ໃນຕອນບ່າຍ ວັັນທີ 31 ທັນວາ 2019 ຜ່ານມາ ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໄດ້ປະກາດຈັດສົ່ງພະນັກງານເຂົ້າຮັັບບໍານານ ພ້ອມທັງຈັດງານສົ່ງທ້າຍ ປີເກົ່າ 2019 ແລະ ຕ້ອນຮັບປີໃໝ່ 2020 ໂດຍການໃຫ້ກຽດເຂົ້າຮ່ວມຂອງທ່ານ ຄຳພູນ ຕຸໄພທູນ ອາດີດຮອງເຈົ້າແຂວງສະຫວັນນະເຂດ, ອາດີດຫົວໜ້າພະແນກສຶກສາທິການ ແລະ ກິນລາແຂວງ, ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ, ມີບັນດາທ່ານ ຫົວໜ້າຮອງຫົວໜ້າ ຫ້ອງການສຶກສາທິການ ແລະ ກິລາ 14 ຕົວເມືອງ 1 ນະຄອນເຂົ້າຮ່ວມ.

ທ່ານ ວັນປະເສີດ ພົມມະນີໄຊ ຫົວໜ້າຂະແໜງຈັດຕັ້ງ ພະແນກສຶກສາທິການ ແລະ ກິລາແຂວງ ກໍ່ໄດ້ຜ່ານຂໍຕົກລົງ ກະຊວງສຶກສາທິການ ແລະ ກິລາ ວ່າດ້ວຍການອະນຸມັດພັກການ ເພື່ອຮັບອຸດໜູນບໍານານ, ອີງຕາມກົດໝາຍວ່າດ້ວຍ ພະນັກງານ-ລັດຖະກອນ ສະບັບເລກທີ 74/ພສຊ, ອີງຕາມດໍາລັດຂອງນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງສຶກສາທິການ ແລະ ກິລາ ສະບັບເລກທີ 67/ ນຍ, ອີງຕາມການແຈ້ງການຂອງກະຊວງພາຍໃນ ວ່າດ້ວຍການອະນຸມັດໃຫ້ລັດຖະກອນ ຮັບອຸດໜູນບໍານານສະບັບເລກທີ 1672/ພນ ແລະ ອີງຕາມການຄົ້ນຄວ້າເຫັນດີກົມຈັດຕັ້ງ ແລະ ພະນັກງານ, ລັດຖະມົນຕີກະຊວງສຶກສາທິການ ແລະ ກິລາຕົກລົງ ເຫັນດີ ໃຫ້ທ່ານ ຄູນຄໍາ ຣາຊະພົນ ຮອງຫົວໜ້າພະແນກສຶກສາທິການ ແລະ ກິລາແຂວງ, ອາຍຸກະສຽນ 61 ປີ ເຂົ້າການສັງກັດລັດ ວັນທີ 1.ກັນຍາ 1983 ລວມປີການໄດ້ 36 ປີ ແລະ ທ່ານ ລໍາແກ້ວ ເກດທອງດີ ຜູ້ອໍານວຍການ ໂຮງຮຽນມັດທະຍົມສົມບູນສະຫວັນ, ອາຍຸກະສຽນ 61 ປີ,ເຂົ້າການສັງກັດລັດວັນທີ 1 ກັນຍາ 1997,ລວມປີການໄດ້ 4 2ປີ ໃຫ້ທັງ 2 ທ່ານ ພັກການເພື່ອຮັບອຸດໜູນບໍານານ ເລີ່ມແຕ່ວັນທີ 1 ມັງກອນ 2020 ເປັນຕົ້ນໄປ.

ໃນພິທີ ກໍ່ໄດ້ມອບໃບຍ້ອງຍໍໃຫ້ ທ່ານ ຄູນຄໍາ ຣາຊະພົນ ແລະ ທ່ານ ລໍາແກ້ວ ເກດທອງດີ ທີ່ມີຜົນງານດີເດັ່ນ ແລະ ຄຸນງາມຄວາມດີໃນການປະກອບສ່ວນເຫື່ອແຮງ, ສະຕິປັນຍາ , ຄວາມຮູ້້-ຄວາມສາມາດເຂົ້າໃນການພັດທະນາວຽກງານສຶກສາທິການ ແລະ ກິລາຕະຫຼອດໄລຍະຜ່ານມາ ໂດຍ ທ່ານ ຫົວໜ້າພະແນກສຶກສາທິການ ແລະ ກິລາແຂວງ ມອບໃຫ້ຢ່າງສົມກຽດ, ພ້ອມນີ້ບັນດາຫ້ອງການສຶກສາທິການ ແລະ ກິລາເມືອງ 14ເມືອງ1 ນະຄອນ ກໍ່ໄດ້ມອບຂອງຂວັນໃຫ້ຢ່າງສົມກຽດ.ພິເສດກໍ່ໄດ້ມອບຂອງຂວັນໂອກາດສົ່ງທ້າຍປີເກົ່າຕ້ອນຮັບປີໃໝ່ໃຫ້ທ່ານ ຄໍາພູນ ຕຸໄພທູນ ອາດີດ ຮອງເຈົ້າແຂວງສະຫວັນນະເຂດ,ອາດີດຫົວໜ້າພະແນກສຶກສາທີການ ແລະ ກິລາແຂວງ ອີກດ້ວຍ.

ຈາກນັ້ນທ່ານ ນາງຫຼີງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ ກໍ່ມີຄໍາເຫັນວ່າ: ພິທີນີ້ແມ່ນເປັນພິທີ ທີ່ສໍາຄັນທີ່ເຫັນໄດ້ໃນຄຸນງາມຄວາມດີເຖິງໝາກຜົນອັນຍິ່ງໃຫຍ່ຂອງບັນດາທ່ານ ທີ່ມີບົດຮຽນໃຫ້ແກ່ນ້ອງນຸ່ງ, ລູກຫຼານ ເພື່ອນໍາໄປຈັດຕັ້ງປະຕິບັດຜັນຂະຫຍາຍ, ໃນຕໍ່ໜ້ານີ້ເຖິງແມ່ນວ່າ ພວກທ່ານ ຈະເຂົ້າຮັບບໍານານແລ້ວ ກໍ່ໃຫ້ເປັນທີ່ປຶກສາ ຂອງຂະແໜງສຶກສາຂອງພວກເຮົາ ເພື່ອໃຫ້ຂະແໜງສຶກສາມີຜົນສຳເລັດ, ມີຄຸນນະພາບດີ.

Medialaos