ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ​ ເມືອງ​ປາກ​ແຊງ ຄັ້ງ​ທີ VI ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ ເມື່ອ​ວັນ​ທີ 30 ທັນ​ວາ ຜ່ານ​ມາ ພາຍ​ໃຕ້​ຄຳ​ຂວັນ​ທີ່​ວ່າ:ພັດທະນາ​ເມືອງ​ປາກ​ແຊງໃຫ້ ມີ​ຄວາມ​ເຂັ້ມແຂງ, ສ້າງ​ແຫຼ່ງ​ລາຍ​ຮັບ​ຈາກ​ການ​ລ້ຽງສັດ​ໃຫຍ່, ປູກໄມ້​ອຸດສາຫະກຳຕິດ​ພັນ​ກັບ ການທ່ອງທ່ຽວ​ທຳ​ມະ​ຊາດ, ປະ ຫວັດ​ສາດ​ເມືອງ​ວິລະ​ຊົນ​ຕາມ​ທິດສີຂຽວ ແລະ ຍືນ​ຍົງ ໂດຍ​ມີ ສະຫາຍ ຄຳ​ຂັນ ຈັນທະ​ວີ​ສຸກ ກຳມະການ​ສູນ​ກາງ​ພັກ ເລຂາ ຄະນະບໍລິຫານ​ງານ​ພັກແຂວງ ເຈົ້າແຂວງ​ຫຼວງ​ພະ​ບາງ ພ້ອມ​ດ້ວຍ​ຜູ້​ແທນ​ກອງ​ປະຊຸມ​ໃຫຍ່​ ຈຳນວນ 98 ສະຫາຍ ຍິງ 4 ສະຫາຍທີ່​ເປັນ​ຕົວ​ແທນ​ໃຫ້​ສະມາຊິກ​ພັກໃນ​ທົ່ວ​ເມືອງ ແລະ ຜູ້​ແທນ​ຮັບ​ເຊີນ​ເຂົ້າຮ່ວມ.

ໃນ​ກອງ​ປະຊຸມ​ໄດ້​ຮັບ​ຟັງ​ການ​ຜ່ານ​ຮ່າງລາຍງານ​ການເມືອງ​ທັງ​ສອງ​ພາກ, ແຜນ​ພັດທະນາ​ເສດຖະ​ກິດ​-​ສັງຄົມ 5 ປີ 2015-2019 ແລະ ທິດທາງ ​ແຜນການ 5 ປີ 2020-2025 ຂອງ​ອົງຄະ​ນະພັກ​ເມືອງ, ຮັບຟັງການ​ຜ່ານ​ບົດສຳຫຼວດການ ​ນຳພາ​ລວມ​ຂອງ​ຄະນະ​ບໍລິ ຫານ​ງານ​ພັກ​ເມືອງ​ ຊຸດ​ທີ V, ການ​ປະກອບ​ຄຳ​ຄິດ​ຄຳ​ເຫັນ​ຂອງ​ບາງ​ຂົງເຂດ​ວຽກ​ງານ ແລະ ຄອບຄົວ​ຕົວ​ແບບ ແລະ ດຳເນີນ​ການ​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ພັກ​ເມືອງ ຄັ້ງ​ທີ VI ເພື່ອ​ສືບຕໍ່​ຊີ້​ນຳ-ນຳພາ​ການ​ປະຕິບັດ​ມະຕິ​ກອງ​ປະຊຸມ​ໃນຕໍ່ໜ້າ​ໃຫ້​ສຳເລັດ​ຜົນ ພ້ອມ​ທັງ​ປ່ອນ​ບັດ​ເລືອກ​ຕັ້ງ​ເອົາ​ຜູ້​ແທນ​ສົມບູນຕາງໜ້າ​ອົງຄະ​ນະ​ພັກ​ເມືອງ​ປາກ​ແຊງ ໄປ​ຮ່ວມ​ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ​ແຂວງ ​ຫຼວງ​ພະ​ບາງ ຄັ້ງ​ທີ VIII ຕື່ມ​ອີກ. ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ​ເມືອງ​ປາກ​ແຊງ ຄັ້ງ​ທີ VI ​ດຳເນີນ​ເປັນ​ເວ ລາ 2 ວັນ​ ຈຶ່ງ​​ສຳ​ເລັດ.

Medialaos