ພິທີປະກາດຮັບຮອງໜ່ວຍສະຫະພັນແມ່ຍິງພະແນກກະສິກຳ ແລະປ່າໄມ້ (ກປຂ) ເຊກອງ ເປັນໜ່ວຍຮາກຖານສະຫະພັນແມ່ຍິງ 3 ດີໄລຍະ II ປະຈໍາປີ 2018-2019 ໄດ້ຈັດຂຶ້ນໃນວັນທີ 26 ທັນວາ 2019 ນີ້ ໂດຍການເຂົ້າຮ່ວມຂອງທ່ານ ນາງ ເພັດດາແກ້ວ ພົນສາລາດ ຮອງປະທານສະຫະພັນແມ່ຍິງແຂວງ; ທ່ານ ສູນທອນ ພິມມະວົງສາ ຮອງເລຂາຄະນະພັກຮາກຖານພະແນກ ກປຂ; ພ້ອມດ້ວຍຄະນະໜ່ວຍ ແລະສະມາຊິກສະຫະພັນແມ່ຍິງ, ອົງການຈັດຕັ້ງມະຫາຊົນ ແລະແຂກຖືກເຊີນເຂົ້າຮ່ວມ.

ໃນພິທີ ທ່ານ ນາງ ນຸພາພອນ ໄມນີທອງ ປະທານໜ່ວຍຮາກຖານສະຫະພັນແມ່ຍິງ ພະແນກ ກປຂ ໄດ້ຍົກໃຫ້ເຫັນການຊີ້ນໍາໆພາຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີ ຕາມ 4 ບາດກ້າວ ຕິດພັນກັບວຽກງານວິຊາສະເພາະ ຊຶ່ງຍາມໃດຄະນະໜ່ວຍ ກໍໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກສະຫະພັນແມ່ຍິງພາຍໃນໜ່ວຍຢ່າງເປັນປົກກະຕິຕໍ່ເນື່ອງ ດ້ວຍການຈັດຕັ້ງເຊື່ອຊຶມບັນດາເອກະສານສໍາຄັນຕ່າງໆ ດ້ວຍຫລາຍຮູບແບບ

ໂດຍສະເພາະແມ່ນເນື້ອໃນຂໍ້ແຂ່ງຂັນ 3 ດີທີ່ສູນກາງ ສຍ ລາວວາງອອກ ອັນໄດ້ເຮັດໃຫ້ສະມາຊິກມີຄວາມຮັບຮູ້, ເຂົ້າໃຈ ແລະ ພ້ອມກັນປະຕິບັດຂໍ້ແຂ່ງຂັນດັ່ງກ່າວ ຈົນສາມາດຍາດໄດ້ຜົນສໍາເລັດຫຼາຍໆດ້ານ, ສ້າງຕັ້ງກຸ່ມທ້ອນເງິນ ມີສະມາຊິກ 43 ສະຫາຍ, ມີເງິນທ້ອນທັງໝົດ 6 ລ້ານກວ່າກີບ, ປ່ອຍເງິນກູ້ 3 ລ້ານກີບ, ສ້າງຄັງຂອງຫນ່ວຍ ມີເງິນຄ້າງຄັງ 3 ລ້ານກວ່າກີບ, ປຸກລະດົມສະມາຊິກສ້າງເສດຖະກິດຄອບຄົວ, ເຊິ່ງມີ 19 ຄອບຄົວເປັນແບບຢ່າງໃນການສ້າງເສດຖະກິດຄອບຄົວດ້ວຍກິດຈະກຳຕ່າງໆຕາມທ່າແຮງ ເຮັດໃຫ້ມີລາຍຮັບແຕ່ 3-200 ລ້ານກີບຕໍ່ປີ; ຊຶ່ງພາຍໃນໜ່ວຍມີສະມາຊິກທັງໝົດ 58 ສະຫາຍ, ໃນນີ້ ຄັດເລືອກໄດ້ສະມາຊິກ 3 ດີ ປະເພດ I ຈໍານວນ 59 ສະຫາຍ ກວມເອົາ 100% ຂອງສະມາຊິກເຂົ້າຮ່ວມແຂ່ງຂັນທັງໝົດ; ພ້ອມດຽວກັນນີ້ຍັງໄດ້ເປີດບັ້ນເຊື່ອມຊຶມ, ແຂ່ງຂັນ 3 ດີ ປີ 2020 ຕື່ມອີກ.

Medialaos