ກົມສື່ມວນຊົນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ພະແນກ ຖວທ ແຂວງຄຳມ່ວນ ໄດ້ຈັດກອງປະຊຸມເຜີຍແຜ່ ແລະ ເຊື່ອມຊຶມກົດໝາຍວ່າດ້ວຍສື່ມວນຊົນ (ສະບັບປັບປຸງ) ຂຶ້ນໃນວັນທີ 27 ທັນວາ 2019, ທີ່ຫ້ອງປະຊຸມວິທະຍຸກະຈາຍສຽງ ແຂວງຄຳມ່ວນ. ເຂົ້າຮ່ວມເປັນປະທານກອງປະຊຸມຄັ້ງນີ້ ໂດຍທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງມີບັນດາຫົວໜ້າກົມ, ຮອງກົມທີ່ກ່ຽວຂ້ອງຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຄະນະພະແນກ ຖວທ ແຂວງ, ຜູ້ຕາງໜ້າຈາກພະແນກອ້ອມຂ້າງ ແລະ ວິຊາການ ພາຍໃນແຂວງຄໍາມ່ວນເຂົ້າຮ່ວມທັງໝົດ 70 ກວ່າທ່ານ.

ກອງປະຊຸມຄັ້ງນີ້ ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ປະກອບຄຳເຫັນ ແລະ ໃຫ້ທິດຊີ້ນຳ, ຍົກໃຫ້ເຫັນຜົນໄດ້ຮັບ ເປັນຕົ້ນດ້ານດີ ບັນຫາ ແລະ ສິ່ງທ້າທາຍ ໃນການຈັດຕັ້ງປະຕິບັດກົດໝາຍສະບັບກ່ອນ, ຄວາມຈຳເປັນພາວະວິໄສໃນການປັບປຸງກົດໝາຍ, ບັນຫາຄວນເອົາໃຈໃສ່ໃນການເຊືອມຊຶມກົດໝາຍວ່າດ້ວຍສື່ມວນຊົນ (ສະບັບປັບປຸງ) ນີ້, ແນະນຳໃຫ້ຜູ້ເຂົ້າຮ່ວມປະຊຸມໄດ້ຮູ້ເຖິງຄວາມສຳຄັນຕໍ່ການໂຄສະນາເຜີຍແຜ່ຢ່າງກວ້າງຂວາງ, ພ້ອມທັງຕີລາຄາການຈັດຕັ້ງປະຕິ ບັດກົດໝາຍວ່າດ້ວຍສື່ມວນຊົນ, ເອົາໃຈໃສ່ແກ້ໄຂບັນຫາສິ່ງອຸດຕັນໃນການປະຕິບັດກົດໝາຍເປັນຕົ້ນຄວາມບໍ່ເຂົ້າ ໃຈຂອງຜູ້ເຮັດໜ້າທີ່ຄຸ້ມຄອງ, ຜູ້ປະກອບກິດຈະການ ແລະ ບັນຫາອື່ນໆ ໃນວຽກງານຖະແຫຼງຂ່າວ-ສື່ມວນຊົນ.

ນອກຈາກນີ້, ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ ກະຊວງຖວທ ກໍໄດ້ເຜີຍແຜ່ ກົດໝາຍວ່າດ້ວຍສື່ມວນຊົນ (ສະບັບປັບປຸງ) ເຊິ່ງປະກອບມີທັງໝົດ 9 ພາກ, 9 ໝວດ, 85 ມາດຕາ ໃນນີ້ມີມາດຕາ ຮັກສາເດີມ 28 ມາດຕາ, ປັບປຸງ 39 ມາດຕາ ແລະ ສ້າງໃໝ່ 18 ມາດຕາ. ເນື້ອໃນພື້ນຖານໃນກົດໝາຍສະບັບປັບປຸງນີ້ ຍັງຮັກສາຫຼັກການພື້ນຖານກ່ຽວກັບສື່ມວນຊົນ, ສ່ວນການປັບປຸງ ແລະ ເພີ່ມບັນດາມາດຕາໃໝ່ນັ້ນແມ່ນເພື່ອໃຫ້ສອດຄ່ອງກັບມະຕິຂອງກອງປະຊຸມໃຫຍ່ຄັ້ງທີ IX ແລະ X ຂອງພັກ,  ມະຕິຂອງກົມການເມືອງວ່າດ້ວຍວຽກງານ 3 ສ້າງ ກໍຄືລັດຖະທຳມະນູນສະບັບປັບປຸງໃໝ່, ແທດເໝາະແຜນພັດທະນາເສດຖະກິດ-ສັງຄົມຂອງລັດແລະ ການເຊື່ອມໂຍງສາກົນ. ນອກນັ້ນ, ກໍເພື່ອເຮັດໃຫ້ເນື້ອໃນຄົບຖວ້ນ, ກະທັດລັດ, ຮັດກຸມ ໂດຍສຸມໃສ່ກໍານົດໃຫ້ແຈ້ງຕື່ມກ່ຽວກັບນະໂຍບາຍຂອງລັດຕໍ່ວຽກງານສື່ມວນຊົນເຊັ່ນ: ການຈັດຕັ້ງ ແລະ ການເຄື່ອນໄຫວວຽກງານສື່ມວນຊົນ, ການເງິນຂອງສື່ມວນຊົນ, ບົດບາດຂອງສະມາຄົມນັກຂ່າວແຫ່ງ ສປປ ລາວ, ການຄຸ້ມຄອງ ແລະ ກວດກາສື່ມວນຊົນ ໂດຍສະເພາະແມ່ນສື່ແບບໃໝ່.

Medialaos