ບໍລິຄຳໄຊ ສະຫລຸບວຽກງານປົກຄອງທ້າຍປີ

0
282

ເພື່ອ​​ລາຍ​ງານການຈັດ​ຕັ້ງ​ປະຕິບັດ​ວຽກ​ງານ​ ທີ່​ໄດ້​ມອບ​ໝາຍ​ໃຫ້ບັນດາເມືອງ ແລະ ພະແນກການ​ ​ໃນ​ວັນ​ທີ 31 ທັນວາ 2019 ຢູ່​ຫ້ອງ​ວ່າການ​​ແຂວງ ໄດ້​ຈັດ​ກອງ​ປະຊຸມອົງການປົກຄອງແຂວງ ປະຈຳເດືອນພະຈິກ ແລະ ທັນວາຂຶ້ນ ໂດຍ​ການ​ເປັນ​ປະທານ​ຂອງ​ທ່ານ ປອ ກອງ​ແກ້ວ ​ໄຊ​ສົງຄາມ ​ ເຈົ້າ​ແຂວງບໍລິຄຳ​ໄຊ, ມີບັນດາພະແນກການອ້ອມຂ້າງ, ເມືອງ 7 ຕົວເມືອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ກອງປະຊຸມໄດ້ຮັບຟັງບົດລາຍງານການສັງລວມຜົນການຈັດຕັ້ງປະຕິບັດ ກອງປະຊຸມອົງການປົກຄອງແຂວງ ຄັ້ງວັນທີ 12 ພະຈິກ ທີ່ຜ່ານມາ ໂດຍລວມແລ້ວເຫັນວ່າວຽກງານຫຼາຍດ້ານໄດ້ຮັບການປະຕິບັດ ແລະ ມີຜົນສຳເລັດເປັນຢ່າງດີ ໂດຍສະເພາະວຽກງານ ປກຊ ແລະ ປກສ ທີ່ຮັກສາໄດ້ສະຖຽນລະພາບທາງດ້ານການເມືອງ ແລະ ສັງຄົມມີຄວາມສະຫງົບ, ໃນໄລຍະຜ່ານມາ ສາມາດຍຶດລົດມີໄມ້ຄະຍຸງ 70 ໂຕ ນ້ຳໜັກ 326 ກິໂລ, ມີຄະດີອາຍາເກີດຂຶ້ນ 21 ເລື່ອງ ມ້າງໄດ້ 15 ລາຍ, ຄະດີຢາເສບຕິດ 39 ລາຍ, ມີຜູ້ຖືກຫາ 57 ຄົນ, ຍິງ 1 ຄົນ, ສາມາດຍຶດຂອງກາງ ຢາບ້າ ໄດ້ 26.927 ເມັດ, ເຮໂລອິນ 390 ກິໂລ, ຢາໄອ້ 200 ກິໂລ, ຢາຝິ່ນ 11 ກິໂລ, ລົດໃຫຍ່ 4 ຄັນ ແລະ ວັດຖຸຜິດກົດໝາຍຈຳນວນໜຶ່ງ.

ວຽກງານເສດຖະກິດ ກໍ່ໄດ້ຮັບການເອົາໃຈໃສ່ ແລະ ປັບປຸງຢ່າງຕໍ່ເນື່ອງ ໂດຍໄດ້ຄົ້ນຄ້ວາພິຈາລະນາຫຼຸດຜ່ອນຂັ້ນຕອນ ແລະ ປັບປຸງນະໂຍບາຍ ສົ່ງເສີມການລົງທຶນໃຫ້ມີຄວາມສະດວກວ່ອງໄວ, ຮອດວັນທີ 23 ທັນວາ ສາມາດເກັບລາຍຮັບໄດ້ 718,83 ຕື້ກີບ ເທົ່າກັບ 82,92% ໃນນັ້ນ ພູດສູນກາງ 540,16 ຕື້ກີບ ເທົ່າກັບ 80,43% ແລະ ພູດທ້ອງຖິ່ນ 178,67 ຕື້ກີບ ເທົ່າກັບ 91,49%, ຂຶ້ນສໍາມະໂນທີ່ດິນໄດ້ 6.057 ຕອນ ລື່ນແຜນ 0,95%, ໄດ້ເປີດກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ (ODOP) ໄດ້ 3 ຫົວໜ່ວຍ.

ກອງປະຊຸມ ຍັງໄດ້ຮັບຟັງລາຍງານຫຼາຍວຽກງານທີ່ພົ້ນເດັ່ນ ຈາກບັນດາເມືອງ ແລະ ພະແນກການທີ່ກ່ຽວຂ້ອງ ເປັນຕົ້ນແມ່ນການຊຸກຍູ້ເສດຖະກິດ, ການຮ່າງນິຕິກຳຄຸ້ມຄອງດິນ 8 ປະເພດ, ການຕິດຕາມ, ກວດກາສັນຍາເຊົ່າ-ສຳປະທານ ຂອງບັນດາໂຄງການ ແລະ ວຽກງານອື່ນໆ.

Medialaos ບໍລິຄຳໄຊ