ໃນວັນທີ 22 ສິງຫາ 2019 ນີ້ ຢູ່ທີ່ສະໂມສອນຂອງເມືອງອຸທຸມພອນ ໄດ້ມີພິທີປະກາດການຈັດຕັ້ງ ແລະ ມອບຮັບໜ້າທີ່ການນຳຂັ້ນສູງຂອງເມືອງ ໂດຍການເຂົ້າຮ່ວມຂອງ ທ່ານ ນາງ ບຸນເຍື້ອນ ທິດພຸດທະວົງ ຄະນະປະຈຳພັກແຂວງ ປະທານກວດກາພັກ-ລັດແຂວງ, ມີຄະນະຈັດຕັ້ງແຂວງ, ພະແນກພາຍໃນແຂວງ, ບັນດາທ່ານ ຫົວໜ້າຫ້ອງການ, ຄະນະຫ້ອງການ ຂະແໜງການກ່ຽວຂ້ອງເຂົ້າຮ່ວມ.

ໃນພິທີ ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງ ກໍ່ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງ ສະຫວັນນະເຂດ ວ່າດ້ວຍການອະນຸມັດໃຫ້ ທ່ານ ສົມສັກ ສີຊານົນ ອາດີດເຈົ້າເມືອງໆ ອຸທຸມພອນ ອອກຮັບເບ້ຍບຳນານ, ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດແຕ່ງຕັ້ງ ທ່ານ ປະສົງສິນ ຈະເລີນສຸກ ອະດີດຫົວໜ້າພະແນກໂຍທາທິການ-ຂົນສົ່ງແຂວງ ເປັນເຈົ້າເມືອງໆ ອຸທຸມພອນ ແລະ ຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການອະນຸມັດແຕ່ງຕັ້ງ ສະຫາຍ ປະສົງສິນ ຈະເລີນສຸກ ເປັນເລຂາພັກເມືອງໆ ອຸທຸມພອນ.

ທ່ານ ນາງ ບຸນເຍື້ອນ ທິດພຸດທະວົງ ໄດ້ໃຫ້ຮູ້ວ່າ: ໃນການປະກາດການຈັດຕັ້ງ ແລະ ມອບຮັບໜ້າທີ່ຄັ້ງນີ້ ແມ່ນເພື່ອແນໃສ່ການສືບຕໍ່ຊີ້ນ້ຳ-ນຳພາວຽກງານໃນຕໍ່ໜ້າ ໃຫ້ມີຄວາມຕໍ່ເນື້ອງ, ຮັບປະກັນການຄຸ້ມຄອງ, ບໍລິຫານໃຫ້ມີປະສິດທິພາບ, ປະສິດທິຜົນ, ໂປ່ງໃສ, ຖືກຕ້ອງສອດຄ່ອງ ກັບລະບຽບການ, ທ່ວງທັນກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນຕໍ່ໜ້າ. ໂອກາດດັ່ງກ່າວ ທ່ານກໍ່ຍັງໄດ້ຍ້ອງຍໍຊົມເຊີຍ ຕໍ່ຜົນງານຂອງທ່ານເຈົ້າເມືອງຜູ້ເກົ່າ ທີ່ໄດ້ຊີ້ນຳ-ນຳພາ ແລະ ພ້ອມກັນ ຈັດຕັ້ງປະຕິບັດ ຈົນມີຜົນສຳເລັດໃນຫຼາຍໆດ້ານ, ພ້ອມນີ້ກໍ່ຍັງໄດ້ຝາກເຖິງ ທ່ານເຈົ້າເມືອງຜູ້ໃໝ່ ຈົ່ງນຳເອົາບົດຮຽນ ກໍ່ຄືຜົນສຳເລັດໃນການເຄື່ອນໄຫວຜ່ານມາ ເພື່ອຜັນຂະຫຍາຍເຂົ້າໃສ່ໜ້າທີ່ ວຽກງານ ທີ່ພັກ-ລັດມອບໝາຍໃຫ້ເກີດ ດອກອອກຜົນ ແລະ ມີຜົນສຳເລັດຍິ່ງໃຫຍ່ກວ່າເກົ່າ.

ນັກຂ່າວເມືອງອຸທຸມພອນ

#savannakhet #medailaos