ກອງປະຊຸມອົງການປົກຄອງ ແຂວງໄຊສົມບູນ ປະຈຳປີ 2019 ແລະ ວາງທິດທາງແຜນການ ປີ 2020 ໄດ້ຈັດຂື້ນໃນຕອນເຊົ້າ ຂອງວັນທີ 6 ມັງກອນ 2020 ທີ່ສະໂມສອນ ເມືອງອະນຸວົງ, ໂດຍການເປັນປະທານ ຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ, ມີທ່ານ ບຸນສຸກ ຈອມວິສານ, ປະທານສະພາປະຊາຊົນແຂວງ, ທ່ານ ແດງ ປະທຸມທອງ, ຮອງເຈົ້າແຂວງ ພ້ອມດ້ວຍຄະນະບໍລິຫານງານພັກແຂວງ, ການນຳເມືອງ ທັງ 5 ເມືອງ, ພະແນກການ, ອົງການ-ກົມກອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພົຕ ຄຳລຽງ ອຸທະໄກສອນ ໄດ້ມີຄຳເຫັນກ່າວເປີດກອງປະຊຸມ ຊື່ງທ່ານໄດ້ກ່າວວ່າ: ກອງປະຊຸມດັ່ງກ່າວນີ້ ແມ່ນຈະໄດ້ສະຫລຸບຕີລາຄາການຈັດຕັ້ງວຽກງານຮອບດ້ານ ຂອງອົງການປົກຄອງແຂວງ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານການເງິນ ປະຈຳປີ 2019 ເພື່ອຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ-ຄົງຄ້າງ, ສາເຫດທີ່ພາໃຫ້ຄົງຄ້າງ ແລະ ແຜນການຄາດໝາຍສູ້ຊົນ ໃນປີ 2020 ນອກຈາກນັ້ນ ຈະໄດ້ພ້ອມກັນຄົ້ນຄວ້າແຜນການຈັດສັນໂຄງການລົງທືນຂອງລັດ ແລະ ການຈັດສັນງົບປະມານລົງທຶນຂອງລັດ ປະຈຳປີ 2020, ສະຫລຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ປະຈຳປີ 2019 ໂດຍຍົກໃຫ້ເຫັນການແກ້ໄຂບັນຫາຢາເສບຕິດ, ການຄຸ້ມຄອງການເຄື່ອນຍ້າຍ, ຕັ້ງພູມລຳເນົາຂອງປະຊາຊົນ, ການຂື້ນສຳມະໂນຄົວ, ການອອກບັດພົນລະເມືອງ ນອກຈາກນີ້ ຍັງຈະໄດ້ພ້ອມກັນ ຄົ້ນຄວ້າ, ປຶກສາຫາລື, ປະກອບຄຳຄິດ-ຄຳເຫັນ ໃສ່ຮ່າງນິຕິກຳໃຕ້ກົດໝາຍຂອງແຂວງ ເພື່ອປັບປຸງ ແລະ ສະເໜີຜ່ານສະພາປະຊາຊົນແຂວງຮັບຮອງ ເປັນຕົ້ນ: ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍລະບຽບບໍລິຫານ ຂອງແຂວງໄຊສົມບູນ ພ້ອມດຽວກັນນີ້ ທ່ານຍັງໄດ້ຮຽກຮ້ອງໃຫ້ຜູ່ແທນກອງປະຊຸມຈົ່ງພ້ອມກັນສຸມສະຕິປັນຍາຂອງຕົນ ເຂົ້າໃນການຄົ້ນຄວ້າ, ປຶກສາຫາລື ກ່ຽວກັບບັນຫາທີ່ຍັງຄົງຄ້າງໃຫ້ໄດ້ຮັບການແກ້ໄຂ ໃນຕໍ່ໜ້າ ແລະ ພ້ອມກັນກຳນົດທິດທາງແຜນການພັດທະນາເສດຖະກິດ-ສັງຄົມຂອງແຂວງ ປະຈຳປີ 2020 ໃຫ້ໄດ້ຮັບການຈັດຕັ້ງປະຕິບັດ ມີຜົນສຳເລັດຕາມລະດັບຄາດໝາຍທີ່ວາງໄວ້ ເພື່ອໃຫ້ແຂວງໄຊສົມບູນ ໄດ້ຮັບການພັດທະນາຢ່າງຕໍ່ເນື່ອງ ແລະ ມີຄວາມສະຫງົບໂດຍພື້ນຖານ ໂອກາດດັ່ງກ່າວ ທ່ານໄດ້ກ່າວເປີດກອງປະຊຸມ ຄັ້ງນີ້ ຢ່າງເປັນທາງການ. ຈາກນັ້ນ ກອງປະຊຸມໄດ້ຮັບຟັງການຜ່ານຮ່າງບົດສະຫລຸບຕີລາຄາການຈັດຕັ້ງປະຕິບັດວຽກງານຮອບດ້ານຂອງອົງການປົກຄອງແຂວງ ປະຈຳປີ 2019 ແລະ ທິດທາງແຜນການວຽກງານຈຸດສຸມ ປະຈຳປີ 2020 ຈາກທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການແຂວງ, ຮັບຟັງການລາຍງານການຈັດຕັ້ງເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ທິດທາງແຜນການ ຮັບປະກັນຄວາມສະຫງົບ ປະຈຳປີ 2020 ພ້ອມດຽວກັນນີ້ ຜູ່ແທນກອງປະຊຸມໄດ້ມີການປະກອບຄຳຄິດ-ຄຳເຫັນຕໍ່ກັບ ວຽກງານດັ່ງກ່າວ ເພື່ອໃຫ້ໄດ້ຮັບການປັບປຸງ, ແກ້ໄຂ ໃຫ້ດີຂື້ນກວ່າເກົ່າ. ກອງປະຊຸມຄັ້ງນີ້ ຈະດຳເດີນເປັນເວລາ 2 ວັນ ຈື່ງສຳເລັດ.

ພາບ-ຂ່າວ: ພູທອນ ວິນາວົງ
MediaLaos xaysomboun