ວັນທີ 27 ທັນວາ 2019. ຢູ່ທີ່ບ້ານນໍ້າຍາງ ເມືອງຫຼວງນໍ້າທາ ໄດ້ຈັດພິທີປະກາດຮັບຮອງບ້ານ ນໍ້າຍາງ ເມືອງຫຼວງນໍ້າທາ ເປັນບ້ານວັດທະນາທໍາ ແລະ ຈັດງານບຸນກິນຈຽງຂອງເຜົ່າອາຄາ. ໂດຍການເປັນປະທານຂອງທ່ານ ຄໍາມີ ນາຍບ້ານໆນໍ້າຍາງ, ເຂົ້າຮ່ວມຂອງທ່ານ ບຸນຄົງ ພິມມະສອນ ຮອງເຈົ້າເມືອງໆຫຼວງນໍ້າທາ, ທ່ານ ວຽງຄໍາ ໄຊຍະວົງ ຮອງຫົວໜ້າພະແນກ ຖະແຫຼງຂ່າວ, ວັດທະນາທໍາ ແລະ ທ່ອງທ່ຽວແຂວງ, ມີບັນດາຫົວໜ້າຫ້ອງ-ຮອງຫ້ອງການ ແຂກຖຶກເຊີນຕະຫຼອດຮອດປະຊາຊົນພາຍໃນບ້ານເຂົ້າຮ່ວມ.

ທ່ານ ທະວີພອນ ສີວິໄລແຮ່ຄໍາ ຮອງຫົວໜ້າຫ້ອງການຖະແຫຼງຂ່າວ, ວັດທະນທໍາ ແລະ ທ່ອງທ່ຽວເມືອງຫຼວງນໍ້າທາ ແລະ ທ່ານ ໂລເຊະ ຕ່າງໜ້າອົງການຈັດຕັ້ງ ບ້ານນໍ້າຍາງ ໄດ້ຜ່ານບົດສະຫຼຸບການຈັດຕັ້ງປະຕິບັດການສ້າງຄອບຄົວ, ບ້ານວັດທະນາທໍາ ແລະ ທິດທາງແຜນການໃນຕໍ່ໜ້າ. ບ້ານນໍ້າຍາງ ແມ່ນເຜົ່າອາຄາ ຕັ້ງຢູ່ເຂດຊົນນະບົດພູດອຍຫາງຈາກເທດສະບານເມືອງຫຼວງນໍ້າທາໄປທາງທິດຕາເວັນຕົກປະມານ 12 ກິໂລແມັດ,
ມີ 124 ຫຼັງຄາເຮືອນ, 153 ຄອບຄົວ, ມີພົນລະເມືອງ846 ຄົນ, ຍິງ 450 ຄົນ, ບ້ານ ນໍ້າຍາງ ແມ່ນໄດ້ມີເສັ້ນທາງລົດເຂົ້າເຖິງບ້ານ, ມີໄຟຟ້າ ແລະ ນໍ້າລິນໃຊ້, ມີໂຮງຮຽນປະຖົມ 1 ແຫຼ່ງ, ມີທີ່ດິນທໍາການຜະລິດພຽງພໍ, ປະຊາຊົນມີມູນເຊື້ອດຸໝັ່ນຂະຫຍັນພຽນ ໃນການຜະລິດກະສິກໍາເປັນສິນຄ້າ ສາມາດສ້າງເສດຖະກິດຄອບຄົວໃຫ້ມີຄວາມເຂັ້ມແຂງ ຈໍານວນຄອບຄົວພາຍໃນບ້ານແມ່ນກຸ້ມຢູ່ກຸ້ມກິນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

1 ປີຜ່ານມາສາມາດສ້າງລາຍຮັບຈາກການຂາຍເຄື່ອງປ່າຂອງ ດົງຕ່າງໆໄດ້ 1 ຕື້ 5 ຮ້ອຍ 38 ລ້ານກວ່າກີບ, ຂາຍເຄື່ອງປ່າຂອງດົງ 1 ຕື້ 5 ແສນກວ່າກີບ, ການຂາຍເຂົ້າ 94 ລ້ານກວ່າກີບ, ຂາຍຢາງພາລາ 980 ຮ້ອຍລ້ານ 8 ແສນກີບ, ໝາກແໜ່ງ 356 ລ້ານກີບ. ລວມລາຍຮັບທັງໜົດບ້ານໄດ້ 1 ຕື້ 500 ຮ້ອຍ38 ລ້ານກວ່າກີບ, ສະເລ່ຍຫົວຄົນ ໜື່ງໄດ້ 5 ລ້ານກວ່າກີບຕໍ່ຄົນຕໍ່ປີ. ການສ້າງຄອບຄົວ ແລະ ບ້ານວັດທະນາທໍາ ບ້ານນໍ້າຍາງໄດ້ເລີມເປີດຂະບວນການສ້າງຄອບຄົວ ແລະ ບ້ານວັດທະນາທໍາມາແຕ່ທ້າຍເດືອນທັນວາ ປີ 2018 ເປັນຕົ້ນມາ ໄດ້ພ້ອມກັນສ້າງ ແລະ ປະເມີນຕາມມາດຖານເງື່ອນໄຂ ມາເປັນໄລຍະຮອດວັນທີ 16 ພຶດສະພາ 2019 ສາມາດສ້າງຄອບຄົວວັດທະນາທໍາໄດ້ທັງໜົດ 113 ຄອບຄົວ ເທົ່າກັບ 91,12%.

ທິດທາງແຜນການຕໍ່ໜ້າແມ່ນຈະສືບຕໍ່ສົ່ງເສີມການຜະລິດເປັນສິນຄ້າຕາມທ່າແຮງຂອງແຕ່ລະຄອບຄົວ ແລະ
ຂອງບ້ານ ໂດຍເລັ່ງໃສ່ການບົວລະບັດຮັກສາຜົນລະປູກ ແລະ ການລ້ຽງສັດໃຫ້ຫຼາຍກາຍເປັນສິນຄ້າຕາມຄວາມເໝາະສົມ, ສູ້ຊົນສ້າງລາຍຮັບໃຫ້ໄດ້ 6 ລ້ານກີບຕໍ່ຄົນຕໍ່ປີ, ສືບຕໍ່ຮັກສ້າງມູນເຊື້ອອັນດີງາມເວົ້າລວມເວົ້າສະເພາະ
ແມ່ນວັດທະນາທໍາໃຫ້ຢືນຍົງ, ຍົກສູງລະດັບການພັດທະນາດ້ານຕ່າງໆໃຫ້ສູງຂື້ນ, ສືບຕໍ່ຈັດສັນບ້ານໃຫ້ເປັນລະບຽບ, ສະອາດງາມຕາ,ຮັກສາ ແລະ ສົ່ງເສີມມູນເຊື້ອວັດທະນາທໍາ ແລະ ຮິດຄອງປະເພນີອັນດີງາມຂອງເຜົ່າ ແລະ ແບບແຜນດໍາລົງຊີວິດຂອງປະຊາຊົນພາຍໃນບ້ານໃຫ້ດີຂື້ນເທື່ອລະກ້າວ.

ຈາກນັ້ນ ທ່ານ ວຽງຄໍາ ໄຊຍະວົງ ຮອງຫົວໜ້າພະແນກ ຖະແຫຼງຂ່າວ, ວັດທະນາທໍາ ແລະ ທ່ອງທ່ຽວແຂວງ ໄດ້
ມອບໃບຢັ້ງຢືນ ບ້ານນໍ້າຍາງເມືອງຫຼວງນໍ້າທາ ເປັນບ້ານວັດທະນາທໍາ ແລະ ຮ່ວມກັນຕັດແຖບຜ້າເປີດປ້າຍບ້ານນໍ້າຍາງເປັນບ້ານວັດທະນາທໍາຢ່າງເປັນທາງການ.ພ້ອມດຽວກັນນີ້ຜູ້ເຂົ້າຮ່ວມຍັງໄດ້ ຮ່ວມງານບຸນກິນຈຽງຂອງເຜົ່າອາຄາບ້ານນໍ້າຍາງດ້ວຍບັນຍາກາດເບີກບານມວນຊື່ນ.

medialaos ຂ່າວ: ສົມພອນ ຂຸນດາວົງ