ຕອນເຊົ້າວັນທີ 26 ທັນວາ 2019 ຢູ່ສະໂມສອນຫ້ອງວ່າການເມືອງເຊໂປນ ແຂວງສະຫວັນນະເຂດ ຫ້ອງການສະຫະພັນແມ່ຍິງເມືອງເຊໂປນໄດ້ຈັດກອງປະຊຸມຄົບຄະນະບໍລິຫານງານສະຫະພັນແມ່ຍິງເມືອງເຊໂປນຄັ້ງທີ I ສະໄໝທີ IX ໄດ້ຈັດຂື້ນຢ່າງເປັນທາງການ ໂດຍພາຍໃຕ້ການເປັນປະທານຂອງ ທ່ານ ບຸນມາ ໄຊຍະກູລາງ ປະທານ ແນວລາວສ້າງຊາດເມືອງ ທັງເປັນຜູ້ຊີ້ນຳອົງການຈັດຕັ້ງມະຫາຊົນ, ທ່ານ ນາງ ພູທອງ ພົມມະຈັນ ປະທານສະຫະພັນແມ່ຍິງເມືອງມີບັນດາຄະນະບໍລິຫານງານສະຫະພັນແມ່ຍິງເມືອງ, ໜ່ວຍ, ຮາກຖານສະຫະພັນແມ່ຍິງບ້ານເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ນາງ ກອງສະໄຫມ ແວງຈະເລີນ ຮອງປະທານສະຫະພັນແມ່ຍິງເມືອງກໍ່ໄດ້ຂື້ນຜ່ານບົດສະຫຼຸບການເຄື່ອນໄຫວວຽກງານ 01 ປີ 2019 ແລະ ທິດທາງແຜນການ 01 ປີຕໍ່ໜ້າ 2020 ຂອງສະຫະພັນແມ່ຍິງເມືອງເຊໂປນ,ໃນໄລຍະການເຄື່ອນໄຫວວຽກງານໃນໄລຍະ 01 ປີຜ່ານມາຄະນະບໍລິຫານງານສະຫະພັນແມ່ຍິງເມືອງກໍ່ຄືສະຫະພັນແມ່ຍິງແຕ່ລະຂັ້ນໄດ້ຖືເອົາວຽກງານການສຶກສາອົບຮົມການເມືອງ ແນວຄິດເປັນວຽກງານສຳຄັນເຊິ່ງນຳໃຊ້ດ້ວຍຫຼາຍຮູບແບບ,ຫຼາຍວິທີການໃນການສຶກສາອົບຮົມເອື້ອຍນ້ອງແມ່ຍິງເປັນຕົ້ນໂດຍການເຂົ້າຮ່ວມການເຊື່ອມຊຶມມະຕິ ແລະ ເອກະສານສຳຄັນຕ່າງໆຂອງພັກ-ລັດ ໃນທົ່ວເມືອງມີແມ່ຍິງທັງຫມົດ 29,947 ຄົນ, ແມ່ຍິງອາຍຸ15ປີຂຶ້ນໄປມີ 10,988ຄົນ, ມີສະມາຊິກສະຫະພັນແມ່ຍິງທັງຫມົດ 10.542 ຄົນ , ກວມເອົາ 35% ຂອງແມ່ຍິງທັງໝົດ ແລະ ທິດທາງແຜນການຈະສືບຕໍ່ເຂົ້າຮ່ວມເຊື່ອມຊຶມແນວທາງນະໂຍບາຍຂອງພັກ, ລັດຖະທຳມະນູນ, ລະບຽບກົດໝາຍຂອງລັດ,ບັນດາມະຕິຄຳສັ່ງຕ່າງໆຂອງສູນກາງພັກ,ອົງຄະນະພັກແຕ່ລະຂັ້ນ ແລະ ອົງການຈັດຕັ້ງສະຫະພັນແມ່ຍິງ ແລະ ວຽກງານອື່ນໆ.

ໃນກອງປະຊຸມບັນດາແຂກເຂົ້າຮ່ວມກໍ່ໄດ້ຂື້ນແລກປ່ຽນປະກອບຄຳຄິດຄຳເຫັນໃສບົດສະຫຼຸບວຽກທີ່ຍັງບໍ່ຊອດຄ້ອງເພື່ອໃຫ້ເຮັດບົດສະຫຼຸບມີຄວາມຖືກຕ້ອງ ແລະ ຊັດເຈນຂື້ນ,ໃນຕອນທ້າຍ ທ່ານ ບຸນມາ ໄຊຍະກູລາງ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມວ່າ ເຊິ່ງທ່ານກໍ່ໄດ້ເຫັນດີເປັນເອກະພາບ ໃນບົດສະຫຼຸບດັ່ງກ່າວ ແລະ ເພິ່ນຍັງເນັ້ນໃສ່ 03 ເນື້ອໃນຄື:ຄວາມສາມັກຄີເປັນປຶກແຜ່ນແໜ້ນໜາ,ຄວາມເປັນເອກະພາບ ແລະ ແບບແຜນການນຳພາຂອງສະຫະພັນແມ່ຍິງຈົ່ງພ້ອມກັນເອົາໃຈໃສ່ຈັດຕັ້ງປະຕິບັດຕື່ມ ໂດຍສະເພາະຈັດຕັ້ງປະຕິບັດບ້ານທີ່ຢູ່ຫ່າງໄກຊອກຫຼີກໃຫ້ດີຂື້ນເປັນກ້າວໆ ແລະ ເອົາໃຈໃສ່ປົກປັກຮັກສາມູມມໍລະດົກ, ຮີດຄອງປະເພນີອັນເປັນມູມເຊື້ອດີງາມຂອງຊາດ,ຕ້ອງມີຄວາມສາມັກຄີ,ບໍລິສຸດ ແລະ ຊື່ສັດ ແລະ ຮຽກຮ້ອງໃຫ້ປະທານຄະນະບໍລິຫານງານສະຫະພັນແມ່ຍິງເອົາໃຈໃສ່ໃນການປົກປັກຮັກສາມູມເຊື້ອ,ວັດທະນະທຳ,ສີລະປະວັນນະຄະດີ,ຮີດຄອງປະເພນີໃຫ້ຄ່ຽງຄູ່ກັບຄົນລາວຊາດລາວຕະຫຼອດໄປ.

Medialaos