ພິທີມອບ-ຮັບ ຫໍສະໝຸດ ຂອງໂຮງຮຽນ ມ.ສ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ຈັດຂຶ້ນໃນຕອນບ່າຍຂອງວັນທີ 24 ທັນວາ 2019 ຢູ່ໂຮງຮຽນ ມ.ສ ສີທ່ານາໄຊ ກ່າວມອບໂດຍທ່ານ ຫງວຽນຊວັນຫຶວ ອຳນວຍບໍລິສັດ ສາມັກຄີ VL ຈຳກັດ ແລະ ກ່າວຮັບໂດຍທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ, ໂດຍຊ້ອງໜ້າຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ເລດິ່ງເຊີນ ກຳມະການຄະນະບໍລິຫານງານສູນກາງພັກກອມມູນິດຫວຽດນາມ, ເລຂາພັກແຂວງ ປະທານສະພາປະຊາຊົນແຂວງຮ່າຕີ້ງ, ມີການນຳຂອງແຂວງບໍລິຄຳໄຊ-ແຂວງຮ່າຕິ້ງ, ພະແນກການທີ່ກ່ຽວຂ້ອງ, ຄູ-ອາຈານ, ນັກຮຽນ ແລະ ພະນັກງານວິຊາການ ທັງສອງຝ່າຍເຂົ້າຮ່ວມເປັນສັກຂີພິຍານ.

ໂຄງການກໍ່ສ້າງ ຫໍສະໝຸດ ແລະ ເສັ້ນທາງເບຕົງ ໂຮງຮຽນ ມ.ສ ສີທ່ານາໄຊ ໄດ້ຮັບການປະມູນຮັບເໝົາກໍ່ສ້າງໂດຍບໍລິສັດ ສາມັກຄີ VL ຈຳກັດ ໄດ້ເລີ່ມລົງມືກໍ່ສ້າງມາແຕ່ວັນທີ 24 ສິງຫາ 2019 ຫາ ວັນທີ 30 ພະຈິກ 2019 ເປັນເວລາ 3 ເດືອນ ເຊິ່ງແຂວງຮ່າຕິງ ຊ່ວຍເຫຼືອປຸກສ້າງຫໍສະໝຸດ ມູນຄ່າ 3 ຕື້ດົງ ຄິດເປັນເງິນກີບ 1.103.775.704 ກີບ ມີຂະໜາດ 18 x 20 ແມັດ ແລະ ກອງບັນຊາການຕຳຫຼວດ ແຂວງຮ່າຕິງ ຊ່ວຍເຫຼືອກໍ່ສ້າງທາງເບຕົງເຂົ້າໂຮງຮຽນ ມັດທະຍົມສົມບູນ ສີທ່ານາໄຊ ມີຄວາມຍາວ 800 ແມັດ ກວ້າງ 4 ແມັດ ມູນຄ່າ 2 ຕື້ດົງ ຄິດເປັນເງິນກີບ 770.000.000 ກີບ.

ຈາກນັ້ນ ເຈົ້າແຂວງບໍລິຄຳໄຊ ໄດ້ມອບຫຼຽນໄຊແຮງງານ ຊັ້ນ 3 ໃຫ້ແກ່ຄະນະພັກ-ຄະນະປົກຄອງແຂວງຮ່າຕິ້ງ ທີ່ມີຜົນງານດີເດັ່ນ ປະກອບສ່ວນເຂົ້າໃນການຊ່ວຍເຫຼືອສ້າງຫໍສະໝຸດ ໃຫ້ໂຮງຮຽນ ມ.ສ ສີທ່ານນາໄຊ, ມອບຫຼຽນກາພັດທະນາໃຫ້ກັບສະຫາຍ ພັນເອກ ຫວໍ ຈ້ອງ ຫາຍ ຄະນະປະຈຳພັກແຂວງ ຫົວໜ້າຕຳຫຼວດ ແຂວງຮ່າຕິ້ງ ສສ ຫວຽດນາມ ທີ່ມີຜົນງານດີເດັ່ນ ປະກອບສ່ວນໃນການຊ່ວຍເຫຼືອກໍ່ສ້າງທາງເບຕົງ ແລະ ມອບໃບກຽດຕິຄຸນຂອງທ່ານເຈົ້າແຂວງບໍລິຄຳໄຊ ໃຫ້ບໍລິສັດ ສາມັກຄີ ວີແອລ ( VL ) ຈຳກັດ ເພື່ອເປັນການສະແດງເຖີງຄຸນງາມຄວາມດີ ແລະ ສາຍພົວແບບພິເສດລາວ-ຫວຽດນາມ, ຫວຽດນາມ-ລາວ.

Medialaos ບໍລິຄຳໄຊ