງທາງລົດໄຟ ລາວ-ຈີນ ຊ່ວງຜ່ານແຂວງຫລວງນໍ້າທາ ລາຍງານໃຫ້ຮູ້ວ່າ: ທາງລົດໄຟ ລາວ-ຈີນ ມີຄວາມຍາວທັງໝົດ 409 ກິໂລແມັດ, ໃນນີ້ ຜ່ານແຂວງ ຫລວງນໍ້າທາ 16,9 ກິໂລແມັດ ປະກອບມີ 2 ສະຖານນີ ຄື: ສະຖານີ ບໍ່ເຕ່ນ ແລະ ສະຖານີ ນາເຕີຍ, ກໍ່ສ້າງ ອຸໂມງ 3 ແຫ່ງ ຄື: ອຸໂມງມິດຕະພາບລາວ-ຈີນ, ອຸໂມງ ບໍ່ເຕ່ນ ແລະ ອຸໂມງ ຕີນຕົກ ມີຄວາມຍາວທັງໝົດ 10.051,5 ແມັດ, ເຈາະໄດ້ 9.362,1 ແມັດເທົ່າກັບ 93,1 ສ່ວນຮ້ອຍ. ມາເຖິງປັດຈຸບັນ ບໍລິສັດ ກໍ່ສ້າງ ທາງລົດໄຟເລກ 5 ແລະ ບໍລິສັດ ກໍ່ສ້າງທາງລົດໄຟເລກ 2 (ຜູ້ຮັບເໝົາກໍ່ສ້າງ ຈາກສປ ຈີນ ທີ່ກໍ່ສ້າງ ສັນຍາຊ່ວງທີ 1) ໄດ້ສໍາເລັດການເຈາະອຸໂມງແລ້ວ 2 ແຫ່ງ ຄື: ອຸໂມງ ບໍ່ເຕ່ນ ແລະ ອຸໂມງຫີນຕົກ. ສ່ວນວຽກງານໄກ່ເກ່ຍແກ້ໄຂ ຜົນກະທົບຄະນະກຳມະການໄກ່ເກ່ຍ ຂັ້ນແຂວງ, ເມືອງ ກໍ່ໄດ້ເອົາໃຈໃສ ແລະ ມີຜົນຢ່າງຕໍ່ເນື່ອງ ມາຮອດທ້າຍເດືອນກັນຍາ ປີ 2019 ກໍ່ສາມາດມອບພື້ນທີ່ ໃຫ້ໂຄງການໄດ້ດໍາເນີນການກໍ່ສ້າງ 100% ຂອງແລວທາງລົດໄຟ ທີ່ມີຄວາມຍາວທັງໝົດ 16,9 ກິໂລແມັດ ທີ່ເສັ້ນທາງລົດໄຟ ລາວ-ຈີນ ຜ່ານແຂວງຫລວງນໍ້າທາ ສໍາລັບຄວາມຄືບໜ້າໃນການກໍ່ສ້າງ ທາງລົດໄຟ ລາວ-ຈີນ ຊ່ວງຜ່ານແຂວງຫລວງນໍ້າທາ ມາເຖິງປັດຈຸບັນ ສໍາເລັດແລ້ວ 89% ໃນນັ້ນຍັງບໍ່ທັນລວມວຽກ ຕິດຕັ້ງລາງລົດໄຟຟ້າ ແລະ ລະບົບໄຟຟ້າເພື່ອສະໜອງໃຫ້ລົດໄຟ. ຈາກນັ້ນສະຫາຍ ໄດ້ນຳພາຄະນະເດີນທາງຢ້ຽມຢາມ, ກວດກາການກໍ່ສ້າງຕົວຈິງ ແລະ ຊຸກຍູ້ການກໍ່ສ້າງທາງລົດໄຟ ຢູ່ສະຖານີບໍ່ເຕ່ນ ແລະ ສະຖານີນາເຕີມ ຕື່ມອີກ.

Medialaos