ພິທີມອບ-ຮັບ ໂຄງການກໍ່ສ້າງເສັ້ນທາງບ້ານແດນສະຫວັນ ເມືອງເຊໂປນ ແຂວງສະຫວັນນະເຂດ ໄດ້ຈັດຂຶ້ນໃນຕອນເຊົ້າວັນທີ 26 ທັນວາ 2019 ທີ່ເຂດໂຄງການກໍ່ສ້າງເສັ້ນທາງ, ໂດຍການເຂົ້າຮ່ວມເປັນຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນະເຂດ ທັງເປັນປະທານຊີ້ນໍາໂຄງການຂັ້ນແຂວງ, ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ.

ທ່ານ ພົມມາ ວົງພະຈິດ ຫົວໜ້າໂຄງການພັດທະນາຕົວເມືອງຕາມແລວທາງເສດຖະກິດຕາເວັນອອກ-ຕາເວັນຕົກ ອະນຸພາກພື້ນແມ່ນ້ຳຂອງ ແຂວງສະຫວັນະເຂດ ຫຼື ໂຄງການ GMS ລາຍງານວ່າ: ໂຄງການດັ່ງກ່າວແມ່ນເງິນກູ້ຢືມ ແລະ ຊ່ວຍເຫຼືອລ້າຈາກທະນາຄານພັດທະນາອາຊີ ພ້ອມທັງທຶນສົມທົບຂອງລັດຖະບານລາວ,ລວມມູນຄ່າທັງໝົດ 47 ລ້ານ 7ແສນ 40 ພັນໂດລາສະຫະລັດ, ລວມມີ 7 ໜ້າວຽກໃນ 3 ເມືອງຂອງແຂວງສະຫວັນະເຂດຄື: ນະຄອນໄກສອນພົມວິຫານ ມີ 5 ໂຄງການຍ່ອຍຄື: ວຽກກໍ່ສ້າງຮ່ອງລະບາຍນ້ຳເປື້ອນ ແລະ ຕິດຕັ້ງໂປມສູບສົ່ງນ້ຳ ຫ້ວຍລົງກົງ, ກໍ່ສ້າງປັບປຸງຍົກລະດັບຖະໜົນໄກສອນ ພົມວິຫານ, ກໍ່ສ້າງປັບປຸງຍົກລະດັບຖະໜົນຟ້າງຸ່ມ, ປັບປຸງສະໜາມຂີ້ເຫຍື່ອທີ່ຖືກຫຼັກສຸຂະອະນາໄມ, ກໍ່ສ້າງສິ່ງອໍານວຍຄວາມສະດວກສໍາລັບການແຍກຂີ້ເຫຍື່ອ ແລະ ໂຮງງານຝຸ່ນບົ່ມ-ຈັດຊື້ອຸປະກອນພາຫະນະໃຫ້ແກ່ສະໜາມຂີ້ເຫຍື່ອ, ການກໍ່ສ້າງຄັນຄູກັນເຈື່ອນແມ່ນ້ຳຂອງຍາວ 980 ແມັດ ກ້ວາງ40ຫາ50 ແມັດ. ເມືອງພີນ ມີ 1 ໂຄງການຄື: ກໍ່ສ້າງຍົກລະດັບທາງປູຢາງໜຽວ 2 ຊັ້ນໃນເທດສະບານພ້ອມກັບຮ່ອງລະບາຍນ້ຳທາງຍ່າງ ແລະໄຟເຍືອງທາງ ຄວາມຍາວ 9 ກິໂລແມັດ ແລະ ກໍ່ສ້າງເສັ້ນທາງປູຢາງໜຽວ 2 ຊັ້ນ ພ້ອມກັບຮ່ອງລະບາຍນ້ຳ ທາງຍ່າງ ແລະໄຟເຍືອງທາງ ບ້ານແດນສະຫວັນ ເມືອງເຊໂປນ.

ຄວາມຄືບໜ້າທັງໝົດ 7 ໂຄງການ ໄດ້ 80ກວ່າສ່ວນຮ້ອຍ. ສໍາລັບໂຄງການກໍ່ສ້າງເສັ້ນທາງບ້ານແດນສະຫວັນ ໄດ້ເລີ່ມຕົ້ນສຶກສາຄວາມເປັນໄປໄດ້ແຕ່ປີ 2012 ຈາກນັ້ນກໍ່ມີການອອກແບບຄິດໄລ່ລະອຽດ ແລະມີການປະມູນ ໂດຍແມ່ນບໍລິສັດໜູຄໍາ ກໍ່ສ້າງຂົວທາງຈຳກັດ ເປັນຜູ້ຮັບເໝົາ ໃນມູນຄ່າ 2.312.000 ກ່ວາໂດລາສະຫະລັດ ແລະ ເລີ່ມຈັດຕັ້ງປະຕິບັດສັນຍາແຕ່ວັນທີ 27 ພະຈິກ 2017 ຫາວັນທີ 27 ພະຈິກ 2019 ແມ່ນໄດ້ສໍາເລັດການກໍ່ສ້າງ ເຊິ່ງໃຊ້ເວລາກໍ່ສ້າງທັງໝົດ 24 ເດືອນ. ນອກນັ້ນ ໂຄງການຍັງໄດ້ກໍ່ສ້າງເສັ້ນທາງເຂົ້າບ້ານອາໂລນຕື່ມອີກ 1 ເສັ້ນ ຍາວ 637 ແມັດ ມູນຄ່າ 2ແສນ 84 ພັນກ່ວາໂດລາສະຫະລັດ.

ທ່ານ ໜູຜາດ ທິລາວົງ ຜູ້ອຳນວຍການ ບໍລິສັດໜູຄຳ ກໍ່ສ້າງຂົວທາງ ຈຳກັດ ໄດ້ລາຍງານ ແລະ ກ່າວມອບໂຄງການກໍ່ສ້າງເສັ້ນທາງບ້ານແດນສະຫວັນ, ລວມມີການກໍ່ສ້າງ 14 ຕອນທາງ ມີລວງຍາວທັງໝົດ 3.884 ແມັດ, ຄວາມກ້ວາງໜ້າທາງ 5 ຫາ 7 ແມັດ, ປູຢາງ 2 ຊັ້ນ ສາມາດຮັບນ້ຳໜັກໄດ້ 9 ໂຕນກວ່າຕໍ່ເພົາ ແລະ ຄວາມໄວອອກແບບ 40 ກິໂລແມັດຕໍ່ຊົ່ວໂມງ. ສ້າງຮ່ອງລະບາຍນໍ້າ 2 ຂ້າງທາງແບບຮ່ອງປິດ ແລະ ເປີດ ເຮັດດ້ວຍເບຕົງເສີມເຫຼັກ, ຕິດຕັ້ງລະບົບຄວາມປອດໄພ ປ້າຍຈາລະຈອນ ແຕ້ມຂອບທາງ ແບ່ງຊ່ອງຈາລະຈອນຄົບຊຸດ. ຕິດຕັ້ງໄຟເຍືອງທາງລະບົບແສງຕາເວັນ 127 ຊຸດ ແລະ ປູກຕົ້ນໄມ້ປະດັບສອງຂ້າງທາງທັງໝົດ 486 ຕົ້ນ.

ຈາກນັ້ນຕອນທ້າຍຂອງພິທີ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນະເຂດ, ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ພ້ອມດວ້ຍ ຫົວໜ້າກົມເຄຫະຜັງເມືອງ ກະຊວງໂຍທາທິການ ແລະ ຂົນສົ່ງ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງສະຫວັນະເຂດ, ຫົວໜ້າໂຄງການພັດທະນາຕົວເມືອງຕາມແລວທາງເສດຖະກິດຕາເວັນອອກ-ຕາເວັນຕົກ ອະນຸພາກພື້ນແມ່ນ້ຳຂອງ ແຂວງສະຫວັນະເຂດ ຫຼື ໂຄງການ GMS ແລະ ຜູ້ອຳນວຍການ ບໍລິສັດໜູຄຳ ກໍ່ສ້າງຂົວທາງ ຈຳກັດ,ກໍ່ໄດ້ຮວ່ມກັນຕັດແຖບຜ້າເປີດນໍາໃຊ້ເສັ້ນທາງບ້ານແດນສະຫວັນຢ່າງເປັນທາງການ,ໂດຍຊ່ອງໜ້າຈາກແຂກທີ່ເຂົ້າຮ່ວມ.

Medialaos