ກອງປະຊຸມໃຫຍ່ຜູ້ແທນອົງຄະນະພັກເມືອງປາກແຊງຄັ້ງທີ VI ໄດ້ໄຂຂຶ້ນຢ່າງເປັນທາງການ ໃນວັນທີ 30 ທັນວາ 2019 ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງສະຫາຍ ທອງສິງ ໄຊຍະສຸກ ຮັກສາການເລຂາພັກເມືອງປາກແຊງ ໃຫ້ກຽດເຂົ້າຮ່ວມສະຫາຍ ຄຳຂັນ ຈັນທະວີສຸກ ກຳມະການສູນກາງພັກ,ເລຂາພັກແຂວງ,ເຈົ້າແຂວງຫລວງພະບາງ,ມີຄະນະປະຈໍາພັກແຂວງ ພ້ອມດ້ວຍບັນດາສະມາຊິກພັກທີ່ເປັນຕົວແທນປະຊາຊົນໃນທົ່ວເມືອງເຂົ້າຮ່ວມ 98 ສະຫາຍ,ຍິງ 4 ສະຫາຍ.

ຕອນເຊົ້າເວລາ 6.00 ໂມງ ການນໍາຂອງເມືອງກໍ່ໄດ້ນໍາກະຕ່າດອກໄມ້ ເຂົ້າຂໍ່ານັບຮູບຫຼໍ່ ທີ່ອານຸສາວະລີປະທານ ໄກສອນ ພົມວິຫານ ຜູ້ນໍາທີ່ເຄົາລົບຮັກຂອງປະຊາຊົນລາວ,ຈາກນັ້ນທີ່ສະໂມສອນໃຫຍ່ຂອງເມືອງ ສະຫາຍ ທອງສິງ ໄຊຍະສຸກ ຮັກສາການເລຂາພັກເມືອງປາກແຊງ ໄດ້ກ່າວໄຂກອງປະຊຸມຂື້ນຢ່າງເປັນທາງການ.ພ້ອມທັງຜ່ານບົດລາຍງານການເມືອງ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໄລຍະຜ່ານມາ.

ກອງປະຊຸມຄັ້ງນີ້ຜູ້ແທນກອງປະຊຸມໄດ້ສຸມໃສ່ຄົ້ນຄ້ວາ,ພິຈາລະນາ ແລະ ປະກອບຄວາມຄິດເຫັນໃສ່ບັນດາຂົງເຂດວຽກງານໄລຍະຜ່ານມາ ແລະ ຮັບຮອງເອົາແຜນພັດທະນາເສດຖະກິດ-ສັງຄົມໄລຍະ 5 ປີ,ຕີລາຄາຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ,ມະຕິ VII ຂອງອົງຄະນະພັກແຂວງ ແລະ ມະຕິ V ຂອງອົງຄະນະພັກເມືອງປາກແຊງໄລຍະຜ່ານມາ.

ນອກນີ້ຍັງມີຕາງໜ້າຄອບຄົວຕົວແບບດ້ານກະສິກໍາ,ອຸສາຫະກໍາ ແລະ ດ້ານບໍລິການ ຂື້ນປະກອບຄໍາເຫັນ.ຈາກນັ້ນກອງປະຊຸມຄັ້ງນີ້ກໍ່ຈະໄດ້ປ່ອນບັດຄັດເລືອກເອົາຄະນະບລິຫານງານພັກເມືອງຊຸດໃໝ່. ແລະ ນອກນີ້ກໍ່ຈະໄດ້ຮັບຟັງຄໍາເຫັນຊີ້ນໍາຈາກ ສະຫາຍ ຄຳຂັນ ຈັນທະວີສຸກ ເລຂາພັກແຂວງ ແລະ ຂະບວນຕ່າງໆເຂົ້າອວຍພອນ ເພື່ອສ້າງບັນຍາກາດໃຫ້ກອງປະຊຸມມີຄວາມຟົດຟື້ນບັນດາກ້ອນກໍາລັງຕ່າງໆ ເປັນຕົ້ນແມ່ນກ້ອນກຳລັງປະກອບອາວຸດ,ຊາວຫນຸ່ມເຍົາວະຊົນ ແລະ ກ້ອນກຳລັງກຸ່ມພັກພະນັກງານປະຊາຊົນບັນດາເຜົ່າ.

ຂ່າວ: ເພັດສາຄອນ ສິມມະວົງ