ກະຊວງ​ແຜນການ​ແລະ​ການ​ລົງທຶນ (ຜທ) ໄດ້​ຈັດ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ພັກ​ກະຊວງ​ແຜນການ​ແລະ​ການ​ລົງທຶນ ຄັ້ງ​ທີ4 ສະໄໝ​ທີ III ໃນ​ວັນ​ທີ 30 ທັນວາ​ນີ້ ທີ່​ສະໂມສອນ​ຂອງ​ກະຊວງ​ດັ່ງ​ກ່າວ.

ພາຍ​ໃຕ້​ການ​ເປັນ​ປະທານ​ຂອງ ສະຫາຍ ສອນໄຊ ສີ​ພັນ​ດອນ ກໍາ​ມະ​ການ​ກົມການເມືອງ​ສູນ​ກາງ​ພັກ ເລຂາ​ຄະນະ​ພັກ ຮອງ​ນາຍົກລັດຖະມົນຕີລັດຖະມົນຕີ​ກະຊວງ ຜທ. ໃນ​ກອງ​ປະຊຸມ ສະຫາຍ ສອນ​ໄຊ ສີ​ພັນ​ດອນ ໄດ້​ກ່າວ​ວ່າ: ກອງ​ປະຊຸມ​ຄັ້ງ​ນີ້​ມີ​ຄວາມ​ໝາຍ​ສໍາ​ຄັນ​ຍິ່ງ ຊຶ່ງ​ຈະ​ໄດ້​ພ້ອມ​ກັນ​ສະຫຼຸບ, ສໍາຫຼວດ​ກວດກາ​ແລະ ຕີ​ລາຄາ​ຄືນ ກ່ຽວ​ກັບ ການ​ນໍາ​ພາ​-​ຊີ້​ນໍາ​ຂອງ​ຄະນະ​ບໍລິຫານ​ງານ​ພັກ​ກະຊວງ ຜທ ສະໄໝ​ທີ III ໃນ​ໄລຍະ 1 ປີ​ທີ່​ຜ່ານ​ມາ ແລະ ພ້ອມ​ກັນ​ກໍາ​ນົດ​ທິດ​ທາງ​ແຜນການວຽກ​ງານ​ໃນ​ປີ​ຕໍ່ໜ້າ; ພ້ອມ​ດຽວ​ກັນ ກໍ​​ໄດ້​ເຜີຍແຜ່​ເຊື່ອມ​ຊຶມ​ມະຕິ​ກອງ​ປະຊຸມ​ຄົບ​ຄະນະ​ຂອງ​ຄະນະ​ບໍລິຫານ​ງານ​ສູນ​ກາງ ພັກ ຄັ້ງ​ທີ 9 ສະໄໝ​ທີ X ແລະ​ເອກະ​ສານສຳ​ຄັນ​ຈໍາ​ນວນ​ໜຶ່ງ ເພື່ອ​ກະກຽມ​ໃຫ້​ແກ່​ການ​ດໍາ​ເນີນ​ກອງ​ປະຊຸມ​ໃຫຍ່ 3ຂັ້ນ.

ບັນດາ​ເອກະສານ​ທີ່​ສໍາ​ຄັນ​ໃນ​ກອງ​ປະຊຸມ​ມີ​ຄື: ມະຕິ​ກອງ​ປະຊຸມ​ຄົບ​ຄະນະ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 9 ສະໄໝ​ທີ X; ຮ່າງ​ບົດ​ສະ ຫຼຸບ​ຕີ​ລາຄາ​ວຽກ​ງານ​ການ​ນໍາ​ພາ​ຂອງ​ຄະນະ​ບໍລິຫານ​ງານ​ພັກ​ກະ​ຊວງ ​ຜທ ຄັ້ງ​ທີ 4 ສະໄໝ​ທີ III; ສໍາ​ຫຼວດ​ການ​ນໍາ​ພາ​ຂອງ​ຄະນະ​ບໍລິຫານ​ງານ​ພັກ ກະ​ຊວງ​ ຜທ ສະໄໝ​ທີ III; ລາຍ​ງານ​ຜົນ​ການ​ກວດກາ ຂອງ​ອົງການ​ກວດກາ​ລັດຖະບານ​ຢູ່​ຂະແໜງ​ແຜນການ​ແລະ​ການ​ລົງທຶນ; ຜ່ານ​ຮ່າງ​ບົດ​ສະຫຼຸບ​ການ​ຕີ​ລາຄາ ໃນ​ການຈັດຕັ້ງ​ປະ​ຕິ​ບັດກົດ​ລະບຽບ​ຂອງ​ພັກ​ປະຊາຊົນ​ປະຕິວັດ​ລາວ ສະ ໄໝ​ທີ X ຢູ່​ກະ​ຊວງ​ຜທ.

ສະຫາຍເລຂາ​ຄະນະ​ພັກ​ຍັງ​ກ່າວ ​ອີກ​ວ່າ: ກະຊວງ ຜທ ມີ​ພາລະ​ບົດບາດ​ທີ່​ສຳຄັນໃນ​ການ​ເປັນ​ເສນາ​ທິ​ການ​ໃຫ້​ສູນ​ກາງ​ພັກ ແລະ ລັດຖະບານ ໃນ​ການ​ຄຸ້ມ​ຄອງ​ມະຫາ​ພາກ​ດ້ານ​ວຽກ​ງານ​ແຜນການ,ການ​ຄົ້ນ​ຄ້​ວາ​ສັງ​ລວມ​ແຜນ​ຍຸດທະສາດ,ແຜນ​ແມ່​ບົດ,ແຜນ​ພັດທະນາ​ເສດ​ຖະ​ກິດ​-​ສັງຄົມ​ແຫ່ງ​ຊາດ,ກົນ​ໄກ​ແລະ​ນະໂຍບາຍ​ລວມ​ກ່ຽວ​ກັບ​ການ​ຄຸ້ມ​ຄອງ​ເສດຖະກິດ​ມະຫາ​ພາກ,ວຽກ​ງານ​ສົ່ງເສີມ​ການ​ລົງທຶນ, ວຽກ​ງານ​ສະຖິຕິ, ວຽກ​ງານ​ຍາດ​ແຍ່ງ​ການ​ຊ່ວຍເຫຼືອ​ທາງ​ການ ​ເພື່ອ​ພັດທະນາ​ ແລະ​ວຽກ​ງານປິ່ນ​ອ້ອມ​ອື່ນໆ ໂດຍ​ເຫັນ​ໄດ້​ຄວາມ​ໝາຍ​ຄວາມ​ສຳ ຄັນ​ຄື​ແນວ​ນັ້ນ ຈຶ່ງ​ຮຽກຮ້ອງ​ບັນດາສະຫາຍ​ເຂົ້າຮ່ວມກອງ ​ປະຊຸມ​ຈົ່ງ​ຍົກ​ສູງ​ຄວາມ​ຮັບຜິດ ຊອບ​ໃນ​ການ​ຄົ້ນ​ຄ້​ວາ​ ແລະ​ ປະ ກອບ​ຄຳ​ເຫັນ​ໃສ່​ບັນດາ​ເນື້ອ ​ໃນ​ເອກ​ກະ​ສານ​ຢ່າງ​ເ​ລິກ​ເຊິ່ງ​ສອດຄ່ອງ​ກັບ​ສະພາບ​ຄວາມ​ເປັນ​ຈິງ,ຊອກ​ເຫັນ​ດ້ານ​ດີ,ດ້ານ​ອ່ອນ​ແລະ​ຂໍ້ຄົງຄ້າງ​ທີ່​ຜ່ານ​ມາ​ພ້ອມ​ກັນ​ຊອກ​ຫາ​ວິທີ​ແກ້​ໄຂ​ຈຸດ​ອ່ອນ​ໃຫ້​ໝົດ​ໄປ​ໃນຕໍ່ໜ້າ.

Medialaos