ໃນຕອນທ້າຍອາທິດທີ່ຜ່ານມາ ສູນກາງແນວລາວສ້າງຊາດຮ່ວມກັບ ສວນພຶກສາ ແນວລາວສ້າງຊາດນະຄອນຫຼວງວຽງຈັນ ແລະ ແນວລາວສ້າງເມືອງນາຊາຍທອງຈັດງານ ສະແດງສິນລະປະວັນນະຄະດີ ແລະ ຜະລິດຕະພັນຂອງບັນດາຊົນເຜົ່າ ຢູ່ທີ່ສວນພຶກສາ ບ້ານດ່ານຊີ ເມືອງນາຊາຍທອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ປອ ໄຊສົມຄາມ ພົມວິຫານ ກຳມະການ ກົມການເມືອງສູນກາງພັກ ປະທານສູນກາງແນວລາວສ້າງຊາດ ມີບັນດາລັດຖະມົນຕີ ຮອງລັດຖະມົນຕີ ພິເສດພາຍໃນງານຄັ້ງນີ້ທາງ ແຂວງສະຫວັນນະເຂດ ກໍ່ໄດ້ນຳເອົາຂະບວນສິລະປະວັນນະຄະດີຈາກແຂວງໄປຮ່ວມກິດຈະກຳນຳດ້ວຍ ໂດຍມີ ທ່ານ ສົມເພັດ ອິນທິລາດ ປະທານແນວລາວສ້າງຊາດແຂວງ, ທ່ານນາງດາວວອນ ໄຊສຸລຽນ ຫົວໜ້າພະແນກ ຖະແຫຼງຂ່າວວັດທະນະທຳ ແລະ ທ່ອງທ່ຽວ ພ້ອມຄະນະສິນລະປະວັນນະຄະດີເຂົ້າຮ່ວມ.

ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ໄດ້ລາຍງານກ່ຽວກັບການຈັດງານສະແດງສິລະປະວັນນະຄະດີ ແລະ ຜະລິດຕະພັນຂອງບັນດາເຜົ່າແມ່ນເພື່ອສ້າງ ບັນຍາກາດຄວາມເບິກບານມ່ວນຊື່ນ ສົ່ງເສີມມູນເຊື່ອຄວາມສາມັກຄີ, ອະນຸລັກຮັກສາວັດທະນະທໍາ ຮີດຄອງປະເພນີອັນດີງາມຂອງຊາດ, ສ້າງຜະລິດຕະພັນທີ່ເປັນເອກະລັກທີ່ເປັນສີສັນຂອງແຕ່ລະຊົນເຜົ່າ ທັງເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງແນວລາວສ້າຊາດ ຄົບຮອບ 70 ປີ ທີ່ຈະໝູນວຽນມາບັນຈົບຄົບຮອບ ໃນວັນທີ 13 ສິງຫາ 2020, ເຊິ່ງການຈັດງານສະແດງສິລະປະວັນນະຄະດີ ແລະ ຜະລິດຕະພັນຂອງບັນດາເຜົ່າ ແມ່ນໄດ້ຈັດຂຶ້ນໃນລະຫວ່າງວັນທີ 27-29 ທັນວາ 2019 ບັນດາແຂກທີ່ເຂົ້າມາຮ່ວມແມ່ນຈະໄດ້ຮັບຊົມການສະແດງສິນລະປະວັນນະຄະດີຂອງບັນດາເຜົ່າລາວ, ຊົນເຜົ່າກືມມຸ, ບຣູ, ມົ້ງ, ໄຕດຳ,ໄຕແດງ, ພູໄທ ແລະ ເຜົ່າອື່ນໆ, ທ່ຽວຊົມການວາງສະແດງຜະລິດຕະພັນ ແລະ ຊີມອາຫານບັນດາເຜົ່າ, ທ່ຽວຊົມສວນພຶກສາເຊິ່ງເປັນແຫຼ່ງທ່ອງທ່ຽວທາງທຳມະຊາດໃນນັ້ນຈະປະກອບມີ ຫໍວາງສະແດງວັດທະນະທຳຂອງບັນດາເຜົ່າ, ເຮືອນຊົນເຜົ່າຕ່າງໆ, ມີສວນດອກໄມ້ນາໆຊະນິດ ແລະ ສະຖານທີ່ພັກຜ່ອນໄວ້ໃຫ້ແຂກທີ່ມາທ່ຽວຊົມງານສະແດງສິລະປະວັນນະຄະດີ ແລະ ຜະລິດຕະພັນບັນດາເຜົ່າ.

ຈາກນັ້ນທ່ານ ພູວົງ ພະມີສິດ ປະທານສວນພຶກສາ ຄະນະທີ່ປຶກສາວຽກງານຊົນເຜົ່າ ກໍ່ໄດ້ສະແດງຄວາມຍິນດີ ຕ້ອນຮັບ ແລະ ພາກພູມໃຈທີ່ບັນດາແຂກທີ່ເຂົ້າມາຮ່ວມໃນງານສະແດງສິລະປະວັນນະຄະດີ ແລະ ຜະລິດຕະພັນຂອງບັນດາເຜົ່າ ເຊິ່ງ ປີນີ້ເປັນປີທຳອິດທີ່ທາງສວນພຶກສາຈັດງານດັ່ງກ່າວ ເຖິງວ່າເວລາຈັດງານຈະມີນ້ອຍແຕ່ທາງສວນພຶກສາກໍ່ໄດ້ພະຍາຍາມ ເຮັດໃຫ້ງານນີ້ເກີດຂຶ້ນ ແລະ ມີຄວາມພ້ອມຮັບໃຊ້ຢ່າງເຕັມທີ່, ສວນພຶກສາ ເປັນແຫຼ່ງທ່ອງທ່ຽວທາງທຳມະຊາດ, ຕິດພັນກັບວັດທະນະທຳ, ພາຍໃນສວນປະກອບມີສວນດອກໄມ້ນາໆຊະນິດ, ມີຮູບປັ້ນຕ່າງໆ, ມູມຖ່າຍຮູບທີ່ມີຄວາມຫາກຫຼາຍ, ກິດຈະກຳຂີ່ລົດຖີບ, ຂີ່ມ້າ, ຂີ່ສະລິງ, ຮ້ານອາຫານ, ຮ້ານກາເຟ ລິສອດ ແລະ ສະປາ ສາມາດຮັບຈັດງານລ້ຽງ, ງານດອງ, ກອງປະຊຸມສຳມະນາ, ມີສະຖານທີ່ຕັ້ງແຄັມ ນອກຈາກນັ້ນຍັງເປັນສະຖານທີ່ທັດສະນະສຶກສາ ໃຫ້ແກ່ນັກຮຽນນັກສຶກ ແລະ ອັນທີ່ພົ້ນເດັ່ນແມ່ນມີຫໍຜະລິດຕະພັນບັນດາເຜົ່າ, ເຮືອນຊົນເຜົ່າ, ເຊິ່ງເຮືອນຊົນເຜົ່າມີທັງໝົດ 7ຫຼັງ ຄືເຜົ່າລາວ, ຊົນເຜົ່າກືມມຸ, ບຣູ, ມົ້ງ, ໄຕດຳ,ໄຕແດງ, ພູໄທ ແລະຈະສືບຕໍ່ສ້າງເຮືອນຊົນເຜົ່າອື່ນໆເພື່ອເປັນການຮັກສາວັດທະນະທຳ, ຮີດຄອງປະປະເພນີ ແຕ່ລະຊົນເຜົ່າໄວ້ໃຫ້ແຂກຕ່າງປະເທດໄດ້ມາທ່ຽວຊົມແລະ ຮຽນຮູ້ວັດທະນະທຳຂອງຊາດລາວ, ທີ່ສຳຄັນຍັງເປັນການສ້າງວຽກເຮັດງານທຳໃຫ້ແກ່ປະຊາຊົນບ້ານດ່ານຊີ ແລະ ບ້ານອື່ນໆພາຍໃນເມືອງນາຊາຍທອງ.

ໃນໂອກາດດຽວກັນທ່ານ ໄຊສົມພອນ ພົມວິຫານ ກໍ່ໄດ້ປະດັບຫຼຽນໄຊພັດທະນາ ແລະ ໃບຍ້ອງຍໍໃຫ້ແກ່ຜູ້ທີ່ມີຜົນງານໃນການປະກອບສ່ວນວຽກງານສູນກາງແນວລາວສ້າງຊາດ ແລະ ຮ່ວມກັນຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສິລິມຸງຄຸນ ແລະ ເປັນການເປີດງານ ສະແດງສິນລະປະວັນນະຄະດີ ແລະ ຜະລິດຕະພັນຂອງບັນດາຊົນເຜົ່າ ຢ່າງເປັນທາງການ.

savannakhet medialaos