ໃນຕອນບ່າຍຂອງວັນທີ 3 ມັງກອນ 2020 ໜ່ວຍພັກຮາກຖານຫ້ອງການມໍລະດົກໂລກວັດພູຈຳປາສັກ ໄດ້ຈັດກອງປະຊຸມໃຫຍ່ຄັ້ງທີ VI ຂອງຕົນຂຶ້ນ ທີ່ຫ້ອງການດັ່ງກ່າວ ພາຍໃຕ້ການໃຫ້ກຽດເປັນປະທານຂອງສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ, ຫົວໜ້າຄະນະຈັດຕັ້ງແຂວງຈຳປາສັກ, ມີສະຫາຍ ອຸດົມສີ ແກ້ວສັກສິດ ເລຂາໜ່ວຍພັກຮາກຖານຫ້ອງການມໍລະດົກໂລກວັດພູຈຳປາສັກ, ພ້ອມດ້ວຍຄະນະໜ່ວຍພັກ, ສະມາຊິກພັກພາຍໃນໜ່ວຍ ແລະ ບັນດາສະຫາຍຈາກຂະແໜງ ການທີ່ກ່ຽວຂ້ອງຂັ້ນແຂວງ ແລະ ຂັ້ນເມືອງເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ພ້ອມກັນຮັບຟັງບົດລາຍງານການເມືອງທັງສອງພາກເຊິ່ງໄດ້ສະຫຼຸບຕີລາຄາຄືນໃນການຊີ້ນຳໆພາຂອງຄະນະພັກຕະຫຼອດໄລຍະ 5 ປີຜ່ານມາ ທັງໄດ້ຢັ້ງຢືນໃຫ້ເຫັນເຖິງຄວາມເປັນເຈົ້າການ ແລະ ຄວາມຮັບຜິດຊອບສູງໃນການຈັດຕັ້ງປະຕິບັດວຽກງານຂອງຄະນະພັກ, ຄຽງຄູ່ກັນນັ້ນກໍ່ຍົກໃຫ້ເຫັນຂໍ້ຄົງຄ້າງ ແລະ ຂໍ້ຂາດຕົກບົກຜ່ອງບາງດ້ານໃນການຊີ້ນຳໆພາວຽກງານບາງດ້ານເພື່ອພ້ອມກັນແກ້ໄຂໃນຕໍ່ໜ້າໃຫ້ມີຜົນສຳເລັດ. ໜ່ວຍພັກຮາກຖານຫ້ອງການມໍລະດົກໂລກວັດພູຈຳປາສັກ ມີສະມາຊິກພັກທັງໝົດ 22 ສະຫາຍ, ຍິງ 6 ສະຫາຍ, ສະມາຊິກພັກສຳຮອງ 2 ສະຫາຍ, ຍິງ 1 ສະຫາຍ ສະໝັກເລືອກຕັ້ງທັງໝົດ 5 ສະຫາຍ, ເລືອກເອົາ 3 ສະຫາຍ ເຊິ່ງໄດ້ແກ່: ສະຫາຍ ອຳພົນ ແສງພະຈັນ ເປັນເລຂາໜ່ວຍພັກຮາກຖານຫ້ອງການມໍລະດົກໂລກວັດພູຈຳປາສັກ, ສະຫາຍ ຄຳຈັນ ໄຊມຸງຄຸນ ເປັນຮອງເລຂາໜ່ວຍພັກ, ສະຫາຍ ອຳນາດ ພາດີ ເປັນຄະນະໜ່ວຍພັກ ທັງເປັນປະທານກວດກາ.
ຕອນທ້າຍກອງປະຊຸມ ສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ, ຫົວໜ້າຄະນະຈັດຕັ້ງແຂວງຈຳປາສັກ ກໍ່ໄດ້ມີຄໍາເຫັນໂອ້ລົມຊີ້ທິດເຍືອງທາງ ເພື່ອເປັນບ່ອນອີງໃນການນໍາພາ-ຊີ້ນໍາວຽກງານຮອບດ້ານຂອງໜ່ວຍພັກດັ່ງກ່າວໃນຕໍ່ໜ້າ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ສື່ມວນຊົນແຂວງຈຳປາສັກ
medialaos
ແຫລ່ງຂ່າວຈາກ: ເຜກວັດພູ