ສະຫາຍ ບຸນ​ທອງ ຈິດ​ມະນີ ກໍາ​ມະ​ການ​ກົມ​ການ ເມືອງສູນ​ກາງ​ພັກ ຄະນະ​ເລຂາ ທິການ​ສູນ​ກາງ​ພັກ ຮອງ​ນາຍົກລັດຖະມົນຕີ ປະທານ​ຄະນະ​ກວດກາ​ສູນ​ກາງ​ພັກ ປະທານ​ອົງການ​ກວດກາ​ລັດຖະບານ ແລະ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຫົວໜ້າ​ຄະນະຊີ້​ນໍາ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ພ້ອມ​ຄະນະ ໄດ້​ໄປ​ຢ້ຽມຢາມ ແລະ ຊຸກຍູ້​ວຽກ​ງານການ​ກະກຽມ​ກອງ​ປະຊຸມ​ໃຫຍ່ 3 ຂັ້ນ​ຂອງ​ພັກ ແລະ ຊຸກຍູ້​ການ​ກໍ່ສ້າງ​ທາງ​ລົດໄຟ ໂຄງການ​ກໍ່ສ້າງທາງ ລົດໄຟ ລາວ​-​ຈີນ ຢູ່ແຂວງອຸດົມ​ໄຊ ວັນ​ທີ 26 ທັນວາ​ຜ່ານ​ມາ ໂດຍ​ມີ​ທ່ານ ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ ລັດຖະມົນຕີ​ກະຊວງ​ໂຍທາ​ທິ​    ການ ແລະ ຂົນສົ່ງ ຮ່ວມ​ລົງ​ເຄື່ອນ​ໄຫວ​ຄັ້ງ​ນີ້ ໂດຍ​ມີ ທ່ານ ຄໍາ​ພັນ ເຜີຍ​ຍະ​ວົງ ກໍາ​ມະ​ການ​ສູນ​ກາງ​ພັກ ເລຂາ​ພັກແຂວງ, ເຈົ້າແຂວງ​ອຸດົມ​ໄຊ, ຄະນະ​ປະ​ຈໍາ, ຄະນະ​ພັກ, ພະນັກງານ ຫຼັກ​ແຫຼ່ງ, ພະນັກງານ​ທີ່​ກ່ຽວຂ້ອງ ຕ້ອນຮັບ ແລະ ຮ່ວມ​ເຮັດ​ວຽກ.

​ທ່ານ​ໄດ້​ຮັບ​ຟັງ​ການ​ລາຍ​ງານ ສະພາບ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ແຂວງຈາກ​, ໄດ້​ຮັບ​ຟັງ​ການລາຍ​ງານ ສະພາບ​ການ​ກະ​ກຽມ​ດໍາ​ເນີນກອງ​ປະຊຸມ​ໃຫຍ່ 3 ຂັ້ນຈາກ​ທ່ານ ຄໍາ​ພຽງ ຢາ​ຈົງ​ວາ ຮອງ​ເລຂາ​ພັກ​ແຂວງ ຮອງ​ເຈົ້າແຂວງ​ອຸດົມ​ໄຊ ທ່ານ​ລາຍ​ງານໃຫ້​ຮູ້​ວ່າ: ການ​ກະກຽມ ກອງ​ປະຊຸມ​ໃຫຍ່ 3 ຂັ້ນ​ຂອງ​ແຂວງອຸດົມ​ໄຊ ຄະນະ​ປະ​ຈໍາ​ພັກ​ແຂວງ ໄດ້​ຫັນ​ເອົາ​ນິຕິ​ກໍາ​ທີ່​ກ່ຽວຂ້ອງ ຂອງ​ຂັ້ນ​ເທິງ ຫັນ​ມາ​ເປັນ​ອັນ​ລະອຽດ​ຂອງ​ແຂວງ ໂດຍ​ໄດ້​ແຕ່ງຕັ້ງ ແລະ ມອບ​ໝາຍ​ໃຫ້​ບັນດາ​ອະນຸ​ກຳ​ມະການ​ຕ່າງໆ​ຂັ້ນ​ແຂວງ ສ້າງ​ແຜນການເຄື່ອນໄຫວ​ອັນ​ລະອຽດ ແລະ ລົງ​ຊຸກຍູ້ ບັນດາ​ວຽກ​ງານ​ຂອງ​ຕົນ. ປັດຈຸ​ບັນ ໄດ້​ກະກຽມ​ດ້ານ​ບຸກ​ຄະລາກອນ ແມ່ນ​ໄດ້​ສຳເລັດ​ການ​ປັບປຸງ, ບັນຈຸ, ສັບ​ຊ້ອນ, ຈັດ​ວາງ ແລະ ດໍາ​ເນີນ​ກອງ​ປະຊຸມ​ໃຫຍ່ ອົງຄະ​ນະພັກ​ເມືອງ ທັງ​ໝົດ 7 ເມືອງ (ເມືອງ​ຫຼາ, ເມືອງ​ໄຊ,ເມືອງ​ປາກ​ແບງ, ເມືອງ​ແບງ, ເມືອງ​ຮຸນ, ເມືອງ​ງາ ແລະ ເມືອງ​ນາ​ໝໍ້) ກອງ​ປະຊຸມ​ໃຫຍ່ ຄະນະ​ພັກ​ສອງ​ກອງ​ບັນຊາ​ການ ປກຊ, ປກສ ແຂວງ ໃນ​ທົ່ວ​ແຂວງ.

ສ່ວນ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ທ່ານ ສົມ​ຈິດ ປັນຍາ​ສັກ ຮອງ​ເຈົ້າແຂວງ​ອຸດົມ​ໄຊ ປະທານ​ຄະ​ນະ​ກໍາ​ມະ​ການ​ຄຸ້ມ​ຄອງ​ທາງ​ລົດໄຟ​ລາວ​-​ຈີນ ລາຍ​ງານ​ໃຫ້​ຮູ້​ວ່າ: ໂຄງການ​ກໍ່ສ້າງ​ທາງ​ລົດໄຟ​ແຕ່​ຊາຍ​ແດນ​ລາວ​-​ຈີນ ຫາ ນະຄອນຫຼວງ​ວຽງ​ຈັນ ມີ​ຄວາມ​ຍາວ​ທັງ​ໝົດ 409 ກິໂລແມັດ, ແລວ​ທາງ​ລົດໄຟ​ທີ່​ຜ່ານ​ແຂວງ​ອຸດົມ​ໄຊ 126,6 ກິໂລແມັດ ໃນ​ນີ້​ປະກອບ​ມີ 9 ສະຖາ​ນີ້, ຂົວໃໝ່ 60 ແຫ່ງ, ຄວາມ​ຍາວ​ລວມ 12.695 ກິໂລແມັດ, ມີ​ອຸ​ໂມງ 32 ອຸໂມງ, ຄວາມ​ຍາວ​ລວມ 84,869 ກິໂລແມັດ, ຈຸດ​ດິນ​ຕັດ​-​ດິນ​ຖົມ​ຄັນ​ທາງ ມີ​ຄວາມ​ຍາວ 29.036 ກິໂລແມັດ ເທົ່າ​ກັບ 22,93%. ຄວາມ​ຄືບ​ໜ້າ​ຂອງ​ການ​ກໍ່ສ້າງ​ທາງ​ລົດໄຟ ລາວ​-​ຈີນ ມາ​ຮອດ​ປັດຈຸ​ບັນ ​ສາມາດ​ປະຕິ ບັດ​ໄດ້ 84,40 %.

ສ່ວນ​ການ​ກໍ່ສ້າງ​ທາງ​ລົດໄຟ​ລາວ​-​ຈີນ ທ່ານ​ໄດ້​ເນັ້ນ​ໜັກ​ໃຫ້​ຄະນະ​ຮັບຜິດຊອບ​ເອົາໃຈໃສ່ໃນ​ການ​ຄົ້ນຄວ້າ​ເບິ່ງ​ຄວາມ​ເໝາະ​ສົມ​ໃນ​ການ​ສະໜອງ​ເນື້ອທີ່​ກໍ່ສ້າງ​ສະຖານີ ທັງ 3 ແຫ່ງ (ສະຖານີ​ນາ​ໝໍ້, ສະຖານີ​ເມືອງ​ງາ, ສະຖານີ​ເມືອງ​ໄຊ) ໃຫ້​ເໝາະ​ສົມ ໂດຍ​ສະເພາະ​ສະຖານີ ເມືອງ​ໄຊ ແລະ ນາ​ໝໍ້ ແລ້ວ​ລາຍ​ງານ​ໃຫ້​ຂັ້ນ​ເທິງ​ເພື່ອ​ພິຈາລະນາ; ຮີບ​ຮ້ອນ​ຄົ້ນຄວ້າ​ການ​ຊົດ​ເຊີຍ​ຕໍ່​ປະຊາຊົນ​ຜູ້​ທີ່ ໄດ້​ຮັບ​ຜົນ​ກະທົບ​ໃນ​ບັນດາ​ຈຸດ​ທີ່​ຍັງ​ຄ້າງ​ຄາ ໃຫ້​ເໝາະ​ສົມ​ກັບ​ຄວາມ​ເປັນ​ຈິງ ເພື່ອ​ໃຫ້​ໂຄງການ​ສາ​ມາດ​ດໍາ​ເນີນ​ໄປ​ຢ່າງ​ສະດວກ ແລະ ຕໍ່່​ເນື່ອງ.

Medialao