ໃນວັນທີ 26 ທັນວາ 2019 ນີ້ ຢູ່ທີ່ສະໂມສອນເມືອງອາດສະພອນ ແຂວງສະຫວັນນະເຂດ, ໄດ້ມີການເປີດກອງປະຊຸມການປະເມີນການປະຕິບັດວຽກງານວຽກງານຂອງລັດຖະກອນຂັ້ນເມືອງ(ເຈົ້າເມືອງ ແລະຮອງເຈົ້າເມືອງ) ຂື້ນໂດຍການເຂົ້າຮ່ວມຂອງ ທ່ານ ປອ ໂພໄຊ ໄຊຍະສອນ ກຳມະການສຳຮອງສູນກາງພັກ ຮອງເລຂາພັກແຂວງ ຮອງເຈົ້າແຂວງສະຫວັນນະເຂດ, ມີ ທ່ານ ຄຳແພງ ເພັດທຸມພອນ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ທ່ານ ປອ ແສງທອງ ວັງແກ້ວມະນີ ກຳມະການພັກແຂວງ ເລຂາພັກນະຄອນໄກສອນພົມວິຫານ(ອະດີດເຈົ້າເມືອງອາດສະພອນ), ມີບັນດາທ່ານຮອງເລຂາພັກເມືອງ, ຮອງເຈົ້າເມືອງ, ຄະນະປະຈຳພັກເມືອງ, ກຳມະການພັກເມືອງ ເຂົ້າຮ່ວມ.

ໂອກາດນີ້ ທ່ານ ສີພັນ ສຸວັນນະສານ ຮອງເລຂາພັກເມືອງ ຮອງເຈົ້າເມືອງ ກໍ່ໄດ້ຜ່ານບົດລາຍງານການຈັດຕັ້ງປະຕິບັດວຽກງານ ປະຈຳປີ 2019 ໂດຍສັງເຂບ, ໃນທົ່ວເມືອງອາດສະພອນ ປະກອບມີ 70 ບ້ານ, ພົນລະເມືອງທັງໝົດ 64.762 ຄົນ, ຍິງ 32.830 ຄົນ, ມີ 10.315 ຫຼັງຄາ, ມີ 12.544 ຄອບຄົວ, ປະຊາກອນສ່ວນຫຼາຍແມ່ນຖືເອົາການເຮັດນາ ປູກຝັງ-ລ້ຽງສັດເປັນອາຊີບຕົ້ນຕໍ, ຖືເອົາການຄ້າຂາຍ ແລະ ການບໍລິການເປັນອາຊີບສຳຮອງ, ເມືອງອາດສະພອນ ຍັງມີຂໍ້ຈຳກັດ ແລະ ສິ່ງທ້າທາຍຫຼາຍປະການເຊັ່ນ: ການດຳລົງຊີວິດຂອງພໍ່ແມ່ປະຊາຊົນແມ່ນອີງໃສ່ທຳມະຊາດເປັນສ່ວນໃຫຍ່, ລະດັບຄວາມຮູ້ທາງດ້ານຜະລິດແມ່ນບໍ່ທັນສູງ, ດ້ານພື້ນຖານໂຄງລ່າງຍັງບໍທັນໄດ້ຮັບການພັດທະນາເທົ່າທີ່ຄວນ ເປັນຕົ້ນແມ່ນ ລະບົບຊົນລະປະທານ ເໝືອງຝາຍຍັງມີໜ້ອຍ, ເສັ້ນທາງຄົມມະນາຄົມຍັງມີຄວາມຫຍຸ້ງຍາກພໍສົມຄວນ, ການຜະລິດກະສິກຳແມ່ນສະມັດຕະພາບຍັງບໍ່ສູງເທົ່າທີ່ຄວນ, ການສົມທົບທຶນຮອນ ແລະ ການພັດທະນາຍັງມີຂໍ້ຈຳກັດ; ການຊີ້ນຳ-ນຳພາວຽກງານແຕ່ລະດ້ານໃນໄລຍະຜ່ານມາ ແມ່ນໄດ້ເອົາໃຈໃສ່ຊີ້ນຳຢ່າງໃກ້ສິດຕິດແທດ ໃນທຸກຂົງເຂດ ໂດຍສະເພາະວຽກງານການພັດທະນາທາງດ້ານເສດຖະກິດ ໃນສົກປີຜ່ານມາ ລວມຍອດຜະລິດຕະພັນພາຍໃນ GDP ບັນລຸໄດ້ 793,06 ຕື້ກີບ, ສະເລ່ຍໃສ່ຫົວຄົນຜູ້ໜຶ່ງໄດ້ຮັບ 12 ລ້ານກວ່າກີບ ຫຼືເທົ່າກັບ 1.433 ໂດລາ/ຄົນ/ປີ, ອັດຕາການເຕີບໂຕຂອງເສດຖະກິດ 6,60%ຕໍ່ປີ.

ສຳລັບເປົ້າໝາຍສູ້ຊົນ ແລະ ທິດທາງລວມໃນຕໍ່ໜ້າ ແມ່ນຈະໄດ້ສືບຕໍ່ຈັດຕັ້ງປະຕິບັດຄຳສັ່ງເລກທີ 348/ລບ ແລະ ບົດແນະນຳ0830/ກປ ວ່າດ້ວຍມາດຕະຖານຄອບຄົວພົ້ນທຸກ ແລະ ມາດຕະຖານຄອບຄົວພັດທະນາ, ສືບຕໍ່ປັບປຸງກໍ່ສ້າງພື້ນຖານໂຄ່ງລ່າງ ເປັນຕົ້ນ: ສຳນັກງານຫ້ອງການ, ໂຮງຮຽນ, ໂຮງໝໍ, ສຸກສາລາ, ຫ້ອງການຈຸດສຸມ-ກຸ່ມບ້ານ, ຫ້ອງການບ້ານ, ເສັ້ນທາງ ແລະ ຂົວ ໂດຍອີງໃສ່ຈຸດພິເສດທ່າແຮງຕົງຈິງທີ່ມີຂອງກົມກອງທ້ອງຖິ່ນ. ໃນກອງປະຊຸມກໍ່ຍັງໄດ້ຮັບຟັງການອະທິບາຍການໃຫ້ຄະແນນໃນການປະເມີນ, ພ້ອມນັ້ນ ກໍ່ໄດ້ຮັບຟັງການຜ່ານບົດເກັບກ່ຽວຜົນງານໃນໄລຍະປີ 2019 ຈາກທ່ານເຈົ້າເມືອງ ແລະ ຮອງເຈົ້າເມືອງ.

ໃນຕອນທ້າຍຂອງກອງປະຊຸມ ທ່ານ ປອ ໂພໄຊ ໄຊຍະສອນ ກໍ່ໄດ້ໃຫ້ກຽດມີຄຳເຫັນໂອ້ລົມ ໂດຍທ່ານກໍ່ໄດ້ກ່າວຍ້ອງຍໍຊົມເຊີຍ ຜົນງານການຊີ້ນໍາ-ນໍາພາຂອງຄະນະນຳຂັ້ນເມືອງໃນໄລຍະຜ່ານມາ ເຊິ່ງສະແດງອອກໃຫ້ເຫັນເຖິງຜົນງານ ແລະ ຜົນສຳເລັດໃນການພັດທະນາເສດຖະກິດ-ສັງຄົມຂອງເມືອງ ແຕ່ຖ້າທຽບໃສ່ຄວາມຮຽກຮ້ອງຕ້ອງການຂອງຍຸກສະໄໝປັດຈຸບັນ ເຫັນວ່າຍັງມີອີກຫຼາຍດ້ານທີ່ຈະຕ້ອງເສີມຂະຫຍາຍຂື້ນຕື່ມເຊັ່ນ: ດ້ານການພັດທະນາເສດຖະກິດ-ສັງຄົມ, ສະພາບເສດຖະກິດຄອບຄົວ ແລະການເປັນຢູ່ຂອງປະຊາຊົນ ຈະຕ້ອງໄດ້ຊຸກຢູ່ສົ່ງເສີມທາງດ້ານຜະລິດ ໃຫ້ມີການຜະລິດເປັນສິນຄ້າໃຫ້ຫຼາຍຂື້ນ ໂດຍຊອກຈະຕ້ອງໄດ້ຊອກຕະຫຼາດ ແລະ ແຫຼ່ງທຶນຕອບສະໜອງໃຫ້ເຂົາເຈົ້າ ເພື່ອຊຸກຢູ້ໃຫ້ພໍ່ແມ່ປະຊາຊົນຫຼຸດພົ້ນອອກຕາກຄວາມທຸກຍາກ ແລະມີຊີວິດການເປັນຢູ່ທີ່ດີຂື້ນກວ່າເກົ່າ.

Medialaos